ഒറ്റത്തൂൺ പാലം നഗരസൗന്ദര്യത്തിന് മാറ്റുകൂട്ടും; വികസന സ്വപ്നങ്ങൾക്ക് ചിറകുമുളയ്ക്കുന്നു

കാസർകോട്: (KasargodVartha) നഗരത്തിലെ ഒറ്റത്തൂൺ പാലത്തിന്റെ അറ്റകുറ്റപ്പണികൾ ഈ മാസം അവസാനത്തോടെ പൂർത്തിയാക്കി ദേശീയപാത അതോറിറ്റിക്ക് കൈമാറും. പാലത്തിനടിയിലുള്ള സ്ഥലത്ത് വിവിധ പദ്ധതികൾ ആവിഷ്കരിക്കാൻ നഗരസഭ ആലോചിക്കുന്നുണ്ട്. പേ പാർക്കിങ് സംവിധാനം ഏർപ്പെടുത്തണമെന്ന ആവശ്യവും ശക്തമാവുകയാണ്.

ഊരാളുങ്കൽ കോർപ്പറേറ്റ് സൊസൈറ്റിയുടെ കീഴിലുള്ള നിർമാണ കമ്പനിയാണ് പാലത്തിന്റെ അവസാനഘട്ട മിനുക്കുപണികൾ നടത്തുന്നത്. ഈ മാസം അവസാനത്തോടെ പണികൾ പൂർത്തിയാക്കി ദേശീയപാത അതോറിറ്റിക്ക് കൈമാറാനാണ് തീരുമാനം. 

പാലത്തിനടിയിൽ ഏതുതരം പദ്ധതികൾ നടപ്പാക്കണമെന്ന കാര്യത്തിൽ ഇതുവരെ അന്തിമ തീരുമാനമായിട്ടില്ല. ഇതിനായി നിരവധി നിർദേശങ്ങൾ നഗരസഭയ്ക്ക് ലഭിച്ചിട്ടുണ്ട്. ദേശീയപാത അതോറിറ്റിയും നഗരസഭയും ചേർന്നായിരിക്കും പദ്ധതിക്ക് അന്തിമരൂപം നൽകുക. 

‘പാങ്ങുള്ള ബസാർ, ചേലുള്ള ബസാർ’ എന്ന നിലയിൽ വൻകിട പദ്ധതികൾ നഗരസഭയുടെ പരിഗണനയിലുണ്ട്. നഗരമധ്യത്തിൽ വലിയ പദ്ധതികളും, താളിപ്പടപ്പ്-കറന്തക്കാട് മുതൽ പുതിയ ബസ് സ്റ്റാൻഡ് വരെയുള്ള ഭാഗങ്ങളിൽ പേ പാർക്കിങ് സംവിധാനവും ഏർപ്പെടുത്തണമെന്നാണ് പ്രധാന ആവശ്യം. ഈ ഭാഗത്ത് നാലോളം ആശുപത്രികളുള്ളതിനാൽ പേ പാർക്കിങ് അനിവാര്യമാണെന്ന് നഗരസഭയോട് ആവശ്യമുയരുന്നുണ്ട്.

പുതിയ ബസ് സ്റ്റാൻഡിലെ ഫുഡ് കോർട്ട് ഉൾപ്പെടെയുള്ള പദ്ധതികളും പാലത്തിനടിയിൽ പരിഗണനയിലുണ്ട്. നേരത്തെ ഉണ്ടായിരുന്ന ‘ഒപ്പു മരച്ചുവടിന്’ പകരം സ്ഥിരമായുള്ള പൊതുപരിപാടികൾക്കായി ഇവിടെ സംവിധാനം ഒരുക്കുമെന്നും നേരത്തെ പറഞ്ഞുകേട്ടിരുന്നു. പദ്ധതികൾ പൂർത്തിയാകുന്നതോടെ കാസർകോടിന്റെ മുഖച്ഛായ തന്നെ മാറുമെന്ന പ്രതീക്ഷയിലാണ് നഗരസഭാ അധികൃതർ.

കാസർകോട് നഗരത്തിന്റെ മുഖച്ഛായ മാറ്റുന്ന ഈ പദ്ധതിയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Kasaragod's single-pillar bridge project will bring new urban development.

#Kasaragod, #DevelopmentProjects, #UrbanRenewal, #Kerala, #Infrastructure, #News