കുമ്പള അടിപ്പാതയിലെ കൈവരി ദുരിതമായി; ബസ്സുകൾക്ക് തിരിയാൻ ഇടമില്ല

കുമ്പള: (KasargodVartha) റെയിൽവേ സ്റ്റേഷന് സമീപത്തുള്ള അടിപ്പാതയിൽ സ്ഥാപിച്ച കൈവരിയുടെ നീളം കൂടിയതും, വളവില്ലാത്തതും ബസ്സുകൾക്ക് ടൗണിലേക്ക് പ്രവേശിക്കാൻ പ്രയാസമുണ്ടാക്കുന്നതായി പരാതി. ടുവേ സംവിധാനമുള്ള സർവീസ് റോഡിലാണ് ഇതുമൂലം ദുരിതമുണ്ടാകുന്നത്.

നടപ്പാതയ്ക്ക് കൈവരി അനിവാര്യമാണെങ്കിലും, ബസ്സുകൾ ടൗണിലേക്ക് പ്രവേശിക്കുന്ന ഭാഗത്ത് കൈവരിക്ക് നേരിയ വളവ് നൽകേണ്ടിയിരുന്നു. വളവില്ലാതെ നീളത്തിൽ സ്ഥാപിച്ചതിനാൽ ബസ്സുകൾക്ക് തിരിയാൻ ബുദ്ധിമുട്ടനുഭവപ്പെടുന്നു. 

കാസർകോട് ഭാഗത്തുനിന്ന് വരുന്ന ബസ്സുകൾക്ക് ടൗണിലേക്ക് പ്രവേശിക്കണമെങ്കിൽ കുമ്പള ബസ് സ്റ്റാൻഡിൽ നിന്ന് പുറപ്പെടുന്ന ബസ്സുകൾ സർവീസ് റോഡിൽ ഒതുക്കി ഇടേണ്ട അവസ്ഥയാണുള്ളത്.

പൊതുവേ വീതി കുറഞ്ഞ സർവീസ് റോഡാണ് ടൗണിൽ ടുവേ സംവിധാനത്തിലേക്ക് മാറ്റിയത്. ഇതിനിടയിൽ, സർവീസ് റോഡിനോട് ചേർന്ന് വളവില്ലാതെ സ്ഥാപിച്ച കൈവരിയാണ് ഇപ്പോൾ ഗതാഗതക്കുരുക്കിന് പ്രധാന കാരണം. 

ഈ വിഷയം ബന്ധപ്പെട്ട അധികാരികളെ അറിയിച്ചിട്ടും നടപടിയുണ്ടായില്ലെന്നാണ് ആക്ഷേപം. കൈവരിക്ക് നേരിയ വളവ് നൽകി ഗതാഗത തടസ്സം നീക്കണമെന്നാണ് യാത്രക്കാരുടെയും, നാട്ടുകാരുടെയും വ്യാപാരികളുടെയും ആവശ്യം.

കുമ്പളയിൽ അണ്ടർപാസേജ് സ്ഥാപിക്കേണ്ടിയിരുന്നത് ടൗണിന് സമാനമായിട്ടായിരുന്നു. എന്നാൽ, ഇത് കേൾക്കാൻ ബന്ധപ്പെട്ടവർ തയ്യാറായില്ലെന്നും ചില രാഷ്ട്രീയപ്പാർട്ടികളുടെ നീക്കങ്ങൾ ഇതിന് തടസ്സമായെന്നും ആക്ഷേപമുണ്ട്. അതിന്റെ ബുദ്ധിമുട്ട് ഇപ്പോൾ ടൗണിലെത്തുന്നവരും വ്യാപാരികളും അനുഭവിക്കുന്നു. ടൗണിൽ മേൽപ്പാലം വേണമെന്ന ആവശ്യവും ഇപ്പോൾ ശക്തമാണ്.

ദേശീയപാത നിർമ്മാണത്തിന്റെ ഭാഗമായി കുമ്പള ടൗണിനെ അടച്ചിട്ട നടപടി നേരത്തെ തന്നെ വ്യാപകമായ പ്രതിഷേധങ്ങൾക്കും സമരങ്ങൾക്കും വഴിവെച്ചിരുന്നു. ജനപ്രതിനിധികൾ ഈ വിഷയം വേണ്ടവിധം കൈകാര്യം ചെയ്തില്ലെന്നും, കുമ്പള ഗ്രാമപഞ്ചായത്ത് ഭരണസമിതിക്ക് ഈ വിഷയത്തിൽ ഒന്നും ചെയ്യാൻ കഴിയുന്നില്ലെന്നും നാട്ടുകാർ ചൂണ്ടിക്കാട്ടുന്നു.

ഈ പ്രശ്നത്തിന് ഒരു പരിഹാരം കണ്ടെത്താൻ എന്താണ് ചെയ്യേണ്ടത്? നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Kumbala underpass handrail causes traffic issues for buses.

#Kumbala #TrafficJam #Underpass #RoadSafety #Kasaragod #NationalHighway