തളങ്കരയിൽ നിന്നും ബസിൽ കാസർകോട് നഗരത്തിലെത്താൻ ഒരു മണിക്കൂർ!

 കാസർകോട്: (KasargodVartha) കറന്തക്കാട്-തായലങ്ങാടി-റെയിൽവേ സ്റ്റേഷൻ റോഡ് നിർമ്മാണം എട്ടു മാസമായിട്ടും എങ്ങുമെത്താതെ ഇഴഞ്ഞു നീങ്ങുന്നു. പണിത ഭാഗങ്ങൾ കുളമായതോടെ കഴിഞ്ഞ രണ്ടു ദിവസമായി ഇവിടെ രൂക്ഷമായ ഗതാഗതക്കുരുക്കാണ് അനുഭവപ്പെടുന്നത്.

തളങ്കരയിൽ നിന്ന് ബസ്സിൽ കാസർകോട്ടെ പുതിയ ബസ് സ്റ്റാൻഡിൽ എത്താൻ ഇപ്പോൾ ഒരു മണിക്കൂറിലധികം സമയമെടുക്കുന്നു. വെറും മൂന്നര കിലോമീറ്റർ ദൂരത്തിന് വാഹനത്തിൽ ഇത്രയധികം സമയം നഷ്ടപ്പെടുന്നത് യാത്രക്കാരെ വലയ്ക്കുകയാണ്.

കാലവർഷം അടുത്തെത്തിയതോടെ അധികൃതർ തിരക്കിട്ട് ടാറിംഗ് നടത്തി താൽക്കാലികമായി പ്രശ്നം പരിഹരിക്കാൻ ശ്രമിക്കുകയാണെന്നാണ് ആരോപണം. റോഡിന് തടസ്സമായ ഏഴോളം ഇലക്ട്രിക് പോസ്റ്റുകളും ഒരു ട്രാൻസ്ഫോർമറും മാറ്റുന്നതിനുള്ള നടപടികൾ ഇതുവരെ സ്വീകരിച്ചിട്ടില്ല. ഇത് കാൽനടയാത്ര പോലും ദുഷ്കരമാക്കിയിരിക്കുകയാണ്.

കാസർകോട് വികസന പാക്കേജിൽ ഉൾപ്പെടുത്തി രണ്ട് ഘട്ടങ്ങളിലായി 10 കോടി രൂപ ചെലവഴിച്ചാണ് ഈ റോഡ് നവീകരണം നടത്തുന്നത്. കാലവർഷം ആരംഭിക്കാൻ ദിവസങ്ങൾ മാത്രം ബാക്കിനിൽക്കെ, കറന്തക്കാട് മുതൽ മെക്കാഡം ടാറിംഗ് ആരംഭിച്ചതോടെയാണ് ഗതാഗതക്കുരുക്ക് രൂക്ഷമായത്. ബിഎംബിസി സാങ്കേതികവിദ്യ ഉപയോഗിച്ചാണ് റോഡ് നിർമ്മിക്കുന്നത്.

പൊതുമരാമത്ത് വകുപ്പ്, വാട്ടർ അതോറിറ്റി, കെഎസ്ഇബി, റെയിൽവേ തുടങ്ങിയ വിവിധ വകുപ്പുകൾ തമ്മിലുള്ള ഏകോപനമില്ലായ്മയാണ് ഈ ദുരവസ്ഥയ്ക്ക് കാരണമെന്ന് പൊതുപ്രവർത്തകനും യഫ തായലങ്ങാടി പ്രസിഡണ്ടുമായ നിയാസ് സോല കുറ്റപ്പെടുത്തി. പ്രാദേശിക എംഎൽഎയും നഗരസഭാ ചെയർമാനും ഇടപെട്ടിരുന്നെങ്കിൽ നേരത്തെ പ്രശ്നത്തിന് പരിഹാരം കാണാൻ സാധിക്കുമായിരുന്നുവെന്നും അദ്ദേഹം കാസർകോട് വാർത്തയോട് പറഞ്ഞു.

ബിറ്റുമിൻ മെക്കാഡം, ബിറ്റുമിൻ കോൺക്രീറ്റ് രീതിയിലാണ് നിർമ്മാണം പുരോഗമിക്കുന്നത്. കറന്തക്കാട് മുതൽ റെയിൽവേ സ്റ്റേഷനിലെ ക്ലോക്ക് ടവർ വരെ ഒന്നര കിലോമീറ്റർ ദൂരം പൊതുമരാമത്ത് ഫണ്ടിൽ നിന്ന് അഞ്ചു കോടി രൂപയും, അവിടെ നിന്ന് റെയിൽവേ സ്റ്റേഷൻ തെരുവത്ത് റോഡ് വരെ 700 മീറ്റർ ദൂരം കാസർകോട് വികസന പാക്കേജിൽ നിന്ന് അഞ്ചു കോടി രൂപയും ചെലവഴിച്ചാണ് നവീകരിക്കുന്നത്.

വാഹനങ്ങളും കാൽനടയാത്രക്കാരും ധാരാളമായി കടന്നുപോകുന്ന ഈ റോഡിന്റെ പല ഭാഗങ്ങളിലും വാഹനങ്ങൾക്ക് പോകാൻ പോലും ബുദ്ധിമുട്ടുള്ള അവസ്ഥയാണ് നിലവിലുള്ളത്.

കാസർകോട്-പള്ളം റോഡ് ജംഗ്ഷൻ മുതൽ ട്രാഫിക് സർക്കിൾ വഴി റെയിൽവേ സ്റ്റേഷൻ റോഡിലെ ക്ലോക്ക് ടവർ വരെയുള്ള ഭാഗത്ത് നടപ്പാത, ഇൻ്റർലോക്ക്, മെക്കാഡം ടാറിംഗ് എന്നിവ പൂർത്തിയാകുന്നതോടെ നിശ്ചലാവസ്ഥയിലായിരുന്ന നഗരം വീണ്ടും സജീവമാകുമെന്നാണ് പ്രതീക്ഷ.

ഓവുചാലിന്റെ നിർമ്മാണം കാസർകോട്-പള്ളം റോഡ് ജംഗ്ഷനിലെ ട്രാഫിക് സർക്കിൾ മുതൽ സ്റ്റേറ്റ് ബാങ്ക് ഓഫ് ഇന്ത്യയ്ക്ക് സമീപം വരെ കടയുടമകൾ സ്വമേധയാ വിട്ടുനൽകിയ ഒന്നര മീറ്റർ സ്ഥലത്താണ് നടക്കുന്നത്. ഫണ്ട് കുറവായതിനാൽ ഏറ്റവും പഴകിയതും തകർന്നതുമായ ഓവുചാൽ മാത്രമാണ് പുതുക്കിപ്പണിയുന്നത്.

ഡ്രെയിനേജ് കം നടപ്പാതയുടെ വീതി 1.2 മീറ്ററാണ്. വ്യാപാരികൾ സ്ഥലം വിട്ടുനൽകിയതിന് ശേഷമാണ് നിർമ്മാണം ആരംഭിച്ചത്. നവീകരണം തുടങ്ങിയതോടെ പല കടകളും അടച്ചിടേണ്ടി വന്നു.

റോഡരികിലെ സ്ഥലം ഏറ്റെടുക്കാൻ പണം നൽകാത്തതിനാൽ പൊളിച്ച കെട്ടിടത്തോട് ചേർന്ന് പുതിയ മുറികൾ നിർമ്മിച്ചത് കാരണം പല കെട്ടിടങ്ങളും ഡ്രെയിനേജിനോട് ചേർന്നാണ് നിൽക്കുന്നത്. ഭാവിയിൽ ഈ കെട്ടിടങ്ങൾക്ക് മുന്നിൽ പാർക്കിംഗ് സൗകര്യമില്ലെങ്കിൽ വാഹനങ്ങൾ റോഡരികിൽ തന്നെ പാർക്ക് ചെയ്യേണ്ടി വരും. പുതിയ കെട്ടിടങ്ങൾ മൂന്ന് മീറ്റർ അകലം പാലിച്ചുമാത്രമേ നിർമ്മിക്കാവൂ എന്ന നിബന്ധന പാലിക്കപ്പെട്ടിട്ടില്ല.

നിലവിൽ ഡ്രെയിനേജിന് മുകളിൽ നടപ്പാതയുടെ നിർമ്മാണം ഭാഗികമായി നടക്കുന്നുണ്ട്. ചില ഭാഗങ്ങളിൽ നടപ്പാത പൂർത്തിയാകാനുണ്ട്. ഇവിടെ വാട്ടർ അതോറിറ്റി പുതിയ 160 എംഎം പൈപ്പ് ലൈൻ സ്ഥാപിക്കുന്ന ജോലിയും പൊതുമരാമത്ത് വകുപ്പിന്റെ റോഡ് വീതികൂട്ടൽ ജോലിയും ഒരേ സമയത്താണ് നടക്കുന്നത്.

ഒരു മീറ്ററിലധികം താഴ്ചയിലാണ് പ്രധാന പൈപ്പ് ലൈൻ സ്ഥാപിക്കുന്നത്. വീടുകളിലേക്കും സ്ഥാപനങ്ങളിലേക്കും ഉള്ള 20 എംഎം കണക്ഷൻ പൈപ്പ് 20 സെൻ്റീമീറ്റർ താഴ്ചയിലായിരിക്കും സ്ഥാപിക്കുക. പ്രധാന പൈപ്പ് ലൈൻ സ്ഥാപിച്ച ശേഷമേ നിലവിലുള്ള പൈപ്പ് കണക്ഷനുകൾ പുതിയതിലേക്ക് മാറ്റുകയുള്ളൂ.

കടകൾ പൊളിച്ചുനീക്കുന്ന പ്രവൃത്തി ഏതാണ്ട് പൂർത്തിയായിട്ടുണ്ട്. എന്നാൽ റോഡരികിലുള്ള വൈദ്യുതി തൂണുകൾ മാറ്റുന്ന കാര്യത്തിൽ കാര്യമായ പുരോഗതിയില്ല. പൈപ്പ് ലൈൻ സ്ഥാപിച്ചുകഴിഞ്ഞാലേ ടാറിംഗ് നടത്താൻ സാധിക്കൂ എന്നിരിക്കെ, കാര്യങ്ങൾ ഇപ്പോഴും കുളമായി കിടക്കുകയാണ്. കാസർകോട് പുതിയ ബസ് സ്റ്റാൻ്റ് മുതൽ വാട്ടർ അതോറിറ്റിയുടെ പൈപ്പ് പൊട്ടി പലയിടത്തും വലിയ അളവിൽ വെള്ളം പാഴാകുന്നുണ്ട്.

ഗതാഗതത്തിന് തടസ്സമുണ്ടാകാത്ത രീതിയിൽ രാത്രി 10 മണിക്ക് ശേഷമാണ് നിർമ്മാണം നടക്കുന്നതെന്ന് അധികൃതർ പറയുന്നുണ്ടെങ്കിലും, പകൽ സമയത്തും പണി നടന്നാൽ എന്തായിരിക്കും അവസ്ഥയെന്ന് നാട്ടുകാർ ആശങ്കപ്പെടുന്നു.

സ്ഥലം വിട്ടുനൽകിയ വ്യാപാരികൾക്ക് പഴയ കെട്ടിടങ്ങൾ പൊളിച്ച് പിന്നിലേക്ക് മാറ്റി പണിയുന്നതിന് നഗരസഭയുടെ ഇളവ് ലഭിച്ചിട്ടുണ്ട്. ഉടമകൾ ആവശ്യമായ സ്ഥലം സൗജന്യമായി നൽകിയാൽ ഡ്രെയിനേജ്, നടപ്പാത, ഇൻ്റർലോക്ക് എന്നിവ ഉൾപ്പെടെ പൂർത്തിയാക്കി മാസങ്ങൾക്കകം റോഡ് ടാറിംഗ് പൂർത്തിയാക്കാൻ കഴിയുമെന്നാണ് അധികൃതർ നേരത്തെ അറിയിച്ചിരുന്നത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങളും അനുഭവങ്ങളും പങ്കുവെക്കുക.

Summary: Construction delays on the Karantakkad-Thayalangadi-Railway Station road in Kasaragod have led to severe traffic jams, with commuters losing over an hour due to ongoing work and obstacles like electric posts.

#KasaragodTraffic #RoadConstruction #KasaragodNews #KeralaTraffic #InfrastructureIssues #PublicTransport