കുമ്പളയിലെ ഇടുങ്ങിയ ‘ടു വേ’ റോഡ്: അപകടഭീഷണിയും ഗതാഗതക്കുരുക്കും രൂക്ഷം

കുമ്പള: (KasargodVartha) റെയിൽവേ സ്റ്റേഷൻ അടിപ്പാത വഴി ബസ് സ്റ്റാൻഡിലേക്കുള്ള സർവീസ് റോഡ് ഇരുദിശകളിലേക്കും ഗതാഗതത്തിനായി തുറന്നതോടെ കുമ്പളയിൽ യാത്രാദുരിതം വർധിക്കുന്നു. വ്യാപാരികളും നാട്ടുകാരും ഇതിനെതിരെ പ്രതിഷേധം അറിയിച്ചിട്ടും അധികൃതർ നടപടിയെടുക്കാത്തത് സ്ഥിതി കൂടുതൽ രൂക്ഷമാക്കിയിരിക്കുകയാണ്.

കഴിഞ്ഞ മൂന്ന് ദിവസം മുമ്പ് രാത്രി മംഗലാപുരത്തേക്ക് പോകുകയായിരുന്ന കെഎസ്ആർടിസി ബസ്സും ഒരു ടെമ്പോ വാനും ഇവിടെ കൂട്ടിയിടിച്ചിരുന്നു. ഇതിനു പിന്നാലെ ഈ ‘ടു വേ’ റോഡിൽ വലിയ ഗതാഗതക്കുരുക്കാണ് അനുഭവപ്പെടുന്നത്. 

ഗതാഗതക്കുരുക്ക് നിയന്ത്രിക്കാൻ ആളില്ലാത്തതിനാൽ വാഹന ഉടമകൾ തമ്മിലുള്ള വാഗ്വാദങ്ങൾ പതിവായിരിക്കുകയാണ്. ഇത് സംഘർഷത്തിലേക്ക് വരെ എത്തുമോ എന്ന ഭയം നാട്ടുകാർക്കുണ്ട്. അത്രയധികം രൂക്ഷമാണ് ഇവിടുത്തെ ഗതാഗതക്കുരുക്ക്.

ഈ ഇടുങ്ങിയ സർവീസ് റോഡിലൂടെ ഇരുദിശകളിലേക്കുമുള്ള ഗതാഗതം അപകടങ്ങൾ ക്ഷണിച്ചു വരുത്തുമെന്ന് വ്യാപാരികളും നാട്ടുകാരും നേരത്തെ തന്നെ അധികൃതരെ അറിയിച്ചിരുന്നു. എന്നാൽ കുമ്പള ടൗണുമായി ബന്ധപ്പെട്ട യാതൊരു പരാതിയും അധികൃതർ ചെവിക്കൊണ്ടില്ല. ജനപ്രതിനിധികളും വേണ്ടത്ര ശ്രദ്ധിച്ചില്ല. ഇതാണ് ഇപ്പോഴത്തെ ദുരിതത്തിന് കാരണം.

ദേശീയപാതയിൽ നിന്ന് കുമ്പള ടൗണിലേക്കുള്ള നേരിട്ടുള്ള വഴി അടച്ചതിനെ തുടർന്നാണ് ഈ സർവീസ് റോഡ് ‘ടു വേ’ സംവിധാനത്തിലേക്ക് മാറ്റിയത്. രണ്ട് ബസ്സുകൾക്കോ വലിയ വാഹനങ്ങൾക്കോ ഒരേസമയം ഈ ഇടുങ്ങിയ റോഡിലൂടെ കടന്നുപോകാൻ ബുദ്ധിമുട്ടുന്നതാണ് ഇപ്പോഴത്തെ ഗതാഗതക്കുരുക്കിന് പ്രധാന കാരണം. 

ഇതിനിടയിൽ ഈ ഭാഗത്ത് കാൽനടയാത്രക്കാർക്ക് നടപ്പാതയില്ലാത്തത് സ്കൂൾ തുറക്കുന്നതോടെ വിദ്യാർത്ഥികൾ ഉൾപ്പെടെയുള്ളവർക്ക് വലിയ ബുദ്ധിമുട്ടുണ്ടാക്കുമെന്നും നാട്ടുകാർ പറയുന്നു.

ഈ വാർത്ത ഷെയർ ചെയ്യുക, നിങ്ങളുടെ അഭിപ്രായങ്ങൾ രേഖപ്പെടുത്തുക.

Kumbala faces severe traffic jams after a service road became two-way, raising safety issues.

#KumbalaTraffic, #RoadSafety, #TrafficCongestion, #KeralaNews, #PublicIssue, #LocalNews