ഗോത്ര ജനതയുടെ അതിജീവനത്തിന് കുടുംബശ്രീയുടെ കൈത്താങ്ങ്; സംസ്ഥാനതല ആഘോഷം കുറ്റിക്കോലിൽ

കാസർകോട്: (KasargodVartha) കുടുംബശ്രീയുടെ അന്താരാഷ്ട്ര ദിനാഘോഷവും 'ജനഗൽസ' (ജനങ്ങളുടെ ആഘോഷം) എന്ന പദ്ധതിയുടെ സംസ്ഥാനതല ഉദ്ഘാടനവും ഓഗസ്റ്റ് 8, 9 തീയതികളിൽ കുറ്റിക്കോലിൽ നടക്കുമെന്ന് കുടുംബശ്രീ അധികൃതർ വാർത്താസമ്മേളനത്തിൽ അറിയിച്ചു. തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷ് ഓൺലൈനായി പരിപാടികൾ ഉദ്ഘാടനം ചെയ്യും.

ഈ വർഷത്തെ തദ്ദേശീയ ജനതയുടെ അന്താരാഷ്ട്ര ദിനാചരണവും ജനഗൽസ പ്രോജക്ടിന്റെ ഉദ്ഘാടനവും, കുടുംബശ്രീ പട്ടികവർഗ അനിമേറ്റർ/ബ്രിഡ്ജ് കോഴ്‌സ് മെന്റർമാരുടെ മേഖലാതല സംഗമവുമാണ് കുറ്റിക്കോലിൽ സംഘടിപ്പിക്കുന്നത്.

ആഗസ്റ്റ് 8-ന് രാവിലെ 10 മണിക്ക് തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷ് ഓൺലൈനിലൂടെ ഉദ്ഘാടനം നിർവഹിക്കും. ഉദുമ എം.എൽ.എ. സി.എച്ച്. കുഞ്ഞമ്പു അധ്യക്ഷത വഹിക്കും. രാജ്‌മോഹൻ ഉണ്ണിത്താൻ എം.പി, എം.എൽ.എമാരായ എ.കെ.എം. അഷറഫ്, എൻ.എ. നെല്ലിക്കുന്ന്, ഇ. ചന്ദ്രശേഖരൻ, ജില്ലാ കളക്ടർ കെ. ഇമ്പശേഖർ എന്നിവർ മുഖ്യാതിഥികളാകും.

കുടുംബശ്രീ എക്‌സിക്യൂട്ടീവ് ഡയറക്ടർ എച്ച്. ദിനേശൻ ആമുഖപ്രഭാഷണവും, സംസ്ഥാന പ്രോഗ്രാം ഓഫീസർ ഡോ. ബി. ശ്രീജിത്ത് പദ്ധതി വിശദീകരണവും നടത്തും. കാസർകോട് ജില്ലയിലെ ആറ് ബ്ലോക്ക് പഞ്ചായത്ത് പ്രസിഡന്റുമാരും കാറഡുക്ക ബ്ലോക്കിൽപ്പെട്ട പഞ്ചായത്ത് പ്രസിഡന്റുമാരും ആശംസകൾ അറിയിക്കും. 

തുടർന്ന് ഗോത്രകലയായ മംഗലം കളിയുടെ അവതരണം നടക്കും. ഉച്ചയ്ക്ക് രണ്ട് മണിക്ക് തദ്ദേശീയ വിഭാഗത്തിലെ കവികളായ ശ്രീനിവാസ് നായിക്ക്, ധന്യ വേങ്ങച്ചേരി, പ്രകാശൻ ചെന്തളം എന്നിവർ കവിതകൾ അവതരിപ്പിക്കും. മൂന്ന് മണിക്ക് വിവിധ തദ്ദേശീയ മേഖലകളിലെ നൂതന പ്രവർത്തനങ്ങളെക്കുറിച്ചുള്ള അവതരണങ്ങൾ നടക്കും. 

അഞ്ച് മണിക്ക് 'തദ്ദേശീയ മേഖലയിലെ കുടുംബശ്രീ ഇടപെടലുകൾ - വെല്ലുവിളികൾ, തുടർപ്രവർത്തനങ്ങൾ' എന്ന വിഷയത്തിൽ ഓപ്പൺ ഫോറം സംഘടിപ്പിക്കും. 6 മണിക്ക് ബാലസഭ ടീമിന്റെ യക്ഷഗാനവും, 8.30-ന് മദുറു അമ്മ കലാസമിതിയുടെ കൊട്ടും പാട്ടും ഉണ്ടാകും.

രണ്ടാം ദിവസം (ആഗസ്റ്റ് 9)

രാവിലെ 9.30-ന് തദ്ദേശീയ കലാരൂപങ്ങൾ അവതരിപ്പിച്ചുകൊണ്ട് 'ജനഗൽസ' ആരംഭിക്കും. പരിപാടിയുടെ സംസ്ഥാനതല ഉദ്ഘാടനം തൃക്കരിപ്പൂർ എം.എൽ.എ. എം. രാജഗോപാലൻ നിർവഹിക്കും. കുറ്റിക്കോൽ ഗ്രാമപഞ്ചായത്ത് പ്രസിഡന്റ് മുരളി പയ്യങ്ങാനം അധ്യക്ഷനാകും. 

ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണൻ മുഖ്യാതിഥിയാകും. കുടുംബശ്രീ എക്‌സിക്യൂട്ടീവ് ഡയറക്ടർ എച്ച്. ദിനേശൻ തദ്ദേശീയ ദിന സന്ദേശം അവതരിപ്പിക്കും. തുടർന്ന് കുടുംബശ്രീ കൊറഗ സ്പെഷ്യൽ പ്രോജക്ടിന് കീഴിൽ പ്രസിദ്ധീകരിക്കുന്ന 'ലിറ്റിൽ പബ്ലിക്കേഷൻസിന്റെ' ലോഗോ പ്രകാശനം ചെയ്യും.

സംസ്ഥാനത്തിന്റെ വിവിധ ജില്ലകളിൽനിന്നായി തിരഞ്ഞെടുക്കപ്പെട്ട ആയിരത്തോളം കുടുംബശ്രീ പ്രവർത്തകരുടെ സംഗമവും നടക്കും. ഇതിൽ തദ്ദേശീയ മേഖലയിലെ നൂതന കാൽവെപ്പുകൾ എന്ന വിഷയത്തിൽ ക്ലാസുകളും സംവാദങ്ങളും ചർച്ചകളും നടക്കും. ഗോത്ര പ്രതിഭകളായ ഫോക് ലോർ പുരസ്‌കാര ജേതാക്കളുടെ സംഗമവും സംഘടിപ്പിക്കുന്നുണ്ട്.

വൈകുന്നേരം മൂന്ന് മണിക്ക് നടക്കുന്ന സമാപന സമ്മേളനം ഉദുമ എം.എൽ.എ. സി.എച്ച്. കുഞ്ഞമ്പു ഉദ്ഘാടനം ചെയ്യും. വിവിധ ഗോത്രവിഭാഗങ്ങളിൽ നിന്നുള്ള 70 വയസ്സിനു മുകളിൽ പ്രായമുള്ള 50 ഊരുമൂപ്പൻമാരെ ചടങ്ങിൽ ആദരിക്കും. 

ഫോക് ലോർ പുരസ്‌കാര ജേതാക്കളുടെ സംഗമവും ഇതിന്റെ ഭാഗമായി നടക്കും. ബേഡഡുക്ക ഗ്രാമപഞ്ചായത്ത് പ്രസിഡന്റ് ധന്യ എം. അധ്യക്ഷത വഹിക്കും. എച്ച്. ദിനേശൻ മുഖ്യാതിഥിയാകും.

വാർത്താസമ്മേളനത്തിൽ ഗ്രാമപഞ്ചായത്ത് പ്രസിഡന്റ് മുരളി പയ്യങ്ങാനം, സി.ഡി.എസ്. ചെയർപേഴ്‌സൺ റീന സി., ജില്ലാ മിഷൻ കോർഡിനേറ്റർ രതീഷ് കുമാർ, എ.ഡി.എം.സി. കിഷോർ കുമാർ കെ.എം., പബ്ലിക് റിലേഷൻ ഓഫീസർ അമ്പിളി കെ. എന്നിവർ പങ്കെടുത്തു.

കുടുംബശ്രീയുടെ ഈ പുതിയ പദ്ധതിയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Kudumbashree tribal welfare project and day to be celebrated.

#Kudumbashree #Janagals #TribalWelfare #Kasaragod #KeralaGovernment #Empowerment