കുമ്പളയിൽ വീണ്ടും ടോൾഗേറ്റ് നീക്കം; പ്രതിഷേധം ആളിക്കത്തുന്നു, 19ന് ജനപ്രതിനിധികളുടെ യോഗം

കുമ്പള: (KasargodVartha) തലപ്പാടി - കാസർകോട് ദേശീയപാതയിൽ കുമ്പള ആരിക്കാടിയിൽ ടോൾഗേറ്റ് സ്ഥാപിക്കാനുള്ള നീക്കവുമായി ദേശീയപാത അതോറിറ്റി വീണ്ടും രംഗത്ത്. ഇതിന്റെ മുന്നോടിയായി നിർമ്മാണ കമ്പനിയായ ഊരാളുങ്കൽ ലേബർ സൊസൈറ്റി ടോൾഗേറ്റ് നിർമ്മാണത്തിന് പൊലീസ് സഹായം തേടിയത് പ്രതിഷേധങ്ങൾക്ക് വഴിവെച്ചിരിക്കുകയാണ്.

തലപ്പാടിയിൽ നിന്ന് വെറും 22 കിലോമീറ്റർ മാത്രം അകലെയുള്ള ആരിക്കാടിയിൽ താൽക്കാലിക ടോൾഗേറ്റ് നിർമ്മിക്കാനാണ് അധികൃതരുടെ ശ്രമം. നേരത്തെ ഈ നീക്കത്തിനെതിരെ ശക്തമായ ജനകീയ പ്രതിഷേധം ഉയർന്നതിനെ തുടർന്ന് കരാർ കമ്പനി നിർമ്മാണം നിർത്തിവെച്ചിരുന്നു. ദേശീയപാതയിൽ 60 കിലോമീറ്ററിന് ഒരെണ്ണം എന്ന മാനദണ്ഡം നിലനിൽക്കെയാണ് ഇത് ലംഘിച്ചുള്ള ടോൾഗേറ്റ് നിർമ്മാണത്തിന് ശ്രമം നടക്കുന്നത്. തലപ്പാടി - കാഞ്ഞങ്ങാട് ദേശീയപാതയിൽ പുല്ലൂരിലാണ് നിയമപ്രകാരം ടോൾഗേറ്റ് സ്ഥാപിക്കേണ്ടത്.

ചെർക്കള - നീലേശ്വരം റോഡ് നിർമ്മാണം ഏറ്റെടുത്ത മേഘ കൺസ്ട്രക്ഷൻ കമ്പനി പ്രവൃത്തികൾ സമയബന്ധിതമായി പൂർത്തിയാക്കാത്തതാണ് ഇപ്പോഴത്തെ പ്രതിസന്ധിക്ക് കാരണം. നിർമ്മാണം പൂർത്തിയായ തലപ്പാടി - ചെങ്കള പാത ഉടൻ തുറന്നുകൊടുക്കുന്നതിന് മുന്നോടിയായി താൽക്കാലിക ടോൾഗേറ്റ് എന്ന പേരിൽ ജനങ്ങൾക്ക് അധിക സാമ്പത്തിക ബാധ്യത നൽകാനാണ് നിർമ്മാണ കമ്പനിയുടെ ശ്രമം. ഇത് ഉദുമ, കാസർകോട്, മഞ്ചേശ്വരം മണ്ഡലങ്ങളിലെ അന്തർ സംസ്ഥാന യാത്രക്കാർക്ക് ഇരട്ട പ്രഹരമാകും. കാസർകോട് നിന്ന് മംഗളൂരുവിലേക്ക് പോകുന്നവർക്ക് വലിയ തുക ടോൾ ഫീസായി നൽകേണ്ടി വരും.

ടോൾഗേറ്റിനെതിരെ ആക്ഷൻ കമ്മിറ്റിയുടെ നേതൃത്വത്തിൽ ജനപ്രതിനിധികളടക്കം രംഗത്ത് വന്നതോടെ നിർമ്മാണം താൽക്കാലികമായി നിർത്തിവെച്ചിരുന്നു. എന്നാൽ വീണ്ടും പൊലീസ് സഹായം തേടിയതോടെ ജില്ലാ കളക്ടർ ജനപ്രതിനിധികളുടെയും റോഡ് നിർമ്മാണ കമ്പനിയുടെയും അടിയന്തര യോഗം ഈ മാസം 19 ന് കളക്ട്രേറ്റിൽ വിളിച്ചു ചേർത്തിട്ടുണ്ട്.

രാജ് മോഹൻ ഉണ്ണിത്താൻ എംപി, എംഎൽഎമാരായ എ കെ എം അഷറഫ്, എൻ എ നെല്ലിക്കുന്ന്, സി എച്ച് കുഞ്ഞമ്പു തുടങ്ങിയ ജനപ്രതിനിധികൾ യോഗത്തിൽ പങ്കെടുക്കും. എന്നാൽ നിലവിലുള്ള നിയമങ്ങൾ ലംഘിച്ച് ടോൾഗേറ്റ് സ്ഥാപിക്കുന്നതിനെ എംപി അടക്കമുള്ളവർ ശക്തമായി എതിർക്കുന്നുണ്ട്.

ഈ ടോൾഗേറ്റ് വിഷയത്തിൽ നിങ്ങളുടെ അഭിപ്രായങ്ങൾ പങ്കുവെക്കുക. കൂടുതൽ പേരിലേക്ക് ഈ വാർത്ത എത്തിക്കാൻ ഷെയർ ചെയ്യുക.

Article Summary: National Highway Authority's renewed attempt to construct a tollgate at Arikkady, Kumbala, despite being only 22 km from Talapady and violating the 60 km rule, has triggered strong protests. The construction company sought police help, leading to an emergency meeting of representatives on the 19th.

 #KumbalaTollgate, #Protest, #NationalHighway, #Kasargod, #TollPlaza, #PublicResistance