Intervention | കാസർകോട് റെയിൽവേ സ്റ്റേഷനിലെ പൊടിശല്യം: മലിനീകരണ നിയന്ത്രണ ബോർഡിന്റെ ഇടപെടലിൽ ഫലമുണ്ടാകുമോ?

കാസർകോട്: (KasargodVartha) കാസർകോട് റെയിൽവേ സ്റ്റേഷനിൽ നടക്കുന്ന വികസന പ്രവർത്തനങ്ങളുടെ പേരിൽ യാത്രക്കാർ അനുഭവിക്കുന്ന ദുരിതത്തിന് മലിനീകരണ നിയന്ത്രണ ബോർഡിന്റെ ഇടപെടലിൽ പരിഹാരമുണ്ടാകുമെന്ന പ്രതീക്ഷയിൽ യാത്രക്കാർ. പ്ലാറ്റ്‌ഫോമിൽ വെച്ച് തന്നെയുള്ള മാർബിൾ കട്ടിംഗ് യാത്രക്കാരുടെയും റെയിൽവേ ഉദ്യോഗസ്ഥരുടെയും ജീവിതം ദുസ്സഹമാക്കിയിരിക്കുകയാണ്. 

 ശക്തമായ ശബ്ദമലിനീകരണവും പൊടിപടലങ്ങളും ശ്വാസം മുട്ടുന്ന അവസ്ഥ സൃഷ്ടിക്കുന്നു.  ട്രെയിൻ കാത്തുനിൽക്കുന്ന യാത്രക്കാർക്ക് വൃത്തിയായി ഒരിടത്ത് ഇരിക്കാൻ പോലും കഴിയാത്ത സ്ഥിതിയാണ്. പൊടിപടലങ്ങൾ കാരണം പലർക്കും ശ്വാസതടസ്സവും മറ്റ് ആരോഗ്യപ്രശ്നങ്ങളും ഉണ്ടാകുന്നതായി പരാതിയുണ്ട്. പ്രായമായവരും കുട്ടികളും കൂടുതൽ ബുദ്ധിമുട്ടനുഭവിക്കുന്നു.

കാഞ്ഞങ്ങാടുള്ള മലിനീകരണ നിയന്ത്രണ ബോർഡിന്റെ അസിസ്റ്റന്റ് എൻജിനീയർ ടി വി ആദർശ് കാസർകോട് റെയിൽവേ സ്റ്റേഷനിൽ നേരിട്ടെത്തിയാണ് തിങ്കളാഴ്ച തെളിവെടുപ്പ് നടത്തിയത്. ഗവൺമെന്റ് റെയിൽവേ പൊലീസും ആർപിഎഫും ഹെൽത്ത് ഇൻസ്പെക്ടറും തെളിവെടുപ്പ് സമയത്ത് സ്ഥലത്തുണ്ടായിരുന്നു. എന്നാൽ, തെളിവെടുപ്പിന് ബോർഡ് ഉദ്യോഗസ്ഥർ എത്തിയപ്പോഴും സ്റ്റേഷൻ പ്ലാറ്റ്‌ഫോമിൽ മാർബിൾ കട്ടിംഗ് നിർബാധം തുടരുകയായിരുന്നു. 

ഉദ്യോഗസ്ഥരുടെ സാന്നിധ്യത്തിൽ പോലും ഈ നിയമലംഘനം തുടർന്നത് അധികൃതരുടെ നിരുത്തരവാദപരമായ സമീപനമാണ് വ്യക്തമാക്കുന്നതെന്ന് ആക്ഷേപമുണ്ട്. തെളിവെടുപ്പിന് ശേഷം സംഘം റിപ്പോർട്ട് തയ്യാറാക്കി സ്റ്റേഷൻ മാസ്റ്റർക്ക് സമർപ്പിക്കാൻ ശ്രമിച്ചെങ്കിലും സ്റ്റേഷൻ മാസ്റ്റർ റിപ്പോർട്ട് സ്വീകരിക്കാൻ തയ്യാറായില്ലെന്നാണ് പറയുന്നത്. തുടർന്ന്, റിപ്പോർട്ട് ഉന്നത ഉദ്യോഗസ്ഥർക്ക് സമർപ്പിക്കാനായി സംഘം മടങ്ങുകയായിരുന്നു. 

ഈ വിഷയത്തിൽ എത്രയും പെട്ടെന്ന് നടപടിയെടുക്കണമെന്നും യാത്രക്കാരുടെ ദുരിതത്തിന് അറുതി വരുത്തണമെന്നും ആവശ്യപ്പെട്ട് കാസർകോട് റെയിൽവേ പാസൻജേഴ്‌സ്  അസോസിയേഷൻ നേരത്തെ കേരള മലിനീകരണ നിയന്ത്രണ ബോർഡിന് പരാതി നൽകിയിരുന്നു. എന്നിട്ടും കാര്യമായ നടപടികൾ ഉണ്ടാകാത്തതിൽ യാത്രക്കാർക്കിടയിൽ ശക്തമായ പ്രതിഷേധമുണ്ട്.

യാത്രക്കാരുടെ ആരോഗ്യത്തെയും യാത്രാനുഭവത്തെയും പ്രതികൂലമായി ബാധിക്കുന്ന ഇത്തരം പ്രവൃത്തികൾക്കെതിരെ ശക്തമായ നടപടിയെടുക്കേണ്ടത് അത്യന്താപേക്ഷിതമാണ്. ബന്ധപ്പെട്ട അധികാരികൾ എത്രയും പെട്ടെന്ന് വിഷയത്തിൽ ഇടപെട്ട് യാത്രക്കാരുടെ ദുരിതത്തിന് അറുതി വരുത്തണമെന്ന് പൊതുജനം ഒന്നടങ്കം ആവശ്യപ്പെടുന്നു.

#Kasaragod #PollutionControl #DustPollution #MarbleCutting #HealthImpact #RailwayStation