കുമ്പള ടോൾ ബൂത്ത് പൂട്ടുന്നു; കേന്ദ്ര സർക്കാർ ഉത്തരവ് ബുധനാഴ്ച; രാഷ്ട്രീയ പോര് മുറുകുന്നു

കാസർകോട്: (KasargodVartha) ജില്ലയിൽ വലിയ പ്രതിഷേധങ്ങൾക്ക് കാരണമായ കുമ്പള ആരിക്കാടിയിലെ ടോൾ ബൂത്ത് അടച്ചുപൂട്ടാൻ കേന്ദ്ര ഉപരിതല ഗതാഗത മന്ത്രാലയം തീരുമാനിച്ചു. ഇതുമായി ബന്ധപ്പെട്ട കേന്ദ്ര സർക്കാർ ഉത്തരവ് ബുധനാഴ്ച പുറത്തിറങ്ങും. ടോൾ പിരിവിനെതിരെ പ്രദേശത്ത് ദീർഘനാളായി ശക്തമായ പ്രതിഷേധം നിലനിൽക്കുന്ന സാഹചര്യത്തിലാണ് നിർണായകമായ ഈ തീരുമാനം പുറത്തുവരുന്നത്. ടോൾ ഗേറ്റുകൾ നീക്കം ചെയ്യുന്നത് യാത്രക്കാർക്കും പ്രദേശവാസികൾക്കും വലിയ ആശ്വാസമാകും.

അതേസമയം, ടോൾ ബൂത്ത് പൂട്ടുന്നതിന്റെ ക്രെഡിറ്റ് സ്വന്തമാക്കാൻ രാഷ്ട്രീയ പാർട്ടികൾക്കിടയിൽ മത്സരം തുടങ്ങിക്കഴിഞ്ഞു. കേന്ദ്രത്തിൽ ബിജെപി നടത്തിയ ശക്തമായ ഇടപെടലുകൾ മൂലമാണ് ടോൾ ഒഴിവാക്കിയതെന്ന് ബിജെപി നേതൃത്വം അവകാശപ്പെടുമ്പോൾ, മഞ്ചേശ്വരം എംഎൽഎയുടെ നേതൃത്വത്തിൽ നടന്ന ജനകീയ സമരത്തിന്റെയും നിയമപോരാട്ടത്തിന്റെയും വിജയമാണിതെന്ന് സമരസമിതി പറയുന്നു. തങ്ങളുടെ നിരന്തരമായ പ്രക്ഷോഭത്തിന് മുന്നിൽ അധികൃതർക്ക് മുട്ടുമടക്കേണ്ടി വന്നതാണെന്നാണ് സമരസമിതിയുടെ വാദം.

ടോൾ ഗേറ്റ് പൂർണമായി ഒഴിവാക്കുന്നതിനുള്ള നടപടികൾ ആരംഭിച്ചതായും 48 മണിക്കൂറിനുള്ളിൽ കുമ്പള ടോൾ ബൂത്ത് പൂട്ടുമെന്നും ബിജെപി ജില്ലാ പ്രസിഡന്റ് എം എൽ അശ്വനി വ്യക്തമാക്കി.

കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരിയുടെ നിർദ്ദേശം ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിന് ലഭിച്ചതായാണ് ബിജെപി അവകാശപ്പെടുന്നത്. ടോൾ പ്ലാസ ഒഴിവാക്കാനുള്ള കേന്ദ്ര തീരുമാനത്തെ ബിജെപി നേതാവ് കെ സുരേന്ദ്രൻ സ്വാഗതം ചെയ്തു. മഞ്ചേശ്വരം മണ്ഡലത്തിലെ ജനങ്ങൾക്ക് വേണ്ടി പ്രധാനമന്ത്രി നരേന്ദ്ര മോദിക്കും കേന്ദ്ര മന്ത്രി നിതിൻ ഗഡ്കരിക്കും അദ്ദേഹം നന്ദി അറിയിക്കുന്നതായി സുരേന്ദ്രൻ ഫെയ്സ്ബുക്കിൽ കുറിച്ചു.

കുമ്പള ആരിക്കാടിയിലെ ടോൾ പിരിവ് കേന്ദ്രം നിർത്തലാക്കാനുള്ള കേന്ദ്ര സർക്കാർ തീരുമാനം ജനകീയ പോരാട്ടത്തിന്റെ ഉജ്ജ്വല വിജയമാണെന്ന് മഞ്ചേശ്വരം എംഎൽഎ എ കെ എം അഷ്റഫ്. ആരിക്കാടിയിൽ ദീർഘനാളായി നടന്നുവരുന്ന സമരത്തിന് മുന്നിൽ കേന്ദ്ര അധികാരികൾക്ക് മുട്ടുമടക്കേണ്ടി വന്നുവെന്നും ഇത് നാടിന്റെ കൂട്ടായ വിജയമാണെന്നും അദ്ദേഹം ഫേസ്ബുക്കിൽ കുറിച്ചു.

അന്യായമായ ടോൾ പിരിവിനെതിരെ മഞ്ചേശ്വരം മണ്ഡലത്തിലെ ജനങ്ങളെ ഒന്നിപ്പിച്ചു കൊണ്ട് ശക്തമായ സമരപരിപാടികളാണ് എംഎൽഎയുടെ നേതൃത്വത്തിൽ നടന്നുവന്നത്. 'നാം ഒന്നിച്ച് നേടിയ സമരവിജയം' എന്നാണ് ഈ തീരുമാനത്തെ അദ്ദേഹം വിശേഷിപ്പിച്ചത്. ജനകീയ സമരത്തിന് മുൻപിൽ മുട്ട് മടക്കാത്ത ഒരു അധികാര കേന്ദ്രവുമില്ലെന്ന് തെളിയിക്കുന്നതാണ് ആരിക്കാടിയിലെ അനുഭവമെന്നും അദ്ദേഹം കൂട്ടിച്ചേർത്തു.

ദേശീയപാത അതോറിറ്റിയുടെ മാനദണ്ഡങ്ങൾ ലംഘിച്ചുകൊണ്ട് സ്ഥാപിച്ച ടോൾ ഗേറ്റിനെതിരെ മാസങ്ങളായി പ്രക്ഷോഭം തുടരുകയായിരുന്നു. ഈ സമരങ്ങളിൽ പങ്കുചേർന്ന മുഴുവൻ സമരഭടന്മാർക്കും അഭിവാദ്യങ്ങൾ അർപ്പിക്കുന്നതായും എംഎൽഎ അറിയിച്ചു

ടോൾ പിരിവുമായി ബന്ധപ്പെട്ട കേസിൽ ഈ മാസം 11-ന് ഹൈക്കോടതി വിധി വരാനിരിക്കെയാണ് കേന്ദ്ര സർക്കാരിന്റെ ഭാഗത്തുനിന്ന് ഇത്തരമൊരു നീക്കം ഉണ്ടായിരിക്കുന്നത് എന്നത് ശ്രദ്ധേയമാണ്. രാഷ്ട്രീയ പകപോക്കലുകളും അവകാശവാദങ്ങളും തുടരുമ്പോഴും ടോൾ ബൂത്ത് ഇല്ലാതാകുന്നത് സാധാരണക്കാരായ ജനങ്ങൾക്ക് വലിയ നേട്ടമായി മാറും.

ജനകീയ പ്രതിഷേധത്തിന് മുന്നിൽ കേന്ദ്രം മുട്ടുമടക്കി; ആരിക്കാടി ടോൾ പിൻവലിക്കൽ ജനാധിപത്യത്തിന്റെ വിജയമെന്ന് യൂത്ത് ലീഗ്. പിരിച്ച പണം തിരിച്ചുനൽകണമെന്ന് ആവശ്യം

മഞ്ചേശ്വരം: കുമ്പള ആരിക്കാടിയിൽ മാനദണ്ഡങ്ങൾ പാലിക്കാതെ സ്ഥാപിച്ച അനധികൃത ടോൾ ഗേറ്റ് കേന്ദ്ര സർക്കാർ പിൻവലിക്കാൻ തീരുമാനിച്ചത് ജനകീയ പോരാട്ടത്തിന്റെ ഉജ്ജ്വല വിജയമാണെന്ന് മുസ്ലിം യൂത്ത് ലീഗ് മഞ്ചേശ്വരം നിയോജക മണ്ഡലം കമ്മിറ്റി പ്രസ്താവിച്ചു. കഴിഞ്ഞ എട്ടു മാസത്തിലേറെയായി മഞ്ചേശ്വരം എംഎൽഎയുടെ നേതൃത്വത്തിൽ കക്ഷിരാഷ്ട്രീയത്തിന് അതീതമായി സമര സമിതി നടത്തിയ നിരന്തര പ്രക്ഷോഭങ്ങളുടെ ഫലമാണ് ഈ തീരുമാനമെന്ന് കമ്മിറ്റി വിലയിരുത്തി.

ജനവിരുദ്ധ തീരുമാനങ്ങളുമായി മുന്നോട്ട് പോകുന്ന സർക്കാരുകൾക്കുള്ള താക്കീതാണ് ഈ വിജയമെന്ന് യൂത്ത് ലീഗ് നേതാക്കൾ പറഞ്ഞു. നാടിന്റെ ഐക്യത്തോടെയുള്ള പോരാട്ടം കേന്ദ്ര സർക്കാരിനെ മുട്ടുകുത്തിച്ചിരിക്കുകയാണ്. കോടതിയിൽ കേസ് നിലനിൽക്കെ, ഔദ്യോഗിക ഉത്തരവുകളില്ലാതെ ജനങ്ങളിൽ നിന്ന് അനധികൃതമായി പിരിച്ചെടുത്ത ടോൾ തുക ഉടൻ തിരിച്ചുനൽകണമെന്നും യൂത്ത് ലീഗ് ആവശ്യപ്പെട്ടു.

ജനാധിപത്യ രീതിയിൽ പ്രതിഷേധിച്ച സമരക്കാർക്കെതിരെ എടുത്ത അന്യായമായ കേസുകൾ സർക്കാർ അടിയന്തരമായി പിൻവലിക്കണം. സമരത്തിന്റെ ഭാഗമായതിന് ജയിലിലടച്ച യൂത്ത് ലീഗ് പ്രവർത്തകൻ ഇർഷാദ് കുമ്പളക്കെതിരെയുള്ള നടപടികൾ പിൻവലിച്ച് ഇർഷാദിന്റെ മോചനം ഉടൻ ഉറപ്പാക്കണമെന്നും നേതാക്കൾ ആവശ്യപ്പെട്ടു.

‘ജനങ്ങളെ ദ്രോഹിക്കുന്ന നിലപാടുകൾക്കെതിരെയുള്ള മഞ്ചേശ്വരത്തെ ജനതയുടെ കരുത്താണ് ഇന്ന് കണ്ടത്. ഈ വിജയം വരാനിരിക്കുന്ന പോരാട്ടങ്ങൾക്ക് ആവേശം പകരും’ - മുസ്ലിം യൂത്ത് ലീഗ് മഞ്ചേശ്വരം നിയോജക മണ്ഡലം കമ്മിറ്റി പ്രസിഡന്റ് ബി എം മുസ്തഫ, ജനറൽ സെക്രട്ടറി സിദ്ദീഖ് ദണ്ഡഗോളി എന്നിവർ സംയുക്ത പ്രസ്താവനയിൽ വ്യക്തമാക്കി.

അനീതിക്കെതിരായ പോരാട്ടത്തിന് പ്രതീക്ഷ നൽകുന്ന നടപടി! കുമ്പള ടോൾ പ്ലാസ പൂട്ടാനുള്ള തീരുമാനം ജനകീയ സമരങ്ങളുടെ വിജയമെന്ന് വെൽഫെയർ പാർട്ടി

കാസർകോട്: കുമ്പള ടോൾ പ്ലാസ നിർത്തലാക്കാൻ കേന്ദ്ര സർക്കാർ തീരുമാനിച്ചത് പ്രദേശത്ത് നടന്ന ശക്തമായ ജനകീയ സമരങ്ങളുടെ വിജയമാണെന്ന് വെൽഫെയർ പാർട്ടി ജില്ലാ സെക്രട്ടറിയേറ്റ് അഭിപ്രായപ്പെട്ടു. ദേശീയപാതകളിൽ ഓരോ 60 കിലോമീറ്ററിനുള്ളിൽ മാത്രമേ ടോൾ പ്ലാസ പാടുള്ളൂ എന്ന മാനദണ്ഡം നിലനിൽക്കെ, വെറും 22 കിലോമീറ്റർ പരിധിയിൽ കുമ്പള ആരിക്കാടിയിൽ ടോൾ പ്ലാസ ആരംഭിച്ചത് വലിയ അനീതിയായിരുന്നുവെന്ന് പാർട്ടി ചൂണ്ടിക്കാട്ടി.

ഈ അനധികൃത നടപടിക്കെതിരെ നടന്ന വിട്ടുവീഴ്ചയില്ലാത്ത ജനാധിപത്യ പ്രക്ഷോഭങ്ങളുടെ ഫലമാണ് ഇപ്പോൾ കേന്ദ്ര ഉപരിതല ഗതാഗത മന്ത്രാലയം ടോൾ പ്ലാസ പൂട്ടാൻ ഉത്തരവിറക്കിയ സാഹചര്യം സൃഷ്ടിച്ചതെന്ന് യോഗം വിലയിരുത്തി. അനീതികൾക്കെതിരെയും ഭരണകൂടത്തിന്റെ ജനവിരുദ്ധ നിലപാടുകൾക്കെതിരെയും നടക്കുന്ന ജനാധിപത്യപരമായ ജനകീയ മുന്നേറ്റങ്ങൾക്ക് വലിയ പ്രതീക്ഷ നൽകുന്ന നടപടിയാണിതെന്നും നേതാക്കൾ കൂട്ടിച്ചേർത്തു.

ജനകീയ സമരങ്ങൾക്ക് നേതൃത്വം നൽകിയ ജനപ്രതിനിധികൾക്കും ആക്ഷൻ കമ്മിറ്റിക്കും പ്രക്ഷോഭ രംഗത്തുണ്ടായിരുന്ന മുഴുവൻ സമര ഭടന്മാർക്കും വെൽഫെയർ പാർട്ടി അഭിവാദ്യങ്ങൾ അർപ്പിച്ചു. യോഗത്തിൽ ജില്ലാ പ്രസിഡന്റ് ടി.കെ (ടി.കെ അഷ്‌റഫ് അധ്യക്ഷത വഹിച്ചു. അബ്ദുൽ ലത്തീഫ് കുമ്പള, സി.എ യൂസുഫ്, സി എച്ച് ബാലകൃഷ്ണൻ, മഹ്മൂദ് പള്ളിപ്പുഴ, സഹീറ ലത്തീഫ് എന്നിവർ സംസാരിച്ചു.

പുതിയ വാർത്തകൾക്കായി ഞങ്ങളുടെ ഫേസ്ബുക്ക് പേജ് ലൈക്ക് ചെയ്യുക.

ഈ വാർത്ത സുഹൃത്തുക്കൾക്കും ഗ്രൂപ്പുകളിലും ഷെയർ ചെയ്യൂ.

നിങ്ങളുടെ അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: The central government has decided to close the Kumbla Arikady toll booth, following intense protests and political interventions.

#Kasaragod #KumblaToll #TollPlaza #CentralGovernment #NitinGadkari #BJP #KeralaPolitics #ArikadyTollസമരസമിതിയുടെയും ബിജെപിയുടെയും അവകാശവാദങ്ങൾ വസ്തുനിഷ്ഠമായി റിപ്പോർട്ട് ചെയ്തു.