തീരദേശ ഹൈവേ യാഥാർത്ഥ്യത്തിലേക്ക്; 5840 കോടിയുടെ സാമ്പത്തികാനുമതി; കാസർകോട് ജില്ലയിൽ 37.5 കിലോമീറ്റർ പാത

തിരുവനന്തപുരം: (KasargodVartha) കേരളത്തിന്റെ സ്വപ്ന പദ്ധതിയായ തീരദേശ ഹൈവേ കിഫ്ബിയിലൂടെ (KIIFB) സമയബന്ധിതമായി പൂർത്തിയാക്കാനാണ് സർക്കാർ ലക്ഷ്യമിടുന്നതെന്ന് പൊതുമരാമത്ത് ടൂറിസം വകുപ്പ് മന്ത്രി പി.എ. മുഹമ്മദ് റിയാസ് നിയമസഭയിൽ അറിയിച്ചു. സി.എച്ച്. കുഞ്ഞമ്പു എം.എൽ.എയുടെ സബ്മിഷന് മറുപടി നൽകുകയായിരുന്നു അദ്ദേഹം. വടക്ക് മഞ്ചേശ്വരം മുതൽ തെക്ക് പൊഴിയൂർ വ

രെ 605 കിലോമീറ്റർ ദൈർഘ്യത്തിൽ നിർമ്മിക്കുന്ന ഈ പാത തീരദേശ ജനതയുടെ ജീവിതനിലവാരം ഉയർത്തുന്നതിൽ നിർണ്ണായക പങ്കുവഹിക്കുമെന്ന് മന്ത്രി വ്യക്തമാക്കി.

സമഗ്ര വികസനം ലക്ഷ്യം

ഒൻപത് തീരദേശ ജില്ലകളിലൂടെ കടന്നുപോകുന്ന ഈ ഹൈവേ തീരജനതയുടെ തൊഴിലും വരുമാനവും വർദ്ധിപ്പിക്കാൻ സഹായിക്കും. മത്സ്യബന്ധന അനുബന്ധ മേഖലകളിൽ കൂടുതൽ വ്യവസായങ്ങളും സംരംഭങ്ങളും ആരംഭിക്കാനും അതുവഴി മത്സ്യത്തൊഴിലാളി മേഖലയിൽ വൻ മുന്നേറ്റം സാധ്യമാക്കാനുമാണ് സർക്കാർ ലക്ഷ്യമിടുന്നത്. തീരമേഖലയിലെ ടൂറിസം സാധ്യതകളെ ലോകത്തിന് മുന്നിൽ തുറന്നുകാട്ടാനും ഈ ഹൈവേ സഹായകമാകുമെന്ന് മന്ത്രി അറിയിച്ചു. 508 കിലോമീറ്റർ ഭാഗമാണ് കിഫ്ബി സഹായത്തോടെ നവീകരിക്കുന്നത്. ഇതിനായി ഇതുവരെ 5840.86 കോടി രൂപയുടെ സാമ്പത്തികാനുമതി കിഫ്ബിയിൽ നിന്ന് ലഭ്യമായിട്ടുണ്ട്.

പ്രവൃത്തികളുടെ പുരോഗതി

പദ്ധതിയുടെ മൂന്ന് റീച്ചുകൾ ഇതിനോടകം പൂർത്തിയായിക്കഴിഞ്ഞു. അഴീക്കോട്-മുനമ്പം പാലം പ്രവൃത്തി നിലവിൽ പുരോഗമിക്കുകയാണ്. കണ്ണൂർ, കോഴിക്കോട് ജില്ലകളിലായി രണ്ട് റീച്ചുകളിൽ ടെണ്ടർ നടപടികൾ നടക്കുന്നു. ആകെ 471 കിലോമീറ്റർ ഭാഗത്ത് സ്ഥലമേറ്റെടുപ്പ് നടപടികൾ ഊർജ്ജിതമാണ്. നാല് റീച്ചുകളിൽ 19(1) വിജ്ഞാപനം പുറപ്പെടുവിച്ചു. ഭൂമി വിട്ടുനൽകുന്ന തീരദേശ നിവാസികൾക്കായി പ്രത്യേക പുനരധിവാസ പാക്കേജ് തയ്യാറാക്കിയാണ് സർക്കാർ മുന്നോട്ടുപോകുന്നതെന്നും മന്ത്രി വ്യക്തമാക്കി.

കാസർകോട് ജില്ലയിലെ സ്ഥിതി

കാസർകോട് ജില്ലയിൽ തൃക്കരിപ്പൂർ, കാഞ്ഞങ്ങാട്, ഉദുമ, കാസർകോട് നിയോജക മണ്ഡലങ്ങളിലൂടെയാണ് തീരദേശ ഹൈവേ കടന്നുപോകുന്നത്. ആകെ 37.5 കിലോമീറ്റർ ദൈർഘ്യമാണ് ജില്ലയിലുള്ളത്. കണ്ണൂർ ജില്ലയിലെ പയ്യന്നൂർ മണ്ഡലത്തെയും കാസർകോട്ടെ തൃക്കരിപ്പൂർ മണ്ഡലത്തെയും ബന്ധിപ്പിക്കുന്ന പാണ്ഡ്യാലക്കടവ് പാലത്തിന് (വലിയപറമ്പ പാലം) സാങ്കേതിക അനുമതി നൽകി പ്രവൃത്തി ടെണ്ടർ ചെയ്തിട്ടുണ്ട്. ഇത് അംഗീകരിക്കുന്ന നടപടികൾ പുരോഗമിക്കുകയാണ്.

തൃക്കരിപ്പൂർ മണ്ഡലത്തിലാണ് പാതയുടെ ഏറ്റവും കൂടുതൽ ദൂരമുള്ളത് (20.20 കി.മീ). ഇവിടെ കല്ലിടൽ പ്രവൃത്തികൾ പൂർത്തിയായി. 24 ഹെക്ടറിലധികം ഭൂമി ഏറ്റെടുക്കേണ്ടതിനാൽ ഇതിനാവശ്യമായ പ്രത്യേക സർക്കാർ അനുമതി ഉടൻ ലഭിക്കുമെന്നാണ് പ്രതീക്ഷ. കാഞ്ഞങ്ങാട് മണ്ഡലത്തിലെ 14.92 കിലോമീറ്റർ പാതയിൽ ഭൂരിഭാഗം ഇടങ്ങളിലും കല്ലിടൽ പൂർത്തിയായി. ഉദുമ നിയോജക മണ്ഡലത്തിൽ 1.9 കിലോമീറ്റർ ദൂരത്തിലാണ് ഹൈവേയുള്ളത്. ഇവിടെ 730 മീറ്റർ ഭാഗത്ത് കല്ലിടൽ പൂർത്തിയായി. ബാക്കി ഭാഗങ്ങളിൽ ഹൈവേ നിർമ്മാണം ഒഴിവാക്കി അലൈൻമെന്റ് നിലവിലുള്ള കാസർകോട്-കാഞ്ഞങ്ങാട് സംസ്ഥാന പാതയിലേക്ക് യോജിപ്പിക്കാൻ തീരുമാനിച്ചതായും മന്ത്രി അറിയിച്ചു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുക്കൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: PWD Minister P.A. Mohammed Riyas informed the Assembly that the 605 km Coastal Highway project funded by KIIFB is progressing rapidly, including 37.5 km in the Kasaragod district.

#CoastalHighwayKerala #KIIFB #PAMohammedRiyas #KeralaInfrastructure #KasaragodNews #Trikkaripur #Uduma #Kanhangad #BeachRoadKerala #DevelopmentKerala