ഭൂമി സംബന്ധമായ പരാതികൾ കെട്ടിക്കിടക്കുന്നു; റവന്യൂ ഓഫീസുകൾ കയറിയിറങ്ങി ജനം; അദാലത്ത് വീണ്ടും പരിഗണനയിൽ

ഉപ്പള: (KasargodVartha) നിരവധി അദാലത്തുകൾ നടത്തിയിട്ടും പരിഹാരം കാണാതെ പോയ ഭൂമി സംബന്ധമായ പരാതികൾക്ക് വീണ്ടും 'അദാലത്ത്' സംഘടിപ്പിക്കാൻ ഒരുങ്ങി സർക്കാർ. കെട്ടിക്കിടക്കുന്ന ഭൂമി തരം മാറ്റൽ അപേക്ഷകൾക്കാണ് ഇത്തവണ പ്രാധാന്യം നൽകുന്നത്. അപേക്ഷകരെ സംബന്ധിച്ചിടത്തോളം വലിയ പ്രതീക്ഷ നൽകുന്ന വാർത്തയാണിത്.

ഭൂമി തരം മാറ്റൽ സംബന്ധിച്ച നിരവധി അപേക്ഷകളാണ് വിവിധ താലൂക്ക് ഓഫീസുകളിൽ കെട്ടിക്കിടക്കുന്നത്. മൂന്ന് മുതൽ അഞ്ച് വർഷം വരെ കാലപ്പഴക്കമുള്ള റീസർവേ അപേക്ഷകളിൽ പോലും കാലതാമസം നേരിടുന്നുണ്ട്. ദിവസേന വില്ലേജും താലൂക്ക് ഓഫീസും കയറിയിറങ്ങി വലയുകയാണ് അപേക്ഷകർ. കഴിഞ്ഞ അഞ്ച് വർഷത്തിനിടെ താലൂക്ക് തലത്തിലും മറ്റുമായി നാല് അദാലത്തുകൾ സംഘടിപ്പിച്ചിരുന്നു. എന്നാൽ, ഈ അദാലത്തുകളിൽ പരാതി നൽകിയവർക്ക് പോലും ഇതുവരെയും പരിഹാരമുണ്ടായിട്ടില്ല.

വില്ലേജ്, താലൂക്ക് ഓഫീസുകളിൽ ആവശ്യത്തിന് ജീവനക്കാരില്ലാത്തതാണ് അപേക്ഷകളിൽ കാലതാമസം നേരിടാൻ പ്രധാന കാരണമെന്ന് റവന്യൂ വകുപ്പ് അധികൃതർ തന്നെ പറയുന്നു. ഈ വിഷയം ഉദ്യോഗസ്ഥർ സർക്കാരിനെ അറിയിച്ചതാണെങ്കിലും ജീവനക്കാരെ നിയമിക്കാൻ ഇതുവരെ നടപടിയൊന്നും സ്വീകരിച്ചിട്ടില്ല. അടുത്ത മാസം മുതൽ തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് ജോലികളിൽ കൂടി റവന്യൂ ജീവനക്കാർ ഏർപ്പെടുന്നതിനാൽ അപേക്ഷകൾ തീർപ്പാക്കാൻ ഇനിയും കാലതാമസം നേരിടുമെന്ന് അപേക്ഷകർ ആശങ്കപ്പെടുന്നു.

അതിനിടെ, ഭൂമി തരം മാറ്റൽ നടപടികൾ സമയബന്ധിതമായി പൂർത്തിയാക്കുന്നതിനായി ചട്ടപ്രകാരമുള്ള നടപടികൾ ലഘൂകരിക്കുന്നതിനും വേഗത്തിലാക്കുന്നതിനുമായി സംസ്ഥാനത്തൊട്ടാകെ വീണ്ടും അദാലത്ത് സംഘടിപ്പിക്കുന്നത് സർക്കാരിന്റെ പരിഗണനയിലാണെന്ന് റവന്യൂ മന്ത്രി കെ. രാജൻ നിയമസഭയിൽ അറിയിച്ചു. എംഎൽഎമാരുടെ ചോദ്യങ്ങൾക്കുള്ള മറുപടിയിലാണ് അദ്ദേഹം ഇക്കാര്യം വ്യക്തമാക്കിയത്.

സംസ്ഥാനത്ത് 335 വില്ലേജുകളിൽ ഡിജിറ്റൽ റീസർവേ പൂർത്തിയാക്കിയിട്ടുണ്ടെന്നും, ഈ വില്ലേജുകളിലെ റവന്യൂ, രജിസ്ട്രേഷൻ, സർവേ സേവനങ്ങൾ 'എന്റെ ഭൂമി' പോർട്ടലിൽ സജ്ജീകരിച്ചുവരുന്നതായും മന്ത്രി അറിയിച്ചു. പോർട്ടൽ നടപടികൾ പൂർത്തിയാകുന്നതോടെ ഭൂമി കൈമാറ്റവുമായി ബന്ധപ്പെട്ട നടപടിക്രമങ്ങൾ സുതാര്യവും വേഗത്തിലും തീർപ്പാക്കുമെന്നും അദ്ദേഹം പറഞ്ഞു.

ഭൂമി സംബന്ധമായ ഒട്ടേറെ പരാതികളാണ് ദിവസേന കലക്ടറേറ്റുകളിലും വില്ലേജ് ഓഫീസുകളിലും താലൂക്ക് ഓഫീസുകളിലും ലഭിക്കുന്നത്. കലക്ടർ നേരിട്ട് വില്ലേജുകളിലെത്തി അദാലത്ത് നടത്തിയിട്ടുപോലും ഇത്തരം പരാതികളിൽ പലതിനും പരിഹാരം കണ്ടെത്താൻ സാധിച്ചിരുന്നില്ല. ഡിജിറ്റൽ റീസർവേയിൽ കണ്ടെത്തിയ അധിക ഭൂമി ക്രമപ്പെടുത്തി കൈവശാവകാശ രേഖ നൽകുന്ന നടപടികളിലും വേഗത ആവശ്യമുണ്ട്. ഈ വിഷയത്തിലും പരാതികൾ ഏറെയുണ്ട്. ഇവയ്‌ക്കെല്ലാം സർക്കാരിന്റെ പരിഗണനയിലുള്ള പുതിയ അദാലത്ത് തുണയാകുമോ എന്ന് കാത്തിരുന്നു കാണേണ്ടിയിരിക്കുന്നു.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവയ്ക്കുക.

Government considers new adalat to clear pending land-related complaints in Kerala.

#KeralaNews #LandReforms #RevenueDepartment #Adalat #KeralaGovernment #DigitalSurvey