ഡാമുകളിലും നദികളിലുമായി 5,000 കോടിയുടെ മണൽ; ശാസ്ത്രീയമായി നീക്കിയാൽ ഖജനാവ് നിറയും, വെള്ളപ്പൊക്കവും തടയാം
● 2018-19 വർഷങ്ങളിലെ പ്രളയത്തിലാണ് ഡാമുകളിലും നദികളിലും വൻതോതിൽ മണൽ അടിഞ്ഞത്
● എട്ട് ജില്ലകളിലെ നദികളിൽ മാത്രം 1,500 കോടിയിലേറെ മൂല്യമുള്ള മണലുണ്ടെന്ന് സാൻഡ് ഓഡിറ്റ് റിപ്പോർട്ട്
● ഭാരതപ്പുഴയിൽ 75 ലക്ഷത്തോളം മെട്രിക് ടൺ മണലുണ്ടെന്നാണ് കണക്കുകൾ വ്യക്തമാക്കുന്നത്
● പാലക്കാട്ടെ മംഗലം ഡാമിൽ 50 ലക്ഷം ഘന മീറ്റർ മണൽ അടിഞ്ഞുകൂടിയിട്ടുണ്ട്
തിരുവനന്തപുരം: (KasaragodVartha) മുൻ വർഷങ്ങളിൽ നടമാടിയ പേമാരിയിൽ നിന്നും പ്രളയത്തിൽ നിന്നും സർക്കാരുകൾ ഒന്നും പഠിച്ചില്ലെന്ന ആക്ഷേപം നിലനിൽക്കെ, വെള്ളപ്പൊക്കവും പ്രളയ സമാന സാഹചര്യങ്ങളും ആവർത്തിക്കുമ്പോൾ സംസ്ഥാനത്തെ നദികളിലും ഡാമുകളിലും അടിഞ്ഞുകിടക്കുന്നത് 5,000 കോടി രൂപയിലേറെ മൂല്യമുള്ള മണൽ കൂമ്പാരങ്ങൾ.
ഇത് നേരത്തെ നീക്കിയിരുന്നുവെങ്കിൽ വെള്ളപ്പൊക്കം ഒഴിവാക്കുന്നതിനും, സാമ്പത്തിക പ്രതിസന്ധിയിൽ ഉലയുന്ന സർക്കാരിന് വലിയൊരു വരുമാന സ്രോതസ്സ് കണ്ടെത്താമായിരുന്നുവെന്ന അഭിപ്രായം ഇപ്പോൾ ജനങ്ങളുടെ ഭാഗത്ത് നിന്ന് ശക്തമായി ഉയർന്നുവരുന്നുണ്ട്. 2018-19 വർഷങ്ങളിലെ പ്രളയത്തിലാണ് ഡാമുകളിലും നദികളിലും വൻതോതിൽ മണൽ അടിഞ്ഞത്.
സാൻഡ് ഓഡിറ്റ് റിപ്പോർട്ടിലെ കണക്കുകൾ
എട്ട് ജില്ലകളിലെ നദികളിൽ മാത്രം 1.75 കോടി മെട്രിക് ടൺ മണലുണ്ടെന്നും, ഇതിന് 1,500 കോടിയിലേറെ മൂല്യം ഉണ്ടാവുമെന്നും നാല് വർഷം മുൻപ് സാൻഡ് ഓഡിറ്റിൽ കണ്ടെത്തിയിരുന്നു. 11 ജില്ലകളിൽ 17 നദികളിൽ ഖനന സാധ്യതയുണ്ടെന്നും അന്ന് റിപ്പോർട്ടിലുണ്ടായിരുന്നു. എന്നാൽ ഇത് ഗൗരവത്തിലെടുക്കാൻ മുൻ സർക്കാരുകൾക്ക് കഴിഞ്ഞിട്ടില്ല. വെള്ളപ്പൊക്കവും പ്രളയവും നേരിടാൻ സർക്കാർ ഗൗരവമായ ഇടപെടലുകൾ നടത്തിയിട്ടില്ല എന്നതിൻ്റെ വ്യക്തമായ സൂചനകളാണിത്.
കണക്കുകൾ പ്രകാരം ഭാരതപ്പുഴയിൽ 75 ലക്ഷത്തോളം മെട്രിക് ടൺ മണലുണ്ട്. പാലക്കാട്ടെ മംഗലം ഡാമിൽ 50 ലക്ഷം ഘന മീറ്റർ മണലും, തിരുവനന്തപുരത്ത് അരുവിക്കരയിൽ 20 ലക്ഷം ഘന മീറ്റർ മണലുമുണ്ട്. ചുള്ളിയാർ, ചിമ്മിണി, മലമ്പുഴ തുടങ്ങിയ 9 ഇടത്ത് 10 മുതൽ 30 ലക്ഷം ഘന മീറ്റർ വരെ മണൽ അടിഞ്ഞുകൂടിയിട്ടുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. സർക്കാർ അടിയന്തരമായി ഇടപെട്ട് ശാസ്ത്രീയമായ രീതിയിൽ മണൽ ഖനനം നടത്തിയാൽ അത് സംസ്ഥാനത്തിന് വലിയ സാമ്പത്തിക നേട്ടത്തിന് വഴിവെക്കും.
സംഭരണശേഷിയും വൈദ്യുതി പ്രതിസന്ധിയും
നിലവിൽ ഡാമുകളിൽ 40 ശതമാനം മണലും ചെളിയും നിറഞ്ഞിട്ടുണ്ട്. ഈ മണലെടുത്താൽ വെള്ളപ്പൊക്കം തടയാനും സർക്കാരിന് വരുമാനമുണ്ടാക്കാനും കഴിയുന്നതോടൊപ്പം ഡാമുകളുടെ സംഭരണശേഷി 15 ശതമാനം വരെ കൂട്ടാനും സാധിക്കും. ഇതുവഴി 900 ദശലക്ഷം ഘന മീറ്റര് വെള്ളം അധികമായി സംഭരിക്കാൻ കഴിയുകയും സംസ്ഥാനത്തെ വൈദ്യുതി പ്രതിസന്ധിക്ക് ഒരു പരിധിവരെ പരിഹാരം കാണാനും സാധിക്കും.
എന്നാൽ ഇതൊന്നും സർക്കാരിൻ്റെ അജണ്ടയിൽ ഇല്ലാതെ പോയി എന്നത് വലിയ പോരായ്മയാണ്. കാസർകോട് ജില്ലയിലടക്കം നേരത്തെ പുഴകളിൽ നിന്ന് മണൽ നീക്കം ചെയ്യാൻ നിർദേശം ഉണ്ടായിട്ടുണ്ടെങ്കിലും അതും ഇതുവരെ നടപ്പിലായിട്ടില്ല. ഇതുമൂലം പല പുഴകളിലും ജലനിരപ്പ് വേഗത്തിൽ ഉയർന്ന് തീരവാസികൾ അപകട ഭീഷണി നേരിടുന്നുമുണ്ട്.
നദികളിലെയും ഡാമുകളിലെയും മണൽ ശേഖരത്തെക്കുറിച്ചുള്ള ഈ സുപ്രധാന വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പ്രാദേശിക വാർത്തകളും വിവരങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.
Article Summary: Over 5,000 crore worth of sand is piled up in Kerala's rivers and dams; timely removal could prevent floods and boost revenue.
#KeralaNews #SandMining #KeralaDams #FloodPrevention #KeralaEconomy #KeralaGovernment #LocalNews #AparnaNews
