ചരിത്രത്തിൽ സുവർണ്ണ ലിപികളിൽ ഈ ദിനം: കാസർകോടിനെ അതി ദാരിദ്ര്യമുക്തമായി പ്രഖ്യാപിച്ച് മന്ത്രി

കാസർകോട്: (KasargodVratha) ജില്ലയുടെ ചരിത്രത്തിൽ ഈ ദിനം സുവർണ്ണ ലിപികളിൽ അടയാളപ്പെടുത്തപ്പെടുമെന്ന് ആരോഗ്യ വനിതാ ശിശു വികസന വകുപ്പ് മന്ത്രി വീണ ജോർജ്ജ് പറഞ്ഞു. കാസർകോട് ജില്ലയെ അതിദാരിദ്ര്യ മുക്തമായി പ്രഖ്യാപിച്ചുകൊണ്ട് സംസാരിക്കുകയായിരുന്നു മന്ത്രി. 

അതി ദാരിദ്ര്യ നിർമ്മാർജ്ജനത്തിൽ ചരിത്രം കുറിച്ച ജില്ലാ പഞ്ചായത്തിനും തദ്ദേശ സ്വയം ഭരണ സ്ഥാപനങ്ങൾക്കും എം.എൽ.എമാരുടെയും വിവിധ വകുപ്പ് ഉദ്യോഗസ്ഥരുടെയും ക്രിയാത്മക പ്രവർത്തനങ്ങൾക്കും മന്ത്രി അഭിനന്ദനം അറിയിച്ചു.

2072 അതി ദരിദ്ര കുടുംബങ്ങൾക്ക് ആശ്വാസം

ജില്ലയിൽ 2072 അതി ദരിദ്ര കുടുംബങ്ങൾ ഉണ്ടായിരുന്നതായി മന്ത്രി അറിയിച്ചു. ഇവരെ കൃത്യമായ മാനദണ്ഡങ്ങളിലൂടെ കണ്ടുപിടിച്ച് ആവശ്യമായ സഹായങ്ങൾ നൽകി ഉയർത്തിക്കൊണ്ടു വരാൻ സാധിച്ചു. ഭക്ഷണം, ആരോഗ്യം, സുരക്ഷിത താമസ സ്ഥലം, അടിസ്ഥാന വരുമാനം എന്നിവ ഉറപ്പാക്കിയാണ് അതി ദാരിദ്ര്യ നിർമ്മാർജ്ജനം സാധ്യമാക്കിയത്.

അതി ദരിദ്രർക്ക് അവകാശ രേഖകളായ വാസയോഗ്യമായ വീടുകൾ, റേഷൻ കാർഡുകൾ, ആധാർ കാർഡ്, വോട്ടർ കാർഡ്, സാമൂഹ്യ സുരക്ഷാ പെൻഷൻ, ഗ്യാസ് കണക്ഷൻ, തൊഴിൽ കാർഡ് എന്നിവ നൽകി ജില്ലയെ ദാരിദ്ര്യ മുക്തമാക്കാൻ നടത്തിയ പരിശ്രമങ്ങൾ വിജയത്തിലെത്തി. ഈ പരിശ്രമങ്ങളെ മന്ത്രി പ്രത്യേകം എടുത്തുപറഞ്ഞു.

ജില്ലാ പഞ്ചായത്തിന് ആദരം

ദാരിദ്ര്യ നിർമ്മാർജ്ജനത്തിനായി 50 കോടി രൂപ മാറ്റിവെച്ച ജില്ലാ പഞ്ചായത്തിനുള്ള ആദരവ് ചടങ്ങിൽ ജില്ലാ പഞ്ചായത്ത് പ്രസിഡന്റ് പി. ബേബി ബാലകൃഷ്ണൻ ഏറ്റുവാങ്ങി. പദ്ധതിക്ക് വേണ്ടി ഉദ്യോഗസ്ഥരെ ഏകോപിപ്പിച്ച് പ്രവർത്തിച്ച ജില്ലാ കളക്ടർ കെ. ഇമ്പശേഖറിനെയും ചടങ്ങിൽ ആദരിച്ചു.

ജില്ലാ പഞ്ചായത്ത് അങ്കണത്തിൽ നടന്ന ചടങ്ങിൽ എൻ.എ നെല്ലിക്കുന്ന് എം.എൽ.എ അധ്യക്ഷത വഹിച്ചു. എം.പി രാജ്‌മോഹൻ ഉണ്ണിത്താൻ മുഖ്യാതിഥിയായിരുന്നു. ജില്ലാ കളക്ടർ കെ. ഇമ്പശേഖർ പദ്ധതിയുടെ അവതരണം നടത്തി.

പോസ്റ്റർ പ്രകാശനങ്ങളും ആദരവും

കുടുംബശ്രീയുടെ 'ബാക് ടു ഫാമിലി' പോസ്റ്റർ മന്ത്രി വീണ ജോർജ്ജ് ചടങ്ങിൽ പ്രകാശനം ചെയ്തു. തൊഴിൽ വകുപ്പിന്റെ ക്ഷേമ പദ്ധതികൾ ജനങ്ങളിൽ എത്തിക്കുന്ന 'പീടിക ആപ്പി'ന്റെ കന്നഡ, മലയാളം പോസ്റ്ററുകളുടെ പ്രദർശനവും നടന്നു. ജില്ലാ പഞ്ചായത്തും ഫസ്റ്റ് മദർ ഫൗണ്ടേഷനും ചേർന്നൊരുക്കുന്ന 'ജീവനാളം' പദ്ധതിയുടെ പോസ്റ്റർ പ്രദർശനവും ഇതോടനുബന്ധിച്ച് നടന്നു.

ജില്ലയെ അതിദാരിദ്ര്യ മുക്തമാക്കൻ പ്രവർത്തിച്ചവരിൽ തദ്ദേശ സ്വയം ഭരണ വകുപ്പ് ഡെപ്യൂട്ടി ഡയറക്ടർ കെ.വി ഹരിദാസ്, പി.എ.യു ഹെഡ് ക്ലാർക്ക് സി.എച്ച് സിനോജ്, ഐ.റ്റി പ്രൊഫഷണൽ അനീഷ കെ.വി, സെക്ഷൻ ക്ലാർക്ക് വിദ്യാലക്ഷ്മി എന്നിവരെ ചടങ്ങിൽ ആദരിച്ചു. 

എം.എൽ.എമാരായ എം. രാജഗോപാലൻ, ഇ. ചന്ദ്രശേഖരൻ, സി.എച്ച്. കുഞ്ഞമ്പു, എ.കെ.എം. അഷറഫ്, ജില്ലാ പഞ്ചായത്ത് വൈസ് പ്രസിഡന്റ് ഷാനവാസ് പാദൂർ എന്നിവർ വിശിഷ്ടാതിഥികളായി പങ്കെടുത്തു.

കാസർകോട് നഗരസഭ ചെയർപേഴ്‌സൺ അബ്ബാസ് ബീഗം, ചെങ്കള ഗ്രാമപഞ്ചായത്ത് പ്രസിഡന്റ് ഖാദർ ബദരിയ, ജില്ലാ പഞ്ചായത്ത് സ്ഥിരം സമിതി അധ്യക്ഷൻമാരായ കെ. ശകുന്തള, അഡ്വ. എസ്.എൻ സരിത, ജില്ലാ പഞ്ചായത്ത് മെമ്പർ ജാസ്മീൻ കബീർ, ജില്ലാ പഞ്ചായത്ത് സെക്രട്ടറി ശ്യാമ ലക്ഷ്മി, ജില്ലാ പ്ലാനിംഗ് ഓഫീസർ ടി. രാജേഷ്, എൽ.എസ്.ജി.ഡി. ഡെപ്യൂട്ടി ഡയറക്ടർ കെ.വി. ഹരിദാസ്, അതിദാരിദ്ര്യ നിർമ്മാർജ്ജന പദ്ധതി ജില്ലാ നോഡൽ ഓഫീസറും പ്രോജക്റ്റ് ഡയറക്ടറുമായ ടി.ടി. സുരേന്ദ്രൻ, നവകേരളം പദ്ധതി ജില്ലാ കോ-ഓർഡിനേറ്റർ കെ. ബാലകൃഷ്ണൻ, ലൈഫ് മിഷൻ കോ-ഓർഡിനേറ്റർ എം. വൽസൻ, കുടുംബശ്രീ ജില്ലാ മിഷൻ കോഡിനേറ്റർ കെ. രതീഷ് കുമാർ എന്നിവർ സംസാരിച്ചു. ജില്ലാ പഞ്ചായത്ത് പ്രസിഡന്റും ഡി.പി.സി ചെയർപേഴ്‌സണുമായ ബേബി ബാലകൃഷൻ സ്വാഗതവും ജില്ലാ ജോയിന്റ് ഡയറക്ടർ എൽ.എസ്.ജി.ഡി. ആർ. ഷൈനി നന്ദിയും പറഞ്ഞു.

കാസർകോടിൻ്റെ ഈ ചരിത്ര നേട്ടം നിങ്ങൾ എങ്ങനെ കാണുന്നു? 1) വാർത്ത നിങ്ങളുടെ സുഹൃത്തുക്കളുമായി പങ്കുവെക്കുക. കമൻ്റ് ചെയ്ത് നിങ്ങളുടെ അഭിപ്രായം അറിയിക്കുക. 

Article Summary: Kasaragod becomes ultra-poverty free, helping 2072 families with basic needs and documents.

#Kasargod #UltraPovertyFree #VeenaGeorge #KeralaDevelopment #PovertyAlleviation #KeralaNews