യുവതയെ വേട്ടയാടുന്ന വിപത്താണ് ലഹരി; 'ഐ ആം എ തൂഫാൻ വാരിയർ' പരിപാടിയിൽ രാജ്‌മോഹൻ ഉണ്ണിത്താൻ എംപി

കാസർകോട്: (KasargodVartha) രാജ്യത്തിൻ്റെ ഏറ്റവും വലിയ സമ്പത്തായ വിദ്യാർഥികളെയും യുവജനങ്ങളെയും വേട്ടയാടുന്ന വിപത്താണ് ലഹരിയെന്ന് രാജ്‌മോഹൻ ഉണ്ണിത്താൻ എംപി. നാശാ മുക്ത് ഭാരത് അഭിയാൻ്റെ ഭാഗമായി ജില്ലാ സാമൂഹ്യനീതി വകുപ്പും ജില്ലാ പൊലീസും സംയുക്തമായി മുൻസിപ്പൽ സ്റ്റേഡിയത്തിൽ സംഘടിപ്പിച്ച 'ഐ ആം എ തൂഫാൻ വാരിയർ' ലഹരിവിരുദ്ധ ബോധവൽക്കരണ പരിപാടിയിൽ സന്ദേശം നൽകുകയായിരുന്നു അദ്ദേഹം.

എല്ലാവരും കൈകോർക്കണം

ലഹരിക്കെതിരെയുള്ള പോരാട്ടം പൊലീസിൻ്റെയോ എക്സൈസിൻ്റെയോ മാത്രം ചുമതലയല്ലെന്നും വിദ്യാർഥികളും രക്ഷിതാക്കളും അധ്യാപകരും ഉൾപ്പെടെ സമൂഹത്തിലെ എല്ലാ വിഭാഗങ്ങളും ഇതിൻ്റെ ഭാഗമാകണമെന്നും എംപി ഓർമിപ്പിച്ചു. ആഭ്യന്തരവകുപ്പിൻ്റെ 'ഓപ്പറേഷൻ തൂഫാൻ' വഴി 10 കോടി രൂപയുടെ മയക്കുമരുന്ന് പിടിച്ചെടുക്കാനും 3000-ത്തോളം പേരെ അറസ്റ്റ് ചെയ്യാനും സാധിച്ചതായി അദ്ദേഹം വ്യക്തമാക്കി. 19-ാം നൂറ്റാണ്ടിൽ ചൈന ഒപ്പിയം വാറിലൂടെ ലഹരി മാഫിയയ്ക്ക് മറുപടി നൽകിയതുപോലെ, 'തൂഫാനി'ലൂടെ നമുക്കും ഈ വിപത്തിനെ തുടച്ചുനീക്കാൻ സാധിക്കണമെന്ന് അദ്ദേഹം ആഹ്വാനം ചെയ്തു.

മയക്കുമരുന്ന് വേട്ടയ്ക്ക് തുടക്കം കുറിച്ച ആഭ്യന്തരവകുപ്പിൻ്റെ പ്രവർത്തനം അഭിനന്ദനാർഹമാണെന്നും ലഹരിവിരുദ്ധ ദൗത്യങ്ങൾ വിജയകരമാക്കാൻ വിദ്യാർഥികളാണ് മുന്നിൽ നിൽക്കേണ്ടതെന്നും ചടങ്ങിൽ സംസാരിച്ച കല്ലട്ര മാഹിൻ പറഞ്ഞു. ലഹരി മാഫിയയുടെ തായ്വേര് പിഴുതെറിയാൻ ജില്ലാ പഞ്ചായത്തിൻ്റെ പൂർണ പിന്തുണയുണ്ടാകുമെന്ന് ജില്ലാ പഞ്ചായത്ത് പ്രസിഡൻ്റ് സാബു എബ്രഹാം വ്യക്തമാക്കി. ജനപ്രതിനിധികളുടെ സന്ദേശത്തിന് ശേഷം നടന്ന 'സൈലൻ്റ് സെഷനിൽ' കാഞ്ഞങ്ങാട് ദുർഗ ഹയർസെക്കൻഡറി സ്കൂൾ അധ്യാപിക എം തുഷാര, ലഹരി വരുത്തിവെക്കുന്ന ദുരന്തങ്ങളുടെ നേർച്ചിത്രം കുട്ടികളുടെ ഹൃദയത്തിൽ സ്പർശിക്കും വിധം അവതരിപ്പിച്ചു. തുടർന്ന് എഎസ്പി അച്യുത് അശോക് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.

ദീപശിഖാ പ്രയാണവും റിയാലിറ്റി സെക്ഷനും

തുടർന്ന് നടന്ന ദീപശിഖാ പ്രയാണത്തിൽ, ജില്ലാ പൊലീസ് മേധാവി പി നിധിൻ രാജ് കൊളുത്തി നൽകിയ തൂഫാൻ ദീപശിഖ അത്ലറ്റുകൾ ഏറ്റുവാങ്ങി സ്റ്റേഡിയം വലംവെച്ചു. ജില്ലാ കളക്ടർ അർജുൻ പാണ്ഡ്യൻ ദീപശിഖ ഏറ്റുവാങ്ങി മൈതാന മധ്യത്തിൽ സ്ഥാപിച്ചു. ഇതിനുശേഷം നടന്ന 'റിയാലിറ്റി സെക്ഷൻ' ഏവരുടെയും ശ്രദ്ധ പിടിച്ചുപറ്റി.

ജില്ലാ കളക്ടറുടെയും ജില്ലാ പൊലീസ് മേധാവിയുടെയും നേതൃത്വത്തിൽ ഗ്രൗണ്ടിൽ അണിനിരന്ന കുട്ടികളോട് ലഹരിക്ക് മുൻപിൽ സ്വപ്നങ്ങൾ തകർക്കാൻ തയ്യാറാണോ എന്ന ചോദ്യത്തിന് 'ഇല്ല' എന്ന് വിദ്യാർഥികൾ ഉറക്കെ മറുപടി നൽകി. ജീവിതവും പുസ്തകങ്ങളും ഫുട്ബോളുമാണ് തങ്ങളുടെ യഥാർഥ ലഹരിയെന്ന് കുട്ടികൾ ഒരേസ്വരത്തിൽ പ്രഖ്യാപിച്ചു.

വിസ്മയമായി ഹ്യൂമൻ ഫോർമേഷൻ

വിവിധ സ്കൂളുകളിൽ നിന്നായി 2000-ത്തോളം വിദ്യാർഥികളാണ് പരിപാടിയിൽ പങ്കെടുത്തത്. സ്റ്റുഡൻ്റ്സ് പൊലീസ് കേഡറ്റുകളുടെ നേതൃത്വത്തിലുള്ള തൂഫാൻ പ്രവേശനത്തോടെയാണ് പരിപാടികൾ ആരംഭിച്ചത്. മൈതാനത്ത് വിദ്യാർഥികൾ അണിനിരന്ന് തീർത്ത 'NMBA തൂഫാൻ ഐ ഹേറ്റ് ഡ്രഗ്സ്' എന്ന ഹ്യൂമൻ ഫോർമേഷൻ്റെ ആകാശ ദൃശ്യം ഡ്രോൺ ക്യാമറയിൽ പതിഞ്ഞത് വേറിട്ട കാഴ്ചയായി മാറി. ഇതിൻ്റെ ഇരുവശങ്ങളിലുമായി ലഹരിയെ പ്രതിരോധിക്കുന്ന മനുഷ്യരൂപങ്ങളും കുട്ടികൾ സൃഷ്ടിച്ചിരുന്നു. തങ്ങൾ ഓരോരുത്തരും 'തൂഫാൻ വാരിയേഴ്സ്' ആണെന്ന് പ്രഖ്യാപിച്ചാണ് കുട്ടികൾ മടങ്ങിയത്.

യോഗ അഭ്യാസത്തിൽ ഏഷ്യാ ബുക്ക് ഓഫ് വേൾഡ് റെക്കോർഡ്സ് നേടിയ വിദ്യാർഥിനി അഭിജ്ഞയെ ജില്ലാ കളക്ടറും ജില്ലാ പൊലീസ് മേധാവിയും ചേർന്ന് അനുമോദിച്ചു. അഭിജ്ഞയുടെ യോഗ അഭ്യാസമുറകളും വിവിധ സ്കൂളുകളിലെ കുട്ടികൾ പങ്കെടുത്ത ലഹരിവിരുദ്ധ നൃത്തസംഗീത ശിൽപവും അരങ്ങേറി. ഗ്രൗണ്ടിൽ അക്ഷരങ്ങൾ രൂപകൽപന ചെയ്ത ആർട്ടിസ്റ്റുകളായ വരദ നാരായണൻ, വിജയകുമാർ എന്നിവരെ ചടങ്ങിൽ ആദരിക്കുകയും പങ്കെടുത്ത സ്കൂളുകൾക്ക് മെമെൻ്റോകൾ വിതരണം ചെയ്യുകയും ചെയ്തു.

കാസർകോട് നഗരസഭ ചെയർപേഴ്സൺ ഷാഹിന സലീം, അഡീഷണൽ സൂപ്രണ്ട് ഓഫ് പൊലീസ് സി എം ദേവദാസൻ, ജില്ലാ വിദ്യാഭ്യാസ ഡെപ്യൂട്ടി ഡയറക്ടർ ടി ഷൈല, ജില്ലാ സാമൂഹ്യനീതി ഓഫീസർ ആര്യ പി രാജ് എന്നിവർ ചടങ്ങിൽ സംസാരിച്ചു. ദേശീയഗാനത്തോടെയാണ് പരിപാടികൾ സമാപിച്ചത്.

വിദ്യാർഥികൾക്കും രക്ഷിതാക്കൾക്കും ഏറെ ഉപകാരപ്രദമായ ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകൾക്കും പങ്കുവെക്കുക. പുതിയ അപ്ഡേറ്റുകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്താൻ മറക്കരുത്.

Article Summary: Rajmohan Unnithan MP addressed the 'I am a Toofan Warrior' anti-drug awareness program jointly organized by the District Social Justice Department and District Police, urging students and society to unite against the drug mafia.

#AntiDrugCampaign #KasaragodNews #ToofanWarrior #NMBA #KeralaPolice #DrugAwareness #YouthEmpowerment #AparnaNews