സപ്ലൈ ഓഫീസിൻ്റെ കോണിപ്പടിയിൽ പട്ടി പെറ്റു; അകത്തേക്ക് കടക്കാനാകാതെ ഉദ്യോഗസ്ഥരും പൊതുജനങ്ങളും

കാസർകോട്: (KasargodVartha) സപ്ലൈ ഓഫീസിൻ്റെ കോണിപ്പടിയിൽ പട്ടി പ്രസവിച്ചതിനെ തുടർന്ന് ഓഫീസിലേക്ക് അകത്തേക്ക് കയറാനാകാതെ ഉദ്യോഗസ്ഥരും പൊതുജനങ്ങളും വലയുന്നു. താലൂക്ക് ഓഫീസിന് സമീപത്തുള്ള സപ്ലൈ ഓഫീസിലാണ് ഈ അവസ്ഥ നിലനിൽക്കുന്നത്.

നിലവിൽ മറ്റൊരു വഴിയിലൂടെ വളഞ്ഞ് വന്നാണ് ഓഫീസിൽ കയറാൻ കഴിയുന്നത്. അമ്മപ്പട്ടിയും കുഞ്ഞുങ്ങളും കോണിപ്പടിയിൽ കിടക്കുന്നത് കൊണ്ട് അടുത്തേക്ക് പോയാൽ  ആക്രമിക്കുമോ എന്ന ഭയം എല്ലാവർക്കുമുണ്ട്. ഈ പേടി കാരണം പൊതുജനങ്ങൾ ഈ ഭാഗത്തേക്ക് അടുക്കുന്നില്ല.

അതിനിടെ, പട്ടികൾ കോണിപ്പടിയിൽ മൂത്രമൊഴിച്ചും കാഷ്ടിച്ചും വൃത്തികേടാക്കിയത് കൊണ്ട് ദുർഗന്ധം കാരണം കോണിപ്പടി ഭാഗത്തേക്ക് അടുക്കാൻ കഴിയാത്ത അവസ്ഥയാണ്. ഇതോടെ ഓഫീസിൻ്റെ പ്രധാന കവാടം തന്നെ പൊതുജനങ്ങൾക്ക് ഉപയോഗശൂന്യമായി മാറിയിരിക്കുകയാണ്.

കൂടാതെ, പട്ടികളെ കോണിപ്പടിയിൽ നിന്ന് പുറത്താക്കാൻ ആരെ കാണണം എന്ന കാര്യത്തിൽ ആലോചിച്ച് തല പുകയ്ക്കുകയാണ് ഉദ്യോഗസ്ഥർ. തെരുവ് നായ ശല്യം പരിഹരിക്കാനുള്ള നടപടികൾ വൈകുന്നതിൽ ജീവനക്കാർക്കിടയിലും ആശങ്കയുണ്ട്.

സപ്ലൈ ഓഫീസ് സ്ഥിതി ചെയ്യുന്ന പരിസരങ്ങളില്‍ ഇഷ്ടം പോലെ തെരുവ് നായ്ക്കൾ തമ്പടിച്ചിട്ടുണ്ടെന്ന് പ്രദേശത്ത് താമസിക്കുന്നവരും ഇവിടുത്തെ വ്യാപാരികളും പറയുന്നു. കൂടാതെ, വർഷങ്ങൾ പഴക്കമുള്ള സപ്ലൈ ഓഫീസിൻ്റെ പുറംചുവരുകൾ പുല്ല് മുളച്ച് നാശോന്മുഖമായി കിടക്കുന്നതും കെട്ടിടത്തിൻ്റെ ശോച്യാവസ്ഥ സൂചിപ്പിക്കുന്നു.
 

തെരുവ് നായ ശല്യം പരിഹരിക്കാൻ എന്ത് ചെയ്യണം? നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: Mother dog and puppies occupy Supply Office stairs in Kasaragod, hindering entry.

#Kasaragod #SupplyOffice #StrayDogMenace #KeralaNews #PublicGrievance #OfficeAccess