കാസർകോട് മെഡിക്കൽ കോളജിനായി ജനം തെരുവിൽ; പ്രതിഷേധം ഇരമ്പിയ കളക്ടറേറ്റ് മാർച്ച്

കാസർകോട്: (KasargodVartha) കാസർകോട് മെഡിക്കൽ കോളജിന്റെ പ്രവർത്തനം പൂർണ്ണ സജ്ജമാക്കണമെന്നാവശ്യപ്പെട്ട് കളക്ടറേറ്റിലേക്ക് വൻ പ്രതിഷേധ മാർച്ച് നടത്തി. പ്രഖ്യാപിച്ച് വർഷങ്ങൾ കഴിഞ്ഞിട്ടും മെഡിക്കൽ കോളജിന് പൂർണ്ണരൂപത്തിൽ പ്രവർത്തിക്കാൻ സാധിക്കാത്ത സാഹചര്യത്തിലും കാസർകോട് മെഡിക്കൽ കോളജ് ആക്ഷൻ കൗൺസിലിന്റെ നേതൃത്വത്തിൽ നടത്തുന്ന സമരത്തിന് പിന്തുണ അറിയിച്ചുമാണ് ഇൻഫ്ളുവൻസേർസ് കൂട്ടായ്മയുടെ ആഭിമുഖ്യത്തിൽ ജനം തെരുവിലിറങ്ങിയത്. കഴിഞ്ഞ ആഴ്ച ആക്ഷൻ കൗൺസിൽ നടത്തിയ 'ഞെട്ടിക്കൽ സമരം' സോഷ്യൽ മീഡിയയിൽ തരംഗമായതോടെയാണ് പ്രതിഷേധത്തിന് പൊതുജനപിന്തുണ വർദ്ധിച്ചത്.

ജില്ലയിലെ പ്രമുഖ ഇൻഫ്ലുവൻസർമാരും പൊതുപ്രവർത്തകരും വിഷയത്തിൽ ഇടപെട്ടതോടെ സോഷ്യൽ മീഡിയ ക്യാമ്പെയ്‌ൻ ശക്തമായി. കക്ഷി രാഷ്ട്രീയ ഭേദമന്യേ നൂറുകണക്കിന് ആളുകളാണ് പ്രതിഷേധ മാർച്ചിൽ പങ്കെടുത്തത്. എൻഡോസൾഫാൻ സമര നേതാവ് മുനീസ അമ്പലത്തറ കളക്ടറേറ്റ് മാർച്ച് ഉദ്ഘാടനം ചെയ്തു. ജനറൽ ആശുപത്രിക്ക് മുന്നിൽ മെഡിക്കൽ കോളജ് ബോർഡ് സ്ഥാപിച്ച നടപടിയെ അവർ രൂക്ഷമായി പരിഹസിച്ചു. ഒരു പെട്ടിക്കടയ്ക്ക് മുന്നിൽ ഫൈവ് സ്റ്റാർ ഹോട്ടലിന്റെ ബോർഡ് വെച്ചതിന് തുല്യമാണ് ഇതെന്നായിരുന്നു മുനീസയുടെ വാക്കുകൾ.

മെഡിക്കൽ കോളജിനായി ബിജെപിയും സിപിഎമ്മും കോൺഗ്രസും ലീഗും ഒരുമിച്ച് നിൽക്കണമെന്നും രാഷ്ട്രീയത്തിനതീതമായ ഒന്നാണ് ഈ ആവശ്യമെന്നും അവർ പറഞ്ഞു. ആശുപത്രി എന്നത് ഓരോ ജാതി മത രാഷ്ട്രീയ ഭേദമന്യേ ഓരോരുത്തരുടെയും ആവശ്യമാണെന്ന് അവർ ചൂണ്ടിക്കാട്ടി. 'ഞങ്ങൾ അനുഭവിക്കുന്ന ദുരിതം മറ്റാരും അനുഭവിക്കരുതെന്നാണ് ആഗ്രഹം' എന്നും മുനീസ കൂട്ടിച്ചേർത്തു.

മണിക്കൂറുകളോളം നീണ്ടുനിന്ന പ്രതിഷേധത്തെത്തുടർന്ന് മേഖലയിൽ ഗതാഗതം സ്തംഭിച്ചു. അധികൃതരുടെ ഭാഗത്തുനിന്ന് അടിയന്തര നടപടികൾ ഉണ്ടായില്ലെങ്കിൽ വരുംദിവസങ്ങളിൽ സമരം കൂടുതൽ ശക്തമാക്കാനാണ് മെഡിക്കൽ കോളജ് ആക്ഷൻ കൗൺസിലിന്റെ തീരുമാനം. പ്രതിഷേധത്തിൻ്റെ പുതിയ ബസ് സ്റ്റാൻഡ് മേൽപ്പാലത്തിന് കീഴിൽ ആരംഭിച്ച അനിശ്ചിത കാല സമരം നാലാം ദിവസം പിന്നിട്ടു.

നാട്ടിലെ പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. പുതിയ അപ്‌ഡേറ്റുകൾ ഉടൻ ലഭിക്കാൻ ഞങ്ങളുടെ ഫേസ്ബുക്ക് പേജ് ഫോളോ ചെയ്യുക. ഈ വാർത്ത ഉപകാരപ്രദമെന്ന് തോന്നിയാൽ സുഹൃത്തുകൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: A mass protest march was organised by the influencers' union to the Collectorate, demanding full operation of the long-pending medical college. 

#Kasargod #MedicalCollege #Protest #HealthCare #KasargodNews #KeralaNews