കുമ്പളയുടെ സ്വന്തം പക്ഷി ഗ്രാമം: കിദൂർ റെഡി!
● 60 ലക്ഷം രൂപ ചെലവഴിച്ചാണ് പദ്ധതി പൂർത്തിയാക്കിയത്.
● 174 ഇനം പക്ഷികളെ ഇവിടെ കണ്ടെത്തിയിട്ടുണ്ട്.
● കാജൂർ പള്ളം എന്ന പ്രകൃതിദത്ത ജലസ്രോതസ്സ് കിദൂരിന്റെ പ്രത്യേകതയാണ്.
● പക്ഷി നിരീക്ഷകർക്കും ഗവേഷകർക്കും ഇനി ഇവിടെ താമസിക്കാം.
എം എം മുനാസിർ
കുമ്പള: (KasargodVartha) പക്ഷിനിരീക്ഷണത്തിനും ഗവേഷണത്തിനുമായി കാസർകോട് ജില്ലയിലെ കുമ്പള ഗ്രാമപഞ്ചായത്തിലുള്ള കിദൂർ കുണ്ടങ്കരടുക്കയിൽ സംസ്ഥാന സർക്കാരിന്റെ ഡോർമിറ്ററി പക്ഷി ഗ്രാമം പദ്ധതി പൂർത്തിയായി.
പ്രകൃതി സ്നേഹികൾക്ക് ഇനി കിദൂർ കുണ്ടങ്കരടുക്കയിലെ പക്ഷി ഗ്രാമത്തിൽ താമസിക്കാം. സംസ്ഥാന ടൂറിസം വകുപ്പിന് കീഴിൽ കുമ്പള ഗ്രാമപഞ്ചായത്തിൽ വരുന്ന ആദ്യത്തെ സർക്കാർ ടൂറിസം പദ്ധതിയാണിത്. പദ്ധതിയുടെ നടത്തിപ്പിനായുള്ള ടെൻഡർ നടപടികൾ പൂർത്തിയായാൽ കെട്ടിടം തുറന്നുകൊടുക്കും. ഉദ്ഘാടന ചടങ്ങിൽ മന്ത്രിമാരും പങ്കെടുക്കും.
2019-ൽ കാസർകോട് വികസന പാക്കേജിൽ ഉൾപ്പെടുത്തി, 60 ലക്ഷം രൂപ ചെലവഴിച്ചാണ് പക്ഷി ഗ്രാമത്തിന്റെ ഡോർമിടറി നിർമ്മാണം പൂർത്തിയാക്കിയത്. ജില്ലാ നിർമ്മിതി കേന്ദ്രത്തിനായിരുന്നു നിർമ്മാണ ചുമതല. നിർമ്മാണത്തിലുണ്ടായ കാലതാമസം മുമ്പ് വലിയ പ്രതിഷേധങ്ങൾക്ക് ഇടയാക്കിയിരുന്നു.
പുതിയ കെട്ടിടത്തിൽ മീറ്റിംഗ് ഹാൾ, ഓഫീസ് മുറി, കാബിൻ, താമസത്തിനുള്ള മുറികൾ, അടുക്കള, ശൗചാലയങ്ങൾ എന്നിവയെല്ലാം ഒരുക്കിയിട്ടുണ്ട്. പ്രകൃതിരമണീയമായ ഈ പ്രദേശത്തേക്ക് ടൂറിസ്റ്റുകൾ കൂടി എത്തിത്തുടങ്ങുമെന്ന പ്രതീക്ഷയിലാണ് അധികൃതർ.
കിദൂർ പക്ഷി ഗ്രാമം: ജൈവവൈവിധ്യത്തിന്റെ പറുദീസ
10 ഏക്കർ വിസ്തൃതിയുള്ള കിദൂർ കുണ്ടങ്കരടുക്ക പക്ഷി ഗ്രാമം ജൈവവൈവിധ്യങ്ങളാൽ സമ്പന്നമാണ്. ഇവിടെ ഇതുവരെയായി സ്വദേശിയരും വിദേശീയരുമായ 174 വ്യത്യസ്തയിനം പക്ഷികളെ പക്ഷി നിരീക്ഷകർ കണ്ടെത്തിയിട്ടുണ്ട്.
ഇവയെക്കുറിച്ചുള്ള കൂടുതൽ ഗവേഷണങ്ങളും നടന്നു വരുന്നുണ്ട്. അപൂർവയിനം പക്ഷികളാണ് കിദൂറിന്റെ പ്രധാന ആകർഷണമെന്ന് പക്ഷി നിരീക്ഷകർ പറയുന്നു.
ഏത് വേനലിലും വറ്റാത്ത ‘കാജൂർ പള്ളം’ എന്ന പ്രകൃതിദത്തമായ ജലസ്രോതസ്സ് കിദൂറിന്റെ മാത്രം പ്രത്യേകതയാണ്. ആവശ്യത്തിന് വെള്ളം ലഭിക്കുന്നതുകൊണ്ടാവാം പക്ഷികൾ ഇവിടെ എത്താൻ കാരണം എന്നാണ് പക്ഷി നിരീക്ഷകരുടെ അഭിപ്രായം.
കിദൂരിൽ താമസസൗകര്യം ഒരുക്കിയതോടെ കൂടുതൽ പക്ഷി നിരീക്ഷകരും, ഗവേഷകരും, വിദ്യാർത്ഥികളും, ടൂറിസ്റ്റുകളും പക്ഷി ഗ്രാമത്തിലേക്ക് എത്തുമെന്ന പ്രതീക്ഷയിലാണ് നാട്ടുകാർ.
പദ്ധതി ഉദ്ഘാടനത്തിന് ഒരുങ്ങുന്നതോടെ തൊട്ടടുത്തുള്ള ആരിക്കാടി കോട്ട, കുമ്പള തടാക ക്ഷേത്രം തുടങ്ങിയ സ്ഥലങ്ങളിലും ടൂറിസം സാധ്യതകൾ വർദ്ധിക്കുമെന്നും നാട്ടുകാർ പ്രതീക്ഷിക്കുന്നു.
കിദൂർ പക്ഷി ഗ്രാമത്തെക്കുറിച്ചുള്ള നിങ്ങളുടെ അഭിപ്രായങ്ങൾ കമന്റ് ബോക്സിൽ രേഖപ്പെടുത്തുക.
Article Summary: Kidur Bird Village dormitory completed in Kumbala, boosting local tourism.
#KidurBirdVillage #KumbalaTourism #Kasaragod #BirdWatching #KeralaTourism #EcoTourism
