തല്ലിക്കൊലകൾ സാക്ഷരകേരളത്തിലെത്തിയിട്ടും പൊതുസമൂഹം ചർച്ച ചെയ്യുന്നില്ല; ഫാസിസത്തിനെതിരെ പോരാട്ടം വേണമെന്ന് കെ കെ അബ്ദുൽ ജബ്ബാർ

കാസർകോട്: (KasargodVartha) സംഘ്പരിവാർ രാജ്യത്ത് നടത്തുന്ന കൊലപാതകങ്ങളെ ലഘൂകരിക്കുന്ന രീതിയിലുള്ള സാമൂഹിക പശ്ചാത്തലമാണ് നിലവിൽ ഇന്ത്യയിലുള്ളതെന്ന് എസ്ഡിപിഐ സംസ്ഥാന ജനറൽ സെക്രട്ടറി കെ കെ അബ്ദുൽ ജബ്ബാർ പറഞ്ഞു. 

ഉന്മാദ ദേശീയതയുടെ പേരിലാണ് സംഘ്പരിവാർ രാജ്യത്ത് മിക്ക കൊലപാതകങ്ങളും നടപ്പാക്കിയിട്ടുള്ളതെന്നും അദ്ദേഹം കൂട്ടിച്ചേർത്തു. കാസർകോട് എസ്ഡിപിഐ ജില്ലാ കമ്മിറ്റിയുടെ നേതൃത്വത്തിൽ സംഘടിപ്പിച്ച ശഹീദ് സൈനുൽ ആബിദ് അനുസ്മരണ പരിപാടി ഉദ്ഘാടനം ചെയ്യുകയായിരുന്നു അദ്ദേഹം.

രാജ്യത്തെ ജനാധിപത്യ സംവിധാനങ്ങളെയും നിയമസംവിധാനങ്ങളെയും സംഘ്പരിവാർ ഫാസിസം അട്ടിമറിച്ചുകൊണ്ടിരിക്കുകയാണ്. ഗവൺമെന്റ് നിയന്ത്രണത്തിലുള്ള അന്വേഷണ ഏജൻസികളും പല മാധ്യമങ്ങളും ബിജെപിയുടെ വക്താക്കളായി മാറുന്ന കാഴ്ചയാണ് കണ്ടുവരുന്നത്. ഇത്തരം നിലപാടുകൾ ജനാധിപത്യത്തിന് ഭീഷണിയാണെന്നും ഇതിനെതിരെ ശക്തമായ പോരാട്ടങ്ങൾക്ക് പൊതുസമൂഹം നേതൃത്വം നൽകണമെന്നും അദ്ദേഹം ആവശ്യപ്പെട്ടു.

ക്രൂരമായ തല്ലിക്കൊലകൾ സാക്ഷര കേരളത്തിലും എത്തിക്കഴിഞ്ഞു. എന്നാൽ ഇത്തരത്തിലുള്ള അക്രമങ്ങളെക്കുറിച്ചോ അതിന്റെ ഗൗരവത്തെക്കുറിച്ചോ പൊതുസമൂഹം വേണ്ട രീതിയിലുള്ള ചർച്ചകൾ നടത്താൻ തയ്യാറാകുന്നില്ല. 

രാജ്യത്തെ മാനവസൗഹൃദം നശിപ്പിക്കുന്ന സംഘ്പരിവാറിന്റെ ചെയ്തികളെക്കുറിച്ച് പൊതുസമൂഹത്തെ ബോധ്യപ്പെടുത്തിയതിന്റെ വൈരാഗ്യമാണ് സൈനുൽ ആബിദിന്റെ കൊലപാതകത്തിലേക്ക് നയിച്ചതെന്നും കെ കെ അബ്ദുൽ ജബ്ബാർ ആരോപിച്ചു.

കാസർകോട് ലൈബ്രറി ഹാളിൽ നടന്ന അനുസ്മരണ ചടങ്ങിൽ എസ്ഡിപിഐ ജില്ലാ പ്രസിഡന്റ് സി എ സവാദ് അധ്യക്ഷത വഹിച്ചു. ജില്ലാ ജനറൽ സെക്രട്ടറി ഖാദർ അറഫ സ്വാഗത പ്രസംഗം നടത്തി. ജില്ലാ സെക്രട്ടറി മുനീർ എ എച്ച്, ജില്ലാ ഖജാഞ്ചി ആസിഫ് ടി ഐ എന്നിവർ ചടങ്ങിൽ സംസാരിച്ചു. മണ്ഡലം സെക്രട്ടറി ബഷീർ ബി ടി നന്ദി രേഖപ്പെടുത്തി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ താഴെ രേഖപ്പെടുത്തൂ. ഷെയർ ചെയ്യുക.

Article Summary: KK Abdul Jabbar criticizes the silence of society on mob killings and fascism in Kerala.

#SDPI #KKAbdulJabbar #Kasaragod #Fascism #KeralaPolitics #Democracy