ഫോർട്ട് റോഡ്–ഫിഷ് മാർക്കറ്റ് വാർഡിൽ ലീഗും വിമതരും നേർക്കുനേർ; വോട്ടർപട്ടികയെ ചൊല്ലിയുള്ള തർക്കം നഗരസഭാ ഓഫീസിൽ സംഘർഷാവസ്ഥ സൃഷ്ടിച്ചു

കാസർകോട്: (KasargodVartha) നഗരസഭാ തിരഞ്ഞെടുപ്പിനോടനുബന്ധിച്ച് ഫോർട്ട് റോഡ്–ഫിഷ് മാർക്കറ്റ് വാർഡ് ഇപ്പോൾ കാസർകോട് രാഷ്ട്രീയത്തിലെ ഏറ്റവും ചൂടേറിയ വിഷയമായി മാറിയിരിക്കുകയാണ്. മുസ്‌ലിം ലീഗും ലീഗ് വിമതരും തമ്മിലുള്ള ശക്തമായ നീക്കങ്ങൾ വാർഡിലെ രാഷ്ട്രീയരംഗം ചൂടുപിടിപ്പിക്കുകയാണ്. തുടർച്ചയായി ലീഗ് വിമതർ ജയിച്ചുവരുന്ന ഈ വാർഡ് തിരിച്ചുപിടിക്കണമെന്ന ലക്ഷ്യത്തോടെയാണ് ലീഗ് രംഗത്തിറങ്ങിയത്. അതിനാൽ വാർഡിലെ ഓരോ വോട്ടും നിർണ്ണായകമാകുന്ന ഘട്ടത്തിലാണ് ഇരുപക്ഷവും തമ്മിൽ നേരിട്ടുള്ള ഏറ്റുമുട്ടൽ നടന്നത്.

ഹിയറിങ്ങിനിടെയുണ്ടായ വാക്ക് തർക്കം സംഘർഷമായി

ബുധനാഴ്ച നഗരസഭാ ഓഫീസിൽ വോട്ട് ചേർക്കലും ഒഴിവാക്കലുമായി ബന്ധപ്പെട്ട് നടന്ന ഹിയറിങ്ങിനിടെയാണ് ആദ്യമായി വാക്കുതർക്കം ഉണ്ടായത്. വോട്ടർ പട്ടികയിൽ പേര് ചേർക്കുന്നതിൻ്റെയും ഒഴിവാക്കുന്നതിൻ്റെയും കാര്യത്തിൽ ഇരുവിഭാഗങ്ങളുടെയും പ്രവർത്തകർ തമ്മിൽ കടുത്ത വാക്ക് പോരിനാണ് ഇറങ്ങിയത്. വ്യാഴാഴ്ചയും ഈ സംഘർഷാവസ്ഥ തുടർന്നു. യൂത്ത് ലീഗിൻ്റെ നേതൃത്വത്തിൽ ശക്തമായ പ്രതിഷേധമാണ് രണ്ടാം ദിനവും നഗരസഭയ്ക്കകത്ത് കാണാനായത്.
 
നഗരസഭാ ഓഫീസ് പരിസരം പോലീസിൻ്റെ കാവലിലായി മാറിയിട്ടുണ്ട്. ഉദ്യോഗസ്ഥർ ഇരുവിഭാഗങ്ങളെയും വിളിച്ച് വിശദീകരണം തേടിയെങ്കിലും വാദപ്രതിവാദങ്ങൾ നിയന്ത്രണാതീതമായി നീണ്ടു. തിരഞ്ഞെടുപ്പ് സമയത്ത് വോട്ടർ പട്ടികയിൽ പേരുകൾ ഉൾപ്പെടുത്തുകയോ ഒഴിവാക്കുകയോ ചെയ്യുന്നത് പ്രാദേശിക തലത്തിൽ വലിയ രാഷ്ട്രീയ പ്രത്യാഘാതങ്ങൾ ഉണ്ടാക്കുമെന്നതിനാൽ വിഷയത്തെ പാർട്ടികൾ ഏറെ ഗൗരവമായി കാണുന്നുണ്ട്.

‘യഥാർത്ഥ വോട്ടർമാരെ തള്ളിയിരിക്കുന്നു’ — ലീഗ്

‘നാട്ടിൽ സ്ഥിരതാമസമുള്ള നിരവധി യഥാർത്ഥ വോട്ടർമാരെയാണ് വിമതർ കള്ളപ്പരാതി നൽകി പട്ടികയിൽ നിന്ന് ഒഴിവാക്കിയത്. അതേസമയം ബാംഗ്ലൂരിലും മറ്റുചില വാർഡുകളിലും താമസിക്കുന്നവരെ ഇവർ വോട്ടർ പട്ടികയിൽ ഉൾപ്പെടുത്തിയിട്ടുണ്ട്. പല ലീഗ് പ്രവർത്തകരുടെയും പേരുകൾ അനാവശ്യമായി നീക്കം ചെയ്‌തത് തിരഞ്ഞെടുപ്പ് നടപടികളെ ബാധിക്കുന്നതാണ്’ എന്ന് മുസ്‌ലിം യൂത്ത് ലീഗ് നേതാവ് അഷറഫ് എടനീർ ആരോപിച്ചു. വിമതർ തിരഞ്ഞെടുപ്പ് നടപടിയെ തന്നെ ദുരുപയോഗപ്പെടുത്താനാണ് ശ്രമിക്കുന്നത്. വാർഡിൽ ലീഗിന് അനുകൂലമായ വോട്ടർമാരെ ലക്ഷ്യമിട്ടാണ് ആക്ഷേപങ്ങൾ ഉയർത്തിയതെന്ന ആരോപണമാണ് ലീഗ് ഉന്നയിക്കുന്നത്.

‘70 കള്ളവോട്ടുകൾ ചേർത്തതിൽ 44 എണ്ണം ഞങ്ങൾ തെളിയിച്ചു’ — വിമതർ

‘70 കള്ളവോട്ടുകൾ ചേർത്തതിൽ 44 എണ്ണം ഞങ്ങൾ തെളിയിച്ചുവെന്ന്’ ലീഗ് വിമത നേതാവ് നൗഷാദ് കരിപ്പോടി പറഞ്ഞു. ലീഗ് വോട്ടർ പട്ടികയിൽ 70 കള്ളവോട്ടുകൾ ചേർത്തിരുന്നു. ‘ഞങ്ങൾ നൽകിയ ആക്ഷേപം പരിശോധിച്ച ഉദ്യോഗസ്ഥർക്ക് കാര്യങ്ങൾ ബോധ്യപ്പെട്ടതിനാൽ 44 പേരെ പട്ടികയിൽ നിന്ന് നീക്കി. പിന്നീട് അവർ കൃത്യമായ രേഖകളില്ലാതെ വീണ്ടും പേരുകൾ ചേർക്കാൻ ശ്രമിക്കുമ്പോഴാണ് പ്രശ്നമായതും ലീഗ് നേതാക്കൾ ഉദ്യോഗസ്ഥരെ ഭീഷണിപ്പെടുത്തിയതും. അതാണ് സംഘർഷത്തിന് കാരണമായത്’ എന്നും അദ്ദേഹം കൂട്ടിച്ചേർത്തു.
ലീഗ് നേതാക്കൾ വോട്ടർമാരുടെ പേരുകൾ വീണ്ടും പട്ടികയിൽ ഉൾപ്പെടുത്താൻ ഉദ്യോഗസ്ഥ തലത്തിൽ സമ്മർദ്ദം ചെലുത്തുകയായിരുന്നു. ‘നിയമപ്രകാരമുള്ള നടപടികൾ നടപ്പിലാക്കാനുള്ള ഉദ്യോഗസ്ഥരുടെ ശ്രമം ലീഗ് നേതാക്കൾ തടഞ്ഞതാണ് പ്രശ്‌നത്തിന് തുടക്കമായത്’ എന്നും അദ്ദേഹം പറഞ്ഞു.

‘കള്ളവോട്ടുകൾക്ക് എതിരാണ് പ്രതിഷേധം’ — സി.പി.എം

‘ലീഗ് കള്ളവോട്ടുകൾ ചേർക്കാൻ ശ്രമിച്ചതിനെതിരെയാണ് വിമതരും തങ്ങളും പ്രതികരിച്ചത്’ എന്ന് സി.പി.എം. നേതാവ് അനിൽ ചെന്നിക്കര പ്രതികരിച്ചു. ജനാധിപത്യ നടപടികൾ തടസ്സപ്പെടുത്തുന്ന നീക്കങ്ങൾ അനുവദിക്കാനാവില്ല. തിരഞ്ഞെടുപ്പ് സംവിധാനം സുതാര്യമാക്കാൻ കമ്മീഷൻ ഇടപെടണമെന്നും അദ്ദേഹം പറഞ്ഞു.

കാസർകോട്ടെ ഈ രാഷ്ട്രീയ സംഘർഷത്തെക്കുറിച്ചുള്ള നിങ്ങളുടെ അഭിപ്രായം കമൻ്റ് ചെയ്യുക.

Article Summary: Clash in Kasaragod Municipal Office between Muslim League and rebels over voter list.

#Kasaragod #LocalPolls #IUML #VoterList #PoliticalClash #Kerala