കുമ്പള ഇൻസ്പെക്ടറുടെ സ്ഥലം മാറ്റം; ജനരോഷം ആളിക്കത്തുന്നു, കാരണം തേടി നാട്ടുകാർ

കുമ്പള: (KasargodVartha) കുമ്പള സ്റ്റേഷൻ പരിധിയിൽ സമാധാനം ഉറപ്പാക്കിയ ഇൻസ്പെക്ടർ കെ.പി. വിനോദ് കുമാറിനെ വയനാട്ടിലെ തിരുനെല്ലിയിലേക്ക് സ്ഥലം മാറ്റിയ നടപടി ജനങ്ങളിൽ വ്യാപക പ്രതിഷേധത്തിന് കാരണമായി. ഒരു വർഷം പോലും തികയും മുൻപേയുള്ള ഈ സ്ഥലം മാറ്റം ആരുടെ സമ്മർദ്ദത്തിന് വഴങ്ങിയാണെന്ന് നാട്ടുകാർ ചോദ്യം ചെയ്യുന്നു.

മയക്കുമരുന്ന്, മണൽ മാഫിയകൾക്കെതിരെയും ഗുണ്ടാസംഘങ്ങൾക്കെതിരെയും ശക്തമായ നടപടികൾ സ്വീകരിച്ച ഉദ്യോഗസ്ഥനാണ് കെ.പി. വിനോദ് കുമാർ. കാസർകോട് ജില്ലക്കാരനായ ഇദ്ദേഹത്തെ ജില്ലയ്ക്കകത്ത് നിയമിക്കാതെ ദൂരേക്ക് മാറ്റിയത് പ്രതികാര നടപടിയാണോ എന്നും പ്രദേശവാസികൾ സംശയിക്കുന്നു. ഒമ്പത് മാസം മുൻപാണ് വിനോദ് കുമാർ കുമ്പളയിൽ ഇൻസ്പെക്ടറായി ചുമതലയേറ്റത്.

കുമ്പളയിലെ മൊഗ്രാൽ, നാങ്കി, ഒളയം, പേരാൽ, ബംബ്രാണ, ആരിക്കാടി, കെ.പി. നഗർ എന്നിവിടങ്ങളിൽ ശക്തമായിരുന്ന അനധികൃത മണൽക്കടവുകൾ തകർത്ത് മണൽ മാഫിയയെ നിലയ്ക്ക് നിർത്താൻ ഇൻസ്പെക്ടർക്ക് കഴിഞ്ഞിരുന്നു. ഈ കർശന നടപടികൾ ചിലരെ പ്രകോപിപ്പിച്ചിരുന്നു. ലഹരി മാഫിയകൾക്കെതിരെയും സ്കൂളുകളിൽ റാഗിംഗിന്റെ പേരിൽ അതിക്രമം നടത്തിയ വിദ്യാർത്ഥികൾക്കെതിരെയും ഇദ്ദേഹം ശക്തമായ താക്കീതുകളും നടപടികളും സ്വീകരിച്ചു. 

ക്രിമിനൽ കേസുകളിൽ ഉൾപ്പെട്ട പ്രതികൾ വിദ്യാർത്ഥികളെ മർദ്ദിച്ച സംഭവങ്ങളിലും നിയമപരമായ നടപടികൾ സ്വീകരിക്കാൻ അദ്ദേഹം മടിച്ചില്ല. ചില രാഷ്ട്രീയക്കാരുടെ സമ്മർദ്ദങ്ങൾക്ക് വഴങ്ങാത്തതും സ്ഥലം മാറ്റത്തിന് കാരണമായി പറയുന്നുണ്ട്.

നേരത്തെ ഇറങ്ങിയ സ്ഥലം മാറ്റ ഉത്തരവിന്റെ അടിസ്ഥാനത്തിലാണ് ഈ നടപടിയെന്നാണ് ഉന്നത ഉദ്യോഗസ്ഥർ വിശദീകരിക്കുന്നത്. നിലമ്പൂർ തിരഞ്ഞെടുപ്പിന്റെ പശ്ചാത്തലത്തിലാണ് സ്ഥലം മാറ്റം പെട്ടെന്ന് നടപ്പാക്കേണ്ടി വന്നതെന്നും അവർ പറയുന്നു. ഏതാനും ഇൻസ്പെക്ടർമാർക്ക് സ്ഥാനക്കയറ്റം ലഭിക്കാനുണ്ടെന്നും, ആ ഉത്തരവ് കൂടി വരുന്നതോടെ മികച്ച ഉദ്യോഗസ്ഥനായ വിനോദ് കുമാറിനെ ജില്ലയിലേക്ക് തന്നെ തിരികെ നിയമിക്കാൻ സാധ്യതയുണ്ടെന്നും ചൂണ്ടിക്കാണിക്കപ്പെടുന്നുണ്ട്.

കുമ്പള ഇൻസ്പെക്ടറുടെ സ്ഥലം മാറ്റത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക, 

Article Summary (English): Kumbala Inspector's transfer to Wayanad sparks public outrage.

#Kumbala, #PoliceTransfer, #PublicProtest, #KeralaPolice, #Kasaragod, #LawAndOrder