റെക്കോർഡ് വരുമാനത്തിന്റെ തിളക്കത്തിൽ കെഎസ്ആർടിസി; കാസർകോട്ട് ദുരിതയാത്രയിൽ വിദ്യാർത്ഥികളും പൊതുജനങ്ങളും; ചന്ദ്രഗിരി, മംഗ്ളൂരു റൂട്ടുകളിൽ രാത്രിയായാൽ 'കർഫ്യൂ'

കാസർകോട്: (KasargodVartha) സംസ്ഥാനത്തെ പൊതുഗതാഗത സംവിധാനമായ കെഎസ്ആർടിസി 13.01 കോടി രൂപയുടെ റെക്കോർഡ് വരുമാനം നേടി ചരിത്രം സൃഷ്ടിച്ചെന്ന് മുഖ്യമന്ത്രി പിണറായി വിജയൻ അവകാശപ്പെടുമ്പോഴും, വടക്കൻ കേരളത്തിലെ യാത്രാദുരിതം കാണാതെ അധികൃതർ കണ്ണടയ്ക്കുന്നു. കാസർകോട് നഗരത്തോട് ചേർന്നുകിടക്കുന്ന ചന്ദ്രഗിരി, കളനാട്, പാലക്കുന്ന് മേഖലകളിലെ യാത്രക്കാരാണ് വർഷങ്ങളായി കെഎസ്ആർടിസിയുടെ അവഗണനയിൽ വലയുന്നത്.

റെക്കോർഡ് നേട്ടവും ഗ്രൗണ്ട് റിയാലിറ്റിയും 

നവകേരള നിർമ്മിതിയുടെ ഭാഗമായി കെഎസ്ആർടിസി ജനുവരി 5-ന് 13.01 കോടി രൂപ വരുമാനം നേടിയതായും, 83 ഡിപ്പോകൾ ലാഭത്തിലാണെന്നും മുഖ്യമന്ത്രിയുടെ ഔദ്യോഗിക ഫേസ്ബുക്ക് പേജിൽ കുറിച്ചിരുന്നു. ആധുനികവൽക്കരണവും പുതിയ ബസ്സുകളും വന്നതോടെ ജനങ്ങൾക്ക് വിശ്വാസ്യത വർദ്ധിച്ചെന്നും പോസ്റ്റിൽ പറയുന്നു. എന്നാൽ, കാസർകോട് ജില്ലയിലെ സ്ഥിതി ഇതിന് വിപരീതമാണ്.

ദേശസാൽകൃത റൂട്ടിലെ ദുരിതം 

കാസർകോട് നിന്നും ചന്ദ്രഗിരി വഴി കളനാട് വരെയുയുള്ള റൂട്ട് ദേശസാൽകൃത റൂട്ടാണ്. അതിനാൽ ഇവിടെ സ്വകാര്യ ബസ്സുകൾക്ക് സർവീസ് നടത്താൻ അനുമതിയില്ല. ഇത് മുതലെടുക്കുന്ന കെഎസ്ആർടിസി, ആവശ്യത്തിന് സർവീസുകൾ നടത്തുന്നില്ലെന്നതാണ് പ്രധാന പരാതി. രാവിലെയും വൈകുന്നേരവും സ്കൂൾ സമയങ്ങളിൽ ബസ്സുകൾ ഉണ്ടെങ്കിലും അവ കുത്തിനിറച്ചാണ് വരുന്നത്. സ്റ്റോപ്പുകളിൽ കാത്തുനിൽക്കുന്ന വിദ്യാർത്ഥികളെ കയറ്റാൻ പോലും ബസ്സുകൾ നിർത്താറില്ല. സ്വകാര്യ ബസ്സുകൾ ഇല്ലാത്തതിനാൽ മണിക്കൂറുകളോളം കാത്തുനിൽക്കേണ്ട ഗതികേടിലാണ് പലപ്പോഴും വിദ്യാർത്ഥികൾ.

രാത്രി 9 കഴിഞ്ഞാൽ നഗരം നിശ്ചലം 

കാസർകോട് നഗരം വികസനത്തിന്റെ പാതയിലാണ്. പുതിയ കെട്ടിടങ്ങളും ബിസിനസ്സ് സ്ഥാപനങ്ങളും ഉയരുന്നുണ്ടെങ്കിലും, ഗതാഗത സൗകര്യമില്ലാത്തത് വലിയ തിരിച്ചടിയാകുന്നു. രാത്രി ഒൻപത് മണി കഴിഞ്ഞാൽ ചന്ദ്രഗിരി റൂട്ടിലൂടെയോ മംഗ്ളൂർ ഭാഗത്തേക്കോ, പ്രാദേശിക സ്ഥലങ്ങളിലേക്കോ ഒറ്റ ബസ്സ് പോലും സർവീസ് നടത്തുന്നില്ല. വൈകി ജോലി കഴിഞ്ഞ് ഇറങ്ങുന്നവരും, ആശുപത്രി ആവശ്യങ്ങൾക്ക് പോകുന്നവരും ഇതോടെ പെരുവഴിയിലാകുന്നു. രാത്രി സർവീസുകൾ ഇല്ലാത്തത് നഗരത്തിലെ രാത്രികാല വ്യാപാരത്തെയും സാരമായി ബാധിക്കുന്നുണ്ട്.

മടങ്ങിവരാത്ത വണ്ടികൾ 

കോവിഡ് ലോക്ക്ഡൗണിന് മുൻപ് കാസർകോട് ഡിപ്പോയിൽ നിന്നും ദേളി വഴി പാലക്കുന്നിലേക്ക് സർവീസ് നടത്തിയിരുന്ന കെഎസ്ആർടിസി ബസ്സുകൾ ലോക്ക്ഡൗണിന് ശേഷം ഇതുവരെ പുനരാരംഭിച്ചിട്ടില്ല. ഈ റൂട്ടിലെ യാത്രക്കാർ വർഷങ്ങളായി ദുരിതത്തിലാണ്. കൂടാതെ, നിലവിൽ സർവീസ് നടത്തുന്ന ബസ്സുകളിൽ ഭൂരിഭാഗവും കാലപ്പഴക്കം ചെന്നവയും സുരക്ഷാ മാനദണ്ഡങ്ങൾ പാലിക്കാത്തവയുമാണെന്നും യാത്രക്കാർ പരാതിപ്പെടുന്നു.

ലാഭക്കണക്കുകൾ നിരത്തുമ്പോൾ, അടിസ്ഥാന സൗകര്യങ്ങൾ ലഭിക്കാത്ത സാധാരണക്കാരുടെ ഈ ദുരിതങ്ങൾക്ക് കൂടി സർക്കാർ മറുപടി പറയേണ്ടതുണ്ട്. കാസർകോട്ടെ യാത്രാക്ലേശത്തിന് അടിയന്തര പരിഹാരം കാണണമെന്നാണ് നാട്ടുകാരുടെ ആവശ്യം.

മുഖ്യമന്ത്രിയുടെ ഫേസ്ബുക്ക് പോസ്റ്റിൻ്റെ പൂർണരൂപം:

നവകേരള നിർമ്മിതിയുടെ പാതയിൽ മറ്റൊരു ഉജ്ജ്വലമായ നാഴികക്കല്ല് കൂടി പിന്നിട്ടിരിക്കുകയാണ് നമ്മുടെ കെഎസ്ആർടിസി. കേരളത്തിൻ്റെ പൊതുഗതാഗത സംവിധാനം തകരുകയാണെന്ന് പ്രചരിപ്പിച്ചവർക്കുള്ള ശക്തമായ മറുപടിയാണ് കെഎസ്ആർടിസി കൈവരിച്ച സർവ്വകാല പ്രതിദിന റെക്കോർഡ് വരുമാനം.
ജനുവരി 5, 2026-ൽ കെഎസ്ആർടിസി നേടിയ വരുമാനം 13.01 കോടി രൂപയാണ്. ഇതിൽ ടിക്കറ്റ് വരുമാനം മാത്രം 12.18 കോടി രൂപ എന്ന ചരിത്ര നേട്ടത്തിൽ എത്തിയിരിക്കുന്നു. 2025 സെപ്റ്റംബർ എട്ടിന് കൈവരിച്ച 10.19 കോടി രൂപ എന്ന  റെക്കോർഡാണ് ഇപ്പോൾ മറികടന്നിരിക്കുന്നത്. ടിക്കറ്റിതര വരുമാനമായി 83.5 ലക്ഷം രൂപയും ഇതിനോടൊപ്പം സമാഹരിക്കാൻ സാധിച്ചു.

ഈ വിജയത്തിന് പിന്നിൽ കൃത്യമായ ചില കാരണങ്ങളുണ്ട്:
🌟   പൊതുമേഖലയുടെ സംരക്ഷണം : രാജ്യമെമ്പാടും പൊതുമേഖലാ സ്ഥാപനങ്ങൾ സ്വകാര്യമേഖലയ്ക്ക് വിറ്റഴിക്കുമ്പോൾ, അവയെ ചേർത്തുപിടിച്ച് ലാഭകരമാക്കുക എന്ന ബദൽ നയമാണ് സംസ്ഥാന സർക്കാർ ഉയർത്തിപ്പിടിക്കുന്നത്.
🌟   ചിട്ടയായ പ്രവർത്തനം : കെഎസ്ആർടിസിയുടെ 83 ഡിപ്പോകളും നിലവിൽ പ്രവർത്തന ലാഭത്തിലാണ് എന്നത് അഭിമാനകരമാണ്. നിശ്ചയിച്ച ടാർഗറ്റുകൾ കൃത്യമായി പൂർത്തിയാക്കാൻ ഡിപ്പോകൾക്ക് സാധിച്ചു.
🌟   ആധുനികവൽക്കരണം: നൂതന സാങ്കേതിക വിദ്യകൾ പ്രയോജനപ്പെടുത്തി നടപ്പിലാക്കിയ കാലോചിതമായ പരിഷ്കാരങ്ങളും, പുതിയ ബസുകളുടെ വരവും, ഓഫ്-റോഡ് ബസുകളുടെ എണ്ണം കുറച്ചതും ജനങ്ങൾക്ക് കെഎസ്ആർടിസിയിലുള്ള വിശ്വാസ്യത വർദ്ധിപ്പിച്ചു.
🌟   ഏകോപിത പരിശ്രമം: സർക്കാരിൻ്റെ പുരോഗമനപരമായ ആശയങ്ങളും ജീവനക്കാരുടെയും ഓഫീസർമാരുടെയും അശ്രാന്തമായ അധ്വാനവുമാണ് ഈ നേട്ടത്തിന് അടിത്തറ പാകിയത്.
അഴിമതിരഹിതവും ജനപക്ഷത്തു നിൽക്കുന്നതുമായ വികസന മാതൃകയുമായി സർക്കാർ മുന്നോട്ടു പോവുകയാണ്. കെഎസ്ആർടിസിയെ പൂർണ്ണമായും സ്വയംപര്യാപ്തമാക്കുക എന്ന ലക്ഷ്യത്തിലേക്ക് നമ്മൾ അതിവേഗം അടുക്കുന്നു. ഈ നേട്ടത്തിനായി പ്രയത്നിച്ച മുഴുവൻ ജീവനക്കാരെയും അഭിനന്ദിക്കുന്നു. പൊതുഗതാഗത സംവിധാനത്തെ നെഞ്ചേറ്റുന്ന കേരളത്തിലെ ജനങ്ങളുടെ നേട്ടം കൂടിയാണിത്..
നമുക്ക് ഒരുമിച്ച് മുന്നേറാം, നവകേരളത്തിനായി.

കാസർകോട്ടെ ഈ യാത്രാദുരിതം അധികൃതരുടെ ശ്രദ്ധയിൽപ്പെടുത്താൻ വാർത്ത പങ്കുവെക്കൂ. 

Article Summary: Kasaragod faces severe KSRTC shortages in nationalized routes despite record revenue claims by the government.

#KSRTC #KasaragodNews #TravelHardship #PinarayiVijayan #KeralaTransport #PublicDemand