ട്രാഫിക് പരിഷ്കരണം: നിർദ്ദേശം പരിഗണിച്ചില്ലെങ്കിൽ പ്രക്ഷോഭമെന്ന് കുമ്പള വ്യാപാരി സംഘടന

കുമ്പള: (KasargodVartha) കുമ്പള ഗ്രാമപഞ്ചായത്ത് ടൗണിൽ നടപ്പിലാക്കിയ ട്രാഫിക് പരിഷ്കരണ രീതിയിൽ സമ്മിശ്ര പ്രതികരണമുയർന്നതിനെ തുടർന്ന്, നാട്ടുകാരുടെയും വ്യാപാരികളുടെയും നിർദ്ദേശങ്ങൾ പരിഗണിച്ചില്ലെങ്കിൽ പ്രക്ഷോഭം തുടങ്ങുമെന്ന് വ്യാപാരി വ്യവസായി ഏകോപന സമിതി മുന്നറിയിപ്പ് നൽകി. പഞ്ചായത്ത് ഭരണസമിതിയും പോലീസ് അധികാരികളും ചേർന്ന് പൊതുജനങ്ങളുടെ അഭിപ്രായങ്ങൾ അവഗണിച്ച് മുന്നോട്ട് പോകുന്നതിൽ പ്രതിഷേധിച്ചാണ് ശക്തമായ സമരപരിപാടികൾക്ക് രൂപം നൽകിയിരിക്കുന്നത്.

പൊതുജനങ്ങളും വ്യാപാരികളും നേരിട്ട പരാതികൾ ചർച്ചചെയ്യാൻ കുമ്പള ഗ്രാമപഞ്ചായത്ത് വിളിച്ചുചേർത്ത യോഗത്തിൽ ഭൂരിഭാഗം അംഗങ്ങളും ട്രാഫിക് പരിഷ്കരണത്തിൻ്റെ പോരായ്മകൾ ചൂണ്ടിക്കാട്ടിയിരുന്നു. ഒപ്പം പഴയ ബസ്‌സ്റ്റാൻഡിൽ യാത്രക്കാരെ ഇറക്കാനും കയറ്റാനും സംവിധാനം ഉണ്ടാക്കണമെന്ന് ഭൂരിഭാഗം അംഗങ്ങളും ആവശ്യപ്പെടുകയും ചെയ്തിരുന്നു. എന്നാൽ, യോഗം പ്രഹസനമാക്കി, പൊതുജനങ്ങളുടെയും, വ്യാപാരികളുടെയും, രാഷ്ട്രീയപാർട്ടി പ്രതിനിധികളുടെയും നിർദ്ദേശങ്ങൾ ചെവികൊള്ളാതെ പരീക്ഷണാടിസ്ഥാനത്തിൽ നടപ്പിലാക്കിയ ട്രാഫിക് പരിഷ്കരണവുമായി പഞ്ചായത്ത് ഭരണസമിതിയും പോലീസ് അധികാരികളും മുന്നോട്ടു പോവുകയാണ്.

പഞ്ചായത്ത് അധികാരികൾക്ക് നൽകിയ നിവേദനത്തിന് പരിഹാരം കാണാത്തപക്ഷം 2025 നവംബർ ആദ്യവാരം കുമ്പളയിൽ കടകളടച്ച് ഹർത്താൽ സംഘടിപ്പിക്കാനും, കുമ്പള പഞ്ചായത്ത് ഓഫീസിലേക്ക് മാർച്ച് നടത്താനുമാണ് വ്യാപാരികളുടെ തീരുമാനമെന്ന് വ്യാപാരി വ്യവസായി ഏകോപന സമിതി കുമ്പള യൂണിറ്റ് കമ്മിറ്റി പ്രസിഡൻ്റ് രാജേഷ് മനയത്ത്, സെക്രട്ടറി സത്താർ ആരിക്കാടി എന്നിവർ അറിയിച്ചു. പൊതുജനങ്ങളുടെയും വ്യാപാരികളുടെയും ആവശ്യങ്ങൾ പരിഗണിക്കാതെ മുന്നോട്ട് പോയാൽ ശക്തമായ പ്രതിഷേധം ഉണ്ടാകുമെന്ന് വ്യാപാരി സംഘടന മുന്നറിയിപ്പ് നൽകി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കൂ.

Article Summary: Kumbla merchants threaten hartal and march against ignored traffic reform suggestions.

#Kumbla #TrafficReform #MerchantsProtest #HartalAlert #KasargodNews #VSSC