Green Initiative | കാസര്‍കോട് 2025 ൽ മാലിന്യ മുക്തമായി പ്രഖ്യാപിക്കും: 777 വാർഡുകളിൽ ശുചീകരണ പ്രവർത്തനങ്ങൾക്ക് തുടക്കം; പിന്നെ ഹരിത സ്കൂളുകളും! ​​​​​​​

കാസര്‍കോട്: (KasargodVartha) മാലിന്യ മുക്ത നവകേരളം ജനകീയ ക്യാമ്പയിന്റെ ഭാഗമായി, 2025 ജനുവരി 26ന് കാസര്‍കോട് ജില്ല മാലിന്യ മുക്തമായി പ്രഖ്യാപിക്കുമെന്ന് ആസൂത്രണ സമിതി യോഗത്തില്‍ തീരുമാനമായി. ഒക്ടോബര്‍ 2ന്, ജില്ലയിലെ 777 വാര്‍ഡുകളിലും മാലിന്യ മുക്ത പരിപാടി സംഘടിപ്പിക്കും. ജനകീയ ക്യാമ്പയിന്റെ ഭാഗമായി, ഒക്ടോബര്‍ 2ന് ആരംഭിച്ച് 2024 മാര്‍ച്ച് 31ന് അവസാനിക്കുന്ന വിവിധ പരിപാടികളില്‍ സമൂഹത്തിന്റെ വിവിധ മേഖലകളിലെ ആളുകളും പൊതുജനങ്ങളും പങ്കാളികളാകും.

ഒക്ടോബര്‍ 2ന് എല്ലാ വാര്‍ഡുകളിലും ശുചിത്വ പ്രവര്‍ത്തനങ്ങളുടെ ഉദ്ഘാടനം നടക്കും. ജില്ലാതല ഉദ്ഘാടനം പൈവളിഗെ ഹൈസ്‌കൂളില്‍ വെച്ച് നടത്തുമെന്ന് തീരുമാനമുണ്ടായി.

തദ്ദേശ സ്ഥാപനങ്ങള്‍ മാലിന്യ മുക്ത ക്യാമ്പയിന്റെ ഭാഗമായി, പ്രവര്‍ത്തനങ്ങള്‍ ക്രിയാത്മകമായി കൈകാര്യം ചെയ്യേണ്ടതുണ്ടെന്ന് ജില്ലാ പഞ്ചായത്ത് പ്രസിഡന്റ് പി. ബേബി ബാലകൃഷ്ണന്‍ പറഞ്ഞു. ഒക്ടോബര്‍ രണ്ടിന് ഓരോ വാര്‍ഡിലും ഓരോ പരിപാടികള്‍ ഉദ്ഘാടനം ചെയ്യാന്‍ സാധിക്കണമെന്നും അറിയിച്ചു. ആസൂത്രണ സമിതി യോഗത്തില്‍ അധ്യക്ഷത വഹിക്കുകയായിരുന്നു അവര്‍..

ജില്ലാ പഞ്ചായത്തിന്റെ നേതൃത്വത്തില്‍ ഹരിത സ്‌കൂളുകളുടെ പ്രഖ്യാപനം ഒക്ടോബര്‍ 2ന് നടത്തും. ശുചിത്വവും ഗുണമേന്‍മയും ഉറപ്പു നല്‍കുന്ന കുടിവെള്ളം ലഭ്യമാക്കുന്നതിനായി, 21 സ്‌കൂളുകളില്‍ ആര്‍.ഒ. പ്ലാന്റുകള്‍ നടപ്പിലാക്കിയതായി ആസൂത്രണ സമിതി യോഗത്തില്‍ അറിയിക്കപ്പെട്ടു.

പൈവളിഗെ നഗര്‍ ജി.എച്ച്.എസ്.എസ്, അടൂര്‍ ജി.എച്ച്.എസ്.എസ്, സൂരംബയല്‍ ജി.എച്ച്.എസ്.എസ്, കാറഡുക്ക ജി.എച്ച്.എസ്.എസ്, പെരിയ ജി.എച്ച്.എസ്.എസ്, മാലോത്ത് കസബ ജി.എച്ച്.എസ്.എസ്, സി.കെ.എന്‍.എസ്.ജി.ജി.എച്ച്.എസ്.എസ് പിലിക്കോട്, കയ്യൂര്‍ ജി.വിഎച്ച്.എസ്.എസ്, കയ്യൂര്‍ ജി.വിഎച്ച്.എസ്.എസ്, ഉദിനൂര്‍ ജി.എച്ച്.എസ്.എസ്, ചീമേനി ജി.എച്ച്.എസ്.എസ്, കുട്ടമത്ത് ജി.എച്ച്.എസ്.എസ്, ചെമ്മനാട് ജി.എച്ച്.എസ്.എസ്, കൊട്ടോടി ജി.എച്ച്.എസ്.എസ്, ബന്തടുക്ക ജി.എച്ച്.എസ്.എസ്, പടന്ന കടപ്പുറം ജി.എഫ്.എച്ച്.എസ്.എസ്, മടിക്കൈ ജി.എച്ച്.എസ്.എസ്, ചെറുവത്തൂര്‍ ജി.എഫ്.എച്ച്.എസ്.എസ്, ഉദുമ ജി.എച്ച്.എസ്.എസ്, ചന്ദ്രഗിരി ജി.എച്ച്.എസ്.എസ്, ദേലംപാടി ജി.എച്ച്.എസ്.എസ്, കുണ്ടംകുഴി ജി.എച്ച്.എസ്.എസ് തുടങ്ങിയ സ്‌കൂളുകളില്‍ പരിപാടികള്‍ നടക്കും.

പിലിക്കോട് ജി.എച്ച്.എസ്.എസ്, ബളാംതോട്  ജി.എച്ച്.എസ്.എസ്, പട്‌ള  ജി.എച്ച്.എസ്.എസ്, കുമ്പള  ജി.എച്ച്.എസ്.എസ്, മലോത്ത് കസബ  ജി.എച്ച്.എസ്.എസ്, ചായോത്ത്  ജി.എച്ച്.എസ്.എസ്, കക്കാട്ട്  ജി.എച്ച്.എസ്.എസ്, ഇരിയണ്ണി  ജി.എച്ച്.എസ്.എസ്, കുണ്ടംകുഴി  ജി.എച്ച്.എസ്.എസ്, അട്ടേങ്ങാനം  ജി.എച്ച്.എസ്.എസ്, ചന്ദ്രഗിരി  ജി.എച്ച്.എസ്.എസ്, കുട്ടമത്ത്  ജി.എച്ച്.എസ്.എസ് എന്നിവിടങ്ങളില്‍ പൂര്‍ത്തിയാക്കിയ തുമ്പൂര്‍മൊഴി അറ്റ് സ്‌കൂള്‍ പദ്ധതിയും ബെള്ളിക്കോത്ത്  ജി.വി.എച്ച്.എസ്.എസ്, കുട്ടമത്ത്  ജി.എച്ച്.എസ്.എസ് എന്നിവിടങ്ങളില്‍ പൂര്‍ത്തിയാക്കിയ ബയോഗ്യാസ് സംവിധാനവും, പത്ത് വിദ്യാലയങ്ങളില്‍ പൂര്‍ത്തിയാക്കിയ ഫ്രീഹാബ് ടോയ്‌ലറ്റുകളും ഉദ്ഘാടനം ചെയ്ത് ഹരിത സ്‌കൂളുകള്‍ പ്രഖ്യാപിക്കും.

18 പുതിയ സ്‌കൂളുകളില്‍ ആര്‍.ഒ. പ്ലാന്റുകളുടെ പ്രവൃത്തി ആരംഭിക്കുമെന്നും തദ്ദേശ സ്ഥാപനങ്ങളിലെ ഉദ്ഘാടനം നടപടികള്‍ നടക്കുമെന്നും ബന്ധപ്പെട്ടവര്‍ അറിയിച്ചു.

ജനപ്രതിനിധികളും രാഷ്ട്രീയ പാര്‍ട്ടി പ്രവര്‍ത്തകരും പൊതുജനങ്ങളും ക്യാമ്പയിനില്‍ സജീവമായി പങ്കാളികളാകണം. നദികളിലെ വെള്ളം ദുരിതമായി മാറുന്ന സാഹചര്യം വര്‍ധിച്ചുകൊണ്ടിരിക്കുകയാണ്. പുഴകളില്‍ കുളിക്കാന്‍ മുന്നോടിയായി വെള്ളം പരിശോധിക്കേണ്ട അവസ്ഥയിലാണിപ്പോള്‍. ഈ സാഹചര്യത്തില്‍, ശുചിത്വം വലിയ പ്രാധാന്യമുള്ള ഒന്നായി മാറിയിരിക്കുകയാണ് എന്നും യോഗത്തില്‍ മുഖ്യ പ്രഭാഷണം നടത്തിയ ജില്ലാ കളക്ടര്‍ കെ. ഇമ്പശേഖര്‍ അഭിപ്രായപ്പെട്ടു.

വീടുകളിലും അയല്‍ക്കൂട്ടങ്ങളിലും വാര്‍ഡ് തലത്തിലും ജൈവ അജൈവ ദ്രവ മാലിന്യ സംസ്‌കരണ സംവിധാനങ്ങള്‍ ഉറപ്പാക്കും. നവംബര്‍ 1ന് പ്രധാന ടൗണുകളും മാര്‍ക്കറ്റുകളിലും സാധ്യമായവയെല്ലാം മാലിന്യ മുക്തമായി പ്രഖ്യാപിക്കും. ഹരിത ടൂറിസത്തിന്റെ ഭാഗമായി പ്രധാന ടൂറിസം സെന്ററുകള്‍ നവംമ്പര്‍ ഒന്നിന് മാലിന്യ മുക്തമായി പ്രഖ്യാപിക്കും. ഓരോ തദ്ദേശ സ്ഥാപനങ്ങളിലും ഗ്യാപ്പുകള്‍ കണ്ടെത്തി എസ്.ടി.പി, എഫ്.എസ്.ടി.പി, മിനി എം.സി. എഫ്, ഡബിള്‍ ചേംബര്‍ ഇന്‍സിനേറ്റര്‍ തുടങ്ങിയവ ആരംഭിക്കുകയും വാത്തില്‍പടി ശേഖരണം, യൂസര്‍ ഫീ എന്നിവ 100 ശതമാനം പൂര്‍ത്തിയാക്കുകയും ചെയ്യും. ഹരിത സ്‌കൂളുകള്‍, ഹരിത സ്ഥാപനങ്ങള്‍, ഹരിത അയല്‍ക്കൂട്ടങ്ങള്‍ തുടങ്ങിയ പ്രഖ്യാപനങ്ങള്‍ നടത്തും.

ഇതിനോടകം, രാഷ്ട്രീയ പാർട്ടികൾ, യുവാക്കൾ, സന്നദ്ധ സംഘടനകൾ, പൊതുജനങ്ങൾ തുടങ്ങിയ വിവിധ മേഖലകളിലുള്ള ആളുകളെ ഉൾപ്പെടുത്തി, ജില്ലാ തലം മുതൽ വാർഡ് തലം വരെ കാമ്പയിന്റെ മുന്നോടിയായി വിപുലമായ ചർച്ചകൾ നടത്തിയിട്ടുണ്ട്. സെപ്റ്റംബർ 11 ബ്ലോക്ക് തലത്തിലും മുനിസിപ്പൽ തലത്തിലുമുള്ള യോഗങ്ങൾ പൂർത്തിയാകും. സെപ്റ്റംബർ 20 ഓടെ എല്ലാ വാർഡ് തല യോഗങ്ങളും പൂർത്തിയാകുമെന്നും അറിയിച്ചു. 

ജില്ലാ ആസൂത്രണ സമിതി ഹാളിൽ ചേർന്ന യോഗത്തിൽ തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ ജെയ്‌സൺ മാത്യു ആമുഖ പ്രഭാഷണം നടത്തി. നവകേരളം കർമ്മ പദ്ധതിയുടെ ജില്ലാ കോർഡിനേറ്റർ കെ. ബാലകൃഷ്ണൻ വിഷയം അവതരിപ്പിച്ചു. ജില്ലാ പഞ്ചായത്ത് വൈസ് പ്രസിഡന്റ് ഷാനവാസ് പാദൂർ, ശുചിത്വ മിഷൻ ജില്ലാ കോർഡിനേറ്റർ പി. ജയൻ, ജില്ലാ പ്ലാനിംഗ് ഓഫീസർ ടി. രാജേഷ്, കുടുംബശ്രീ എ.ഡി.എം.സി. സി.എച്ച് ഇഖ്ബാൽ, ജില്ലാ ആസൂത്രണ സമിതി അംഗങ്ങളായ എസ് എൻ സരിത, ഗീതാ കൃഷ്ണൻ ജാസ്മിൻ, കബീർ ചെർക്കള, നജ്മറാഫി, ആർ. റീത്ത, അഡ്വ. സി. രാമചന്ദ്രൻ തുടങ്ങിയവർ ഉൾപ്പെടെയുള്ള തദ്ദേശ സ്വയംഭരണ സ്ഥാപന അധ്യക്ഷന്മാർ, ജില്ലാതല ഉദ്യോഗസ്ഥർ, സെക്രട്ടറിമാർ എന്നിവർ യോഗത്തിൽ പങ്കെടുത്തു.

#Kasargod, #WasteFree, #GreenSchools, #Cleanup, #EnvironmentalCampaign, #October2