തോരാമഴയിൽ മുങ്ങി കൊപ്പളം; അഴിമുഖം തുറന്ന് യുവാക്കൾ രക്ഷകരായി

മൊഗ്രാൽ: (KasargodVartha) അധികാരികളുടെ അനാസ്ഥയിൽ മനംനൊന്ത്, കൊപ്പളം-നാങ്കി തീരദേശ ജനവാസ കേന്ദ്രങ്ങളിലെ രൂക്ഷമായ വെള്ളക്കെട്ടിന് ശമനം കണ്ടെത്താൻ ഒരുപറ്റം യുവാക്കൾ സ്വയം മുന്നിട്ടിറങ്ങി കൊപ്പളം അഴിമുഖം തുറന്നു. തിങ്കളാഴ്ച തോരാതെ പെയ്ത മഴയിൽ വീടുകളും റോഡുകളും വെള്ളത്തിൽ മുങ്ങിയതോടെയാണ് യുവാക്കൾ രണ്ടും കൽപ്പിച്ച് രംഗത്തിറങ്ങിയത്. ഇതോടെ വെള്ളം കടലിലേക്ക് ഒഴുകിത്തുടങ്ങുകയും മൊഗ്രാൽ കൊപ്പളം തീരപ്രദേശത്തെ വീടുകൾക്ക് ഭീഷണിയായിരുന്ന വെള്ളക്കെട്ടിന് നേരിയ ശമനം കൈവരുകയും ചെയ്തു.

എന്നാൽ, നാങ്കി കടപ്പുറത്ത് നിന്ന് കൊപ്പളം ഭാഗത്തേക്ക് വെള്ളം ശരിയായ രീതിയിൽ ഒഴുകിപ്പോകാത്തതിനാൽ നാങ്കി കടപ്പുറത്തെ വീടുകളിലെ വെള്ളക്കെട്ട് ഭീഷണി ഇപ്പോഴും പൂർണ്ണമായി ഒഴിഞ്ഞിട്ടില്ല. തിങ്കളാഴ്ച കൊപ്പളം അംഗൻവാടി കെട്ടിടം പോലും വെള്ളത്തിൽ മുങ്ങുമെന്ന അവസ്ഥയിലായിരുന്നു. തീരദേശ റോഡുകളിലും വെള്ളം കയറി ഗതാഗതം തടസ്സപ്പെട്ടു. നാങ്കി കടപ്പുറത്ത് ഏകദേശം 25 ഓളം വീടുകൾക്ക് ചുറ്റും ഇപ്പോഴും വെള്ളം കെട്ടിക്കിടക്കുകയാണ്. രൂക്ഷമായ കൊതുക് ശല്യവും ജലജന്യ രോഗങ്ങളെക്കുറിച്ചുള്ള ഭയവും ഈ കുടുംബങ്ങളെ അലട്ടുന്നുണ്ട്.

കഴിഞ്ഞ ഒന്നര പതിറ്റാണ്ടായി ഈ പ്രദേശത്തെ വെള്ളക്കെട്ടിന് ശാശ്വത പരിഹാരം ആവശ്യപ്പെട്ട് പ്രദേശവാസികൾ മുറവിളി കൂട്ടുന്നുണ്ട്. എന്നാൽ അധികൃതർ സന്ദർശനങ്ങളിൽ മാത്രം ഒതുങ്ങുന്നുവെന്നും കാര്യമായ നടപടികൾ സ്വീകരിക്കുന്നില്ലെന്നുമാണ് ഇവരുടെ പ്രധാന ആക്ഷേപം. തിങ്കളാഴ്ചയും റവന്യൂ വകുപ്പ് അധികൃതർ സംഭവസ്ഥലം സന്ദർശിച്ചിരുന്നുവെങ്കിലും ഫലപ്രദമായ ഇടപെടലുകൾ ഉണ്ടായിട്ടില്ല.

സാമൂഹിക പ്രവർത്തകൻ ജലീൽ കൊപ്പളത്തിന്റെ നേതൃത്വത്തിൽ ഷെഫീക്ക്, റൈമു, അഫ്സൽ, സനൂബ്, ഷാഹിദ്, ജാസിം, നിയാസ്, അജ്ജു, സൈഫ്, ചിമ്മു, റുഫൈദ്, സിറാജ്, ഉസ്മാൻ, ശമ്മാസ്, റാനു തുടങ്ങിയ യുവാക്കളാണ് തിങ്കളാഴ്ച അഴിമുഖം തുറന്ന് ഈ ജനകീയ മുന്നേറ്റത്തിന് നേതൃത്വം നൽകിയത്.
 

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക, 
 

Summary (English): Youth open the estuary to clear waterlogging in Koppalam after official negligence.
 

#KoppalamFloods, #YouthInitiative, #KeralaRains, #Waterlogging, #OfficialNegligence, #Mogral