കാസർകോട് റെയിൽവേ സ്റ്റേഷനിൽ വെള്ളമില്ലാതെ യാത്രക്കാർ വലഞ്ഞു; ദുരിതത്തിലായത് സ്ത്രീകളടക്കമുള്ള യാത്രക്കാർ

കാസർകോട്: (KasargodVartha) റെയിൽവേ സ്റ്റേഷനിൽ വെള്ളമില്ലാതെ യാത്രക്കാർ വലയുന്നു. വന്ദേഭാരത് ട്രെയിനിനുവേണ്ടിയുള്ള കെട്ടിടം നിർമിക്കുന്നതിനിടെ പൈപ്പ് പൊട്ടിയതാണ് കാരണം. ശുചിമുറിയിൽപോലും വെള്ളമില്ലാത്തതിനാൽ സ്ത്രീകളാണ് ഏറ്റവുമധികം ബുദ്ധിമുട്ടനുഭവിക്കുന്നത്.

വന്ദേഭാരത് ട്രെയിൻ ചൊവ്വാഴ്ച ഉച്ചയ്ക്ക് 1.30-ന് സ്റ്റേഷനിലെത്തുന്നതിന് അരമണിക്കൂർമുമ്പ് ശുചിമുറിയിലേക്കുള്ള വെള്ളം നിർത്തിവെച്ചിരുന്നു. ട്രെയിനിൽ വെള്ളം നിറയ്ക്കുന്നതിനുവേണ്ടിയാണിതെന്നാണ് അധികൃതർ നൽകുന്ന വിശദീകരണം.

നിർമാണപ്രവർത്തനങ്ങൾക്കായി ജെസിബി ഉപയോഗിച്ച് കുഴിയെടുത്തപ്പോൾ എട്ട് സ്ഥലങ്ങളിലാണ് കുടിവെള്ള പൈപ്പ് പൊട്ടിയത്. കരാറെടുത്ത തൊഴിലാളികൾ ശ്രദ്ധിക്കാതെ കുഴിയെടുത്തതാണ് പൈപ്പുകൾ പൊട്ടാൻ കാരണം.

താൽക്കാലികമായി പൈപ്പുകൾ ശരിയാക്കിയിട്ടുണ്ട്. എന്നാൽ, ജോലി പൂർത്തിയാകുന്നതുവരെ വെള്ളവിതരണത്തിൽ തടസ്സമുണ്ടാകാൻ സാധ്യതയുണ്ടെന്ന് അധികൃതർ അറിയിച്ചു.

പ്രശ്നം അടിയന്തിരമായി പരിഹരിക്കുന്നതിന് യുദ്ധകാലാടിസ്ഥാനത്തിൽ പ്രവർത്തിച്ചുവരുകയാണെന്ന് കാസർകോട് റെയിൽവേ സ്റ്റേഷൻ സൂപ്രണ്ട് മനോജ് കാസർകോട് വാർത്തയോട് പറഞ്ഞു.
 

ഈ വിഷയത്തിൽ റെയിൽവേ അധികൃതരുടെ ഭാഗത്തുനിന്നും എന്ത് നടപടികളാണ് ഉണ്ടാകേണ്ടത്? നിങ്ങളുടെ അഭിപ്രായം പങ്കുവെയ്ക്കുക.

Article Summary: Water crisis at Kasaragod railway station.

#Kasaragod, #IndianRailways, #VandeBharat, #Kerala, #PublicUtility, #WaterCrisis