വൈദ്യുതി മുടക്കം പതിവായി! നാട്ടിലെമ്പാടും അപ്രഖ്യാപിത പവർകട്ട്; കൊടുംചൂടിൽ ജനങ്ങൾ വെന്തുരുകുന്നു; ലോഡ്ഷെഡിങിന് സാധ്യതയെന്ന് സൂചന

കുഞ്ഞികണ്ണൻ മുട്ടത്ത് 

കാസർകോട്: (KasargodVartha) കൊടുംചൂട് തുടരുന്നതിനിടെ അപ്രഖ്യാപിത പവർകട്ട് വ്യാപകമാകുന്നത് ജനജീവിതത്തെ പ്രതികൂലമായി ബാധിക്കുന്നു. നഗര-ഗ്രാമ ഭേദമില്ലാതെ പല ഭാഗങ്ങളിലും ദിവസവും രാവെന്നോ പകലെന്നോ ഭേദമില്ലാതെ വിവിധ സമയങ്ങളിൽ വൈദ്യുതി മുടങ്ങുന്നത് പതിവാകുകയാണ്. 15 മിനിറ്റ് മുതൽ അര മണിക്കൂർ വരെ നീളുന്ന വൈദ്യുതി നിയന്ത്രണമാണ് അനുഭവപ്പെടുന്നത്. മുന്നറിയിപ്പില്ലാതെ വൈദ്യുതി മുടങ്ങുന്നത് വീട്ടുപകരണങ്ങൾക്കും ചെറുകിട വ്യാപാര സ്ഥാപനങ്ങൾക്കും വലിയ സാമ്പത്തിക നഷ്ടമുണ്ടാക്കുന്നതായി പരാതിയുണ്ട്.

രോഗികൾക്ക് ഭീഷണി 

കടുത്ത ചൂടിൽ ഫാൻ, എസി തുടങ്ങിയ ഉപകരണങ്ങൾ പ്രവർത്തിക്കാത്തത് പൊതുജനങ്ങളെ വലയ്ക്കുമ്പോൾ, വൈദ്യുതിയെ ആശ്രയിച്ച് ജീവൻ നിലനിർത്തുന്ന രോഗികൾക്ക് ഇത് വലിയ ഭീഷണിയാകുന്നു. കാഞ്ഞങ്ങാട് കല്ലൂരാവിയിൽ ഒരു കിടപ്പ് രോഗിക്ക് ഒക്സിജൻ സിലിണ്ടർ പ്രവർത്തിപ്പിക്കാനായി മണിക്കൂറിന് 500 രൂപ വീതം ചെലവാക്കി ജനറേറ്റർ ഉപയോഗിക്കേണ്ടി വരുന്ന ദാരുണ സാഹചര്യം ഒരു ബന്ധു പങ്കുവെച്ചു. പകൽ സമയത്തെ അറ്റകുറ്റപ്പണികൾക്ക് പുറമെ രാത്രിയിലെ നിയന്ത്രണം കൂടി ആയതോടെ ജനങ്ങൾ കടുത്ത പ്രതിഷേധത്തിലാണ്. പാതിരാത്രിയിലും ചിലദിവസങ്ങളിൽ മണിക്കൂറുകളോളം വൈദ്യതി മുടങ്ങിയിട്ടുണ്ട്.

ലോഡ്ഷെഡിങ് പടിവാതിൽക്കൽ 

സംസ്ഥാനത്ത് ലോഡ്ഷെഡിങ് പ്രഖ്യാപിക്കാനുള്ള സാധ്യതയുണ്ടെന്ന് വൈദ്യുതി മേഖലയുമായി ബന്ധപ്പെട്ടവർ സൂചിപ്പിക്കുന്നു. നിലവിലെ അപ്രഖ്യാപിത നിയന്ത്രണങ്ങൾ ഉടൻ തന്നെ സമയക്രമമനുസരിച്ചുള്ള ലോഡ്ഷെഡിങായി മാറിയേക്കാം. വൈദ്യുതി ആവശ്യകതയിൽ പ്രതിദിനം 50 മെഗാവാട്ടിൻ്റെ വർധനവാണ് രേഖപ്പെടുത്തുന്നത്. മറ്റ് സംസ്ഥാനങ്ങളിൽ നിന്ന് ലഭിച്ചിരുന്ന വൈദ്യുതിയിൽ ഏകദേശം 200 മെഗാവാട്ടിൻ്റെ കുറവ് സംഭവിച്ചതും വിതരണത്തെ ബാധിച്ചിട്ടുണ്ട്. ഉച്ചസമയത്തും വൈകുന്നേരവും ഗ്രിഡിന് മേൽ അമിതഭാരം അനുഭവപ്പെടുന്നത് പ്രതിസന്ധി വർധിപ്പിക്കുന്നു.

ഉപഭോഗം കുറയ്ക്കാൻ നിർദ്ദേശം 

വൈകുന്നേരം ആറ് മുതൽ രാത്രി 10 വരെ ഇൻഡക്ഷൻ അടുപ്പ്, വാഷിങ് മെഷീൻ, അയൺ ബോക്സ്, മിക്സർ-ഗ്രൈൻഡർ, വാട്ടർ പമ്പ് തുടങ്ങിയ കൂടുതൽ വൈദ്യുതി ആവശ്യമായ ഉപകരണങ്ങൾ പ്രവർത്തിപ്പിക്കാതിരിക്കാൻ അധികൃതർ ആവശ്യപ്പെട്ടു. ആവശ്യമില്ലാതെ കത്തുന്ന ലൈറ്റുകളും എസി, ഫാൻ എന്നിവയും ഓഫ് ചെയ്യണം. ആശുപത്രികൾ ബാക്കപ്പ് സംവിധാനങ്ങൾ ഉറപ്പാക്കണമെന്ന് ആരോഗ്യവകുപ്പ് ജാഗ്രതാനിർദ്ദേശം നൽകി. ദീർഘകാല കരാറുകൾ വഴി വൈദ്യുതി ഉറപ്പാക്കാൻ റെഗുലേറ്ററി കമ്മീഷൻ്റെ അനുമതി തേടിയിട്ടുണ്ട്. ഇതിനായുള്ള തെളിവെടുപ്പ് ഈ മാസം നടക്കും.

വൈദ്യുതി പ്രതിസന്ധിയെക്കുറിച്ചുള്ള നിങ്ങളുടെ അഭിപ്രായങ്ങൾ ഈ വാർത്തയുടെ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്താൻ മറക്കരുത്. വൈദ്യുതി മുടക്കം നിങ്ങളുടെ ജോലിയെയും കുടുംബത്തെയും എത്തരത്തിൽ ബാധിക്കുന്നു? നിങ്ങളുടെ സുഹൃത്തുക്കൾക്ക് ഈ വാർത്ത വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: Kasaragod district is experiencing severe unannounced power cuts amid extreme heat, impacting patients and businesses, with KSEB warning of impending scheduled load shedding.

#KasaragodPowerCut #KSEB #LoadSheddingKerala #SummerHeat #KasaragodNews #ElectricityCrisis #BreakingNews #Kvartha #Kanhangad #KeralaNews