കുമ്പള ടോൾ പ്ലാസ നിർമ്മാണം താൽക്കാലികമായി നിർത്തിവെച്ചു; കലക്ടർ വിളിച്ചു ചേർത്ത ജനപ്രതിനിധികളുടെ യോഗത്തിൽ തീരുമാനം

കാസർകോട്: (KasargodVartha) തലപ്പാടി മുതൽ കാസർകോട് വരെയുള്ള ആറുവരി ദേശീയപാതയുടെ ഭാഗമായി കുമ്പളയിൽ നിർമ്മിക്കാൻ തീരുമാനിച്ചിരുന്ന ടോൾ പ്ലാസയുടെ നിർമ്മാണം താൽക്കാലികമായി നിർത്തിവെക്കാൻ ജില്ലാ കളക്ടർ വിളിച്ചു ചേർത്ത ജനപ്രതിനിധികളുടെ യോഗത്തിൽ ധാരണയായി.

കേന്ദ്രമന്ത്രിയെയും മുഖ്യമന്ത്രിയെയും നേരിട്ട് കണ്ട് ചർച്ച നടത്തി ഉചിതമായ തീരുമാനമെടുക്കാൻ ജനപ്രതിനിധികൾ അഭ്യർത്ഥിക്കും. അതുവരെ ടോൾ പ്ലാസ നിർമ്മാണം നിർത്തിവയ്ക്കാൻ ജില്ലാ കളക്ടറും ബന്ധപ്പെട്ടവരും തമ്മിൽ നടന്ന ചർച്ചയിൽ തീരുമാനമായി.

ജില്ലാ കളക്ടർ കെ. ഇമ്പശേഖരന്റെ അധ്യക്ഷതയിൽ കളക്ടറേറ്റിൽ രാവിലെ ചേർന്ന യോഗത്തിലാണ് ഈ തീരുമാനം എടുത്തത്. യോഗത്തില്‍ രാജ് മോഹന്‍ ഉണ്ണിത്താന്‍ എംപിയും എംഎല്‍എ മാരായ എന്‍എ നെല്ലിക്കുന്ന്, സിഎച്ച് കുഞ്ഞമ്പു, എകെഎം അഷ്‌റഫ്, എന്നിവരും  ദേശീയപാത അതോറിറ്റി പ്രൊജക്റ്റ് ഡയറക്ടര്‍ ഉമേഷ് കെ ഗാറും പങ്കെടുത്തു. 

സംസ്ഥാന സർക്കാരുമായി വിഷയം ചർച്ച ചെയ്യുന്നതിനായി ജില്ലയിലെ അഞ്ച് എംഎൽഎമാരും ഈ ആഴ്ച തന്നെ തിരുവനന്തപുരത്ത് എത്തി മുഖ്യമന്ത്രിയെ കാണും. എംപി രാജ്‌മോഹൻ ഉണ്ണിത്താൻ ചൊവ്വാഴ്ച ഡൽഹിക്ക് പോകും. കേന്ദ്ര ഉപരിതല ഗതാഗത മന്ത്രി നിധിൻ ഗഡ്ഗരിയുമായി നേരിട്ട് കണ്ട് എംപി വിഷയം ചർച്ച ചെയ്യും. ചർച്ചയിൽ ഉണ്ടാകുന്ന തീരുമാനത്തിന്റെ അടിസ്ഥാനത്തിലായിരിക്കും ടോൾ പ്ലാസയുടെ കാര്യത്തിൽ തുടർ നടപടി ഉണ്ടാകുക.

കുമ്പള ആരിക്കാടിയിലാണ് ടോൾഗേറ്റ് നിർമ്മാണത്തിന് കരാർ കമ്പനി ശ്രമം തുടങ്ങിയത്. തലപ്പാടിയിൽ നിന്ന് 22 കിലോമീറ്റർ മാത്രം അകലെയുള്ള ആരിക്കാടിയിൽ താൽക്കാലിക ടോൾ പ്ലാസ നിർമ്മിക്കാനാണ് തീരുമാനം. നേരത്തെ ടോൾ ഗേറ്റിനെതിരെ വ്യാപക പ്രതിഷേധം ഉയർന്നതിനെ തുടർന്ന് കരാർ കമ്പനി നിർമ്മാണം നിർത്തിവച്ചിരുന്നു.

ദേശീയപാതയിൽ 60 കിലോമീറ്ററിൽ ടോൾഗേറ്റ് നിർമ്മിക്കാനാണ് കേന്ദ്ര റോഡ്സ് വിഭാഗത്തിന്റെ അനുമതി. എന്നാൽ ഈ മാനദണ്ഡങ്ങൾ ലംഘിച്ച് ആരിക്കാടിയിൽ ടോൾഗേറ്റ് നിർമ്മിച്ച് യാത്രക്കാരെ സാമ്പത്തികമായി ബുദ്ധിമുട്ടിക്കാനാണ് ശ്രമമെന്നാണ് ആരോപണം.

തലപ്പാടി - കാഞ്ഞങ്ങാട് ദേശീയപാതയിലെ പുല്ലൂരിലാണ് നിയമപ്രകാരം ടോൾഗേറ്റ് വരേണ്ടത്. എന്നാൽ ചെർക്കള - നീലേശ്വരം റോഡ് നിർമ്മാണം ഏറ്റെടുത്ത മേഘ കൺസ്ട്രക്ഷൻ കമ്പനി യഥാസമയം റോഡ് നിർമ്മാണം പൂർത്തിയാക്കാത്തതിനെ തുടർന്ന് നിലവിൽ നിർമ്മാണം പൂർത്തിയായ തലപ്പാടി - ചെങ്കള ദേശീയ പാത ഉടൻ തുറന്നുകൊടുക്കുന്നതിന് മുന്നോടിയായാണ് താൽക്കാലിക ടോൾഗേറ്റ് എന്ന പേരിൽ നിർമ്മാണം നടത്തുന്നത്. ഇത് ഉദുമ, കാസർകോട്, മഞ്ചേശ്വരം മണ്ഡലങ്ങളിലെ അന്തർ സംസ്ഥാന യാത്രക്കാർക്ക് ഇരട്ട പ്രഹരമാകും. കാസർകോട് നിന്ന് മംഗളൂരിലേക്ക് പോകുന്നവർക്ക് വലിയ തുക ടോൾ ഫീസായി നൽകേണ്ടിവരും.

ആക്ഷൻ കമ്മിറ്റിയുടെ നേതൃത്വത്തിൽ ജനപ്രതിനിധികളടക്കം പ്രതിഷേധവുമായി രംഗത്ത് വന്നതോടെ ടോൾഗേറ്റ് നിർമ്മാണം താൽക്കാലികമായി നിർത്തിവച്ചിരുന്നു. എന്നാൽ ടോൾഗേറ്റ് നിർമ്മാണത്തിന് നിർമ്മാണ കമ്പനി പോലീസ് സഹായം തേടിയതോടെയാണ് ജില്ലാ കളക്ടർ ജനപ്രതിനിധികളുടെയും റോഡ് നിർമ്മാണ കമ്പനിയുടെയും യോഗം വിളിച്ചു ചേർത്തത്.

കുമ്പള ടോൾ പ്ലാസ നിർമ്മാണം നിർത്തിവെച്ചതിനെക്കുറിച്ചുള്ള ഈ വാർത്ത ഷെയർ ചെയ്യുക. ടോൾ പ്ലാസ നിർമ്മാണത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: Construction of the proposed toll plaza at Kumbala on the Thalappady-Kasaragod National Highway has been temporarily halted following a meeting convened by the District Collector with elected representatives. They will seek discussions with the central and state governments.

#KumbalaTollPlaza, #Kasaragod, #KeralaNews, #TollGateProtest, #NationalHighway, #PublicOpposition