കെഎസ്ആർടിസി ലാഭത്തെ പറ്റി മന്ത്രി പറയുമ്പോഴും ഡിപ്പോകളിൽ ഡ്രൈവർമാരില്ലാതെ സർവീസ് മുടക്കം പതിവ്

കാസർകോട്: (KasargodVartha) താൻ മന്ത്രിയായതിനുശേഷം കെഎസ്ആർടിസിയിൽ വലിയ മാറ്റങ്ങൾ കൊണ്ടുവന്നുവെന്നും, മികച്ച വരുമാനമുണ്ടാക്കിയെന്നും മന്ത്രി ഗണേഷ് കുമാർ പറയുമ്പോഴും, കെഎസ്ആർടിസി ഡിപ്പോകളിൽ ഇപ്പോഴും ഡ്രൈവർമാരുടെ കുറവ് പരിഹരിക്കാത്തത് മൂലം സർവീസ് മുടക്കം പതിവാകുകയാണ്. ഇത് യാത്രക്കാർക്ക് യാത്രാക്ലേശത്തിന് ഇടയാക്കുകയും ചെയ്യുന്നു.

കാസർകോട്, കാഞ്ഞങ്ങാട് കെഎസ്ആർടിസി ഡിപ്പോകളിലായി 40-ഓളം ഡ്രൈവർമാരുടെ ഒഴിവാണ് നിലവിലുള്ളത്. സർവീസിൽനിന്ന് ഡ്രൈവർമാർ വിരമിച്ചാൽ പകരം നിയമനമില്ലാത്തതാണ് ഇതിന് പ്രധാന കാരണം. കഴിഞ്ഞ 12 വർഷമായി പിഎസ് സി വഴി നിയമനം നടക്കുന്നില്ലെന്നും ജീവനക്കാർക്കിടയിൽ പരാതിയുണ്ട്.

കാസർകോട്, കാഞ്ഞങ്ങാട് ഡിപ്പോകളിൽ സ്ഥലംമാറ്റ ഉത്തരവുകളും നടപ്പിലാക്കുന്നില്ലെന്ന് ഡ്രൈവർമാർക്ക് പരാതിയുണ്ട്. മറ്റു ജില്ലകളിലെ ഡ്രൈവർമാരാണ് കാസർകോട് ജില്ലയിൽ ഏറെയുള്ളത്. അവർ സ്വന്തം നാട്ടിലേക്ക് സ്ഥലംമാറ്റത്തിനായി അപേക്ഷ നൽകുന്നുണ്ടെങ്കിലും അത് പരിഗണിക്കുന്നില്ലെന്നാണ് പ്രധാന ആക്ഷേപം.

ഡ്രൈവർമാരുടെ കുറവ് മൂലം മംഗലാപുരം-കണ്ണൂർ ഭാഗത്തേക്കുള്ള സർവീസുകളെയാണ് ഏറെ ബാധിക്കുന്നത്. സന്ധ്യയായാൽ ഈ റൂട്ടുകളിലെ യാത്രാദുരിതം യാത്രക്കാർ പ്രത്യക്ഷത്തിൽ അനുഭവിക്കുന്നുണ്ട്. എന്നാൽ, നിലവിൽ ഡ്രൈവർമാരുടെ ഒഴിവുള്ളപ്പോൾ പിന്നെ എങ്ങനെയാണ് സ്ഥലംമാറ്റ ഉത്തരവ് നടപ്പിലാക്കാൻ ആവുകയെന്ന് ഡിപ്പോ അധികൃതർ ചോദിക്കുന്നുമുണ്ട്.

ഇത്തരം പരാതികൾ നിലനിൽക്കുമ്പോഴാണ് മന്ത്രി ഗണേഷ് കുമാർ കെഎസ്ആർടിസി വഴി നിരവധി പദ്ധതികൾ പ്രഖ്യാപിക്കുന്നത്. ഒരുപാട് ബസ്സുകൾ പുതുതായി ഇറക്കുന്നുണ്ടെങ്കിലും ഡ്രൈവർമാരുടെ ഒഴിവുകൾ നികത്താൻ ട്രാൻസ്പോർട്ട് വകുപ്പിന് കഴിയുന്നില്ല. ഡ്രൈവർമാർ ഇല്ലാത്തതിന്റെ പേരിൽ സർവീസ് മുടങ്ങുന്നത് ജനങ്ങളെ കാര്യമായി ബാധിച്ചിട്ടുമുണ്ട്.

കെഎസ്ആർടിസിയിലെ ഡ്രൈവർ ക്ഷാമത്തെക്കുറിച്ചുള്ള നിങ്ങളുടെ അഭിപ്രായം എന്താണ്? വാർത്ത ഷെയർ ചെയ്യുക. 

Article Summary: KSRTC driver shortage in Kasaragod and Kanhangad leads to frequent service disruptions, contradicting Minister's profit claims.

#KSRTC #DriverShortage #Kasargod #GaneshKumar #ServiceDisruption #KeralaTransport