നാടിന് പുതിയ ഊർജ്ജമായി കരിന്തളം തലയടുക്കത്ത് കെസിസിപിഎൽ പമ്പ് വരുന്നു

കാസർകോട്: (KasargodVartha) കെ.സി.സി.പി.എൽ (കേരള കോക്കനട്ട് ആൻഡ് ഫ്രൂട്ട് പ്രോസസിംഗ് ലിമിറ്റഡ്) കരിന്തളം തലയടുക്കത്ത് ആരംഭിക്കുന്ന പുതിയ പെട്രോൾ പമ്പിന്റെ പ്രവർത്തന പുരോഗതി ചെയർമാൻ ടി.വി. രാജേഷും മാനേജിംഗ് ഡയറക്ടർ ആനക്കൈ ബാലകൃഷ്ണനും വിലയിരുത്തി. 

പമ്പിന്റെ 80% നിർമ്മാണ പ്രവൃത്തികളും പൂർത്തിയായതായും, ഓഗസ്റ്റ് രണ്ടാം വാരത്തോടെ ഉദ്ഘാടനത്തിന് സജ്ജമാവുമെന്നും അധികൃതർ അറിയിച്ചു. കേരള സർക്കാരിന്റെ നേരിട്ടുള്ള ഉടമസ്ഥതയിലുള്ള സ്ഥാപനമായ കെ.സി.സി.പി.എൽ., പാപ്പിനിശ്ശേരി, മാങ്ങാട്ടുപറമ്പ്, നാടുകാണി എന്നിവിടങ്ങളിൽ ഇതിനോടകം പെട്രോൾ പമ്പുകൾ ആരംഭിച്ചിട്ടുണ്ട്. 

കരിന്തളം തലയടുക്കത്ത് ആരംഭിക്കുന്നത് അവരുടെ നാലാമത്തെ പെട്രോൾ പമ്പാണ്. ബി.പി.സി.എൽ സെയിൽസ് ഓഫീസർ ശരൺജിത്തും വിലയിരുത്തൽ യോഗത്തിൽ ഒപ്പമുണ്ടായിരുന്നു. വിവിധങ്ങളായ വൈവിധ്യവൽക്കരണ പദ്ധതികളിലൂടെയാണ് കമ്പനി മുന്നോട്ട് പോകുന്നത്. 

കോക്കനട്ട് ആൻഡ് ഫ്രൂട്ട് പ്രോസസിംഗ് കോംപ്ലക്സ്, ഹൈടെക് കയർ ഡിഫൈബറിംഗ് യൂണിറ്റ്, ഐ.ടി. ഇൻകുബേഷൻ സെന്റർ എന്നിവയ്ക്ക് പുറമെ സാനി സാനിറ്റൈസർ, ഹാൻഡ് വാഷ്, ഫ്ലോർ ക്ലീനർ, ഡിസ്റ്റിൽഡ് വാട്ടർ, അഗ്രി പിത്ത് തുടങ്ങി 15 ഓളം ഉൽപ്പന്നങ്ങൾ വിപണിയിലിറക്കാൻ കെ.സി.സി.പി.എല്ലിന് സാധിച്ചു. 

ഇതിലൂടെ വിറ്റുവരവിലും ലാഭത്തിലും കമ്പനി ചരിത്രനേട്ടം കൈവരിച്ചുവെന്ന് ചെയർമാൻ ടി.വി. രാജേഷും മാനേജിംഗ് ഡയറക്ടർ ആനക്കൈ ബാലകൃഷ്ണനും വ്യക്തമാക്കി.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെച്ച് അഭിപ്രായങ്ങൾ രേഖപ്പെടുത്തൂ.

Article Summary: KCCPPL's new petrol pump to open soon in Karinthalam Thalayadukkam.

#Kasaragod #PetrolPump #KCCPPL #KeralaNews #BusinessNews #Development