കാറ്റിലും മഴയിലും നാശം; കാസർകോട്ട് രണ്ടിടത്ത് മരം വീണ് ഗതാഗതം തടസ്സപ്പെട്ടു

കാസർകോട്: (KasargodVartha) ജില്ലയിൽ ചൊവ്വാഴ്ച പുലർച്ചെ മുതൽ പെയ്ത ശക്തമായ കാറ്റിലും മഴയിലും രണ്ടിടത്ത് മരം വീണ് ഗതാഗതം തടസ്സപ്പെട്ടു. കറന്തക്കാടും ചെർക്കളയിലുമാണ് മരങ്ങൾ കടപുഴകി വീണത്.

ചൊവ്വാഴ്ച പുലർച്ചെ നാല് മണിയോടെ കറന്തക്കാട് ഹോണ്ട ഷോറൂമിന് സമീപം സർവീസ് റോഡിനരികിൽ നിന്നിരുന്ന വലിയ മരം ദേശീയപാതയ്ക്ക് കുറുകെ, വൈദ്യുതി ലൈനുകൾക്ക് മുകളിലേക്ക് വീഴുകയായിരുന്നു. ഇതോടെ രാവിലെ മുതൽ ഗതാഗതം പൂർണ്ണമായും തടസ്സപ്പെട്ടു. നാട്ടുകാർ അഗ്നിരക്ഷാസേനയെ വിവരമറിയിച്ചതിനെ തുടർന്ന് സീനിയർ ഫയർ ആൻഡ് റെസ്ക്യൂ ഓഫീസർ വി.എൻ. വേണുഗോപാലിൻ്റെ നേതൃത്വത്തിൽ സേനയും പ്രദേശവാസികളും ചേർന്ന് മരം മുറിച്ചുമാറ്റി.

മരം വീണതിനെത്തുടർന്ന് എൽ.ടി. ലൈനുകളും മറ്റ് കേബിളുകളും വൈദ്യുതി പോസ്റ്റും പൊട്ടി റോഡിലേക്ക് വീണിരുന്നു. കെ.എസ്.ഇ.ബി. ജീവനക്കാർ സ്ഥലത്തെത്തി ലൈൻ ഓഫ് ആക്കി കേബിളുകളും കമ്പികളും മുറിച്ചുമാറ്റിയതിന് ശേഷമാണ് അഗ്നിരക്ഷാസേനയ്ക്ക് തടസ്സങ്ങൾ നീക്കാൻ കഴിഞ്ഞത്.

ഇതിന് സമാനമായി, ചെർക്കള - ബദിയടുക്ക സ്റ്റേറ്റ് ഹൈവേയിലും വലിയ അക്കേഷ്യ മരം വീണ് റോഡ് ഗതാഗതം തടസ്സപ്പെട്ടു. അഗ്നിരക്ഷാസേനയെത്തി മരം മുറിച്ചു നീക്കിയാണ് റോഡ് ഗതാഗതം പുനഃസ്ഥാപിച്ചത്. സേനാംഗങ്ങളായ എം. രമേശ, ജീവൻ പി.ജി., എച്ച്. ഉമേശൻ, പി. രാജേഷ്, അഖിൽ അശോകൻ, അമൽരാജ് ടി., ഹോം ഗാർഡ് പി.വി. രഞ്ജിത്ത് എന്നിവർ ദൗത്യസംഘത്തിൽ ഉണ്ടായിരുന്നു.

കാസർകോട്ടെ മഴക്കെടുതിയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. വാർത്ത നിങ്ങളുടെ സുഹൃത്തുക്കളുമായി ഷെയർ ചെയ്യൂ.

Article Summary: Heavy rain and wind in Kasaragod caused trees to fall in Karanthakkad and Cherkala, blocking roads. Fire and rescue services, along with KSEB, cleared the trees and restored traffic after significant disruption.

#Kasaragod, #TreeFall, #MonsoonKerala, #TrafficJam, #RoadBlock, #KeralaRains