കുമ്പള പഴയ ബസ് സ്റ്റാൻഡ് സ്ഥലത്ത് ഷോപ്പിംഗ് കോംപ്ലക്സ് ഉയരുമോ; പുതിയ ഭരണസമിതിയിൽ പ്രതീക്ഷയർപ്പിച്ച് നാട്ടുകാർ

കുമ്പള: (KasargodVartha) രണ്ടര പതിറ്റാണ്ടുകാലമായി മുടങ്ങിക്കിടക്കുന്ന കുമ്പളയിലെ പഴയ ബസ് സ്റ്റാൻഡ് സ്ഥലത്ത് ഷോപ്പിംഗ് കോംപ്ലക്സ് നിർമ്മാണം ആരംഭിക്കുമെന്ന പ്രതീക്ഷയിലാണ് നാട്ടുകാരും വ്യാപാരികളും. പുതിയ പഞ്ചായത്ത് ഭരണസമിതി ഈ കാര്യത്തിൽ അനുകൂല നടപടി സ്വീകരിക്കുമെന്നാണ് ഇവരുടെ പ്രതീക്ഷ.

കഴിഞ്ഞ നാല് ഭരണസമിതികളും ഷോപ്പിംഗ് കോംപ്ലക്സ് നിർമ്മാണം പ്രഖ്യാപനങ്ങളിൽ മാത്രമാണ് ഒതുക്കിയത്. നിലവിൽ ട്രാഫിക് പരിഷ്കരണത്തിന്റെ ഭാഗമായി ഇവിടെനിന്ന് ബസ് സ്റ്റാൻഡ് ഒഴിവാക്കുകയും ബസ് സ്റ്റോപ്പുകൾ കെഎസ്ടിപി (KSTP) റോഡിലേക്ക് മാറ്റുകയും ചെയ്തിട്ടുണ്ട്. 

ഇതോടെ ഒഴിഞ്ഞുകിടക്കുന്ന പഴയ ബസ് സ്റ്റാൻഡ് സ്ഥലത്ത് പഞ്ചായത്ത് ഷോപ്പിംഗ് സമുച്ചയം നിർമ്മിക്കണമെന്ന ആവശ്യം ശക്തമായി. ഇതിനായി കഴിഞ്ഞ പഞ്ചായത്ത് ഭരണസമിതി ഫണ്ട് നീക്കിവെച്ചതായും നിർമ്മാണത്തിന് കരാർ നൽകിയതായും സൂചനയുണ്ട്.

കുമ്പള ഗ്രാമപഞ്ചായത്തിന് ലഭിക്കേണ്ട വലിയൊരു വരുമാന സ്രോതസ്സായിരുന്നു ഈ ഷോപ്പിംഗ് കോംപ്ലക്സ് നിർമ്മാണം. മുൻപത്തെ നാല് ഭരണസമിതികൾ ഇതിനായി നീക്കങ്ങൾ നടത്തിയിരുന്നുവെങ്കിലും തുടർനടപടികൾ ഉണ്ടായില്ല. ഇതുമൂലം പഞ്ചായത്തിന് ലഭിക്കേണ്ടിയിരുന്ന ലക്ഷക്കണക്കിന് രൂപയുടെ വരുമാനമാണ് നഷ്ടമായതെന്ന് ആക്ഷേപം ഉയരുന്നുണ്ട്. വിവിധ സാങ്കേതിക തടസ്സങ്ങൾ കാരണമാണ് രണ്ട് പതിറ്റാണ്ടിലേറെയായി നിർമ്മാണം തടസ്സപ്പെട്ടത്. ഇനിയെങ്കിലും വേഗത്തിലുള്ള നടപടി ഉണ്ടാകുമെന്ന് വ്യാപാരികൾ കരുതുന്നു.

കുമ്പള ടൗണിന്റെ ഏറ്റവും പ്രധാനപ്പെട്ട ഭാഗത്താണ് പഴയ ബസ് സ്റ്റാൻഡ് സ്ഥിതി ചെയ്യുന്നത്. ദേശീയപാതയോരത്തുള്ള ഈ സ്ഥലം നിലവിൽ ഓട്ടോറിക്ഷ സ്റ്റാൻഡായാണ് ഉപയോഗിക്കുന്നത്. ദേശീയപാത നിർമ്മാണവുമായി ബന്ധപ്പെട്ട് കുമ്പള ടൗണിൽ മേൽപ്പാലം നിർമ്മിച്ച് ടൗണിലേക്കുള്ള പ്രവേശന കവാടം നിലനിർത്തണമെന്ന് ആവശ്യം ഉയർന്നിരുന്നുവെങ്കിലും അധികൃതർ ഇത് പരിഗണിച്ചില്ല.

ഇതോടെ ടൗണിലേക്ക് വാഹനങ്ങൾ പ്രവേശിക്കാൻ 200 മീറ്റർ അകലെയുള്ള റെയിൽവേ സ്റ്റേഷൻ അടിപ്പാതയെ ആശ്രയിക്കേണ്ട അവസ്ഥയാണുള്ളത്. ടൗണിനെ അടച്ചുകൊണ്ടുള്ള ദേശീയപാത നിർമ്മാണത്തിനെതിരെ വലിയ പ്രതിഷേധം ഉയർന്നിരുന്നുവെങ്കിലും പരിഹാരമുണ്ടായില്ല.

കുമ്പളയുടെ വികസനത്തിനായി ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം രേഖപ്പെടുത്തൂ. 

Article Summary: Residents of Kumbla urge the new Panchayat committee to start the long-pending shopping complex project.

#Kumbla #KasaragodNews #Development #Panchayat #ShoppingComplex #KumblaVartha