അമൃത് ഭാരത് സ്റ്റേഷൻ കാസർകോട്: റെയിൽവേ സ്റ്റേഷന്റെ മുഖം മറച്ച് കൂറ്റൻ പരസ്യ ബോർഡ്

കാസർകോട്: (KasargodVartha) 24 കോടി രൂപ ചെലവഴിച്ച് അമൃത് ഭാരത് സ്റ്റേഷൻ പദ്ധതിയിൽ ഉൾപ്പെടുത്തി വികസന പ്രവർത്തനങ്ങൾ പുരോഗമിക്കുന്ന കാസർകോട് റെയിൽവേ സ്റ്റേഷന്റെ മുഖം മറച്ച് റെയിൽവേ കൊമേഴ്ഷ്യൽ വിഭാഗം സ്ഥാപിച്ച കൂറ്റൻ പരസ്യ ബോർഡ് പ്രതിഷേധങ്ങൾക്ക് കാരണമാകുന്നു.

സ്റ്റേഷന്റെ മുൻഭാഗത്ത് പുതിയ ഓട്ടോറിക്ഷ പാർക്കിങ്ങിന് സമീപത്താണ് ഈ ഭീമാകാരമായ ബോർഡ് സ്ഥാപിച്ചിരിക്കുന്നത്. മുൻപ്, കാസർകോട് വികസന പാക്കേജിന്റെ ഭാഗമായി സ്റ്റേഷന് മുന്നിൽ നിർമ്മിച്ച ബസ് കാത്തിരിപ്പ് കേന്ദ്രത്തിന്റെ പുറംചുമർ സ്റ്റേഷന്റെ കാഴ്ച മറയ്ക്കുന്നുവെന്ന പരാതി ഉയർന്നപ്പോൾ എം.എൽ.എയുടെ ഇടപെടലിനെ തുടർന്ന് ആ ചുമർ വെട്ടിക്കുറച്ച് സ്റ്റേഷന്റെ ദൃശ്യഭംഗി ഉറപ്പാക്കിയിരുന്നു.

എന്നാൽ, ഇതിനു തൊട്ടുപിന്നാലെയാണ് റെയിൽവേയുടെ സ്ഥലത്ത് കൊമേഴ്ഷ്യൽ വിഭാഗം കരാർ നൽകിയതിനെ തുടർന്ന് പരസ്യ കോൺട്രാക്ടർ പുതിയ ബോർഡ് സ്ഥാപിച്ചത്. ഇത് സ്റ്റേഷന്റെ മുൻഭാഗം വീണ്ടും മറച്ചു. 

സ്റ്റേഷനിലെ കാർ പോർച്ചിന് മുകളിലായി 'Kasaragod' എന്ന് രേഖപ്പെടുത്തിയ ബോർഡ് 90 ശതമാനവും മറച്ച നിലയിലാണ് ഈ പുതിയ പരസ്യ ബോർഡ് സ്ഥാപിച്ചിരിക്കുന്നത്. നിലവിൽ പരസ്യം ഒന്നുമില്ലാത്ത ബോർഡിൽ പരസ്യം നൽകുന്നതിനായി കമ്പനിയുടെ ഫോൺ നമ്പർ മാത്രമാണ് നൽകിയിട്ടുള്ളത്.

ഈ ബോർഡിൽ പരസ്യം വന്നതിന് ശേഷം അതിന്റെ ഉയരം കൂട്ടാനോ മറ്റ് മാറ്റങ്ങൾ വരുത്താനോ സാധ്യമല്ല. ബോർഡിന്റെ കാലിന് ഉയരം കൂട്ടിയാൽ സ്റ്റേഷന്റെ മുൻഭാഗം വീണ്ടും വ്യക്തമാക്കാൻ സാധിക്കുമെന്ന് റെയിൽവേ പാസഞ്ചേഴ്സ് അസോസിയേഷൻ പ്രസിഡന്റ് ആർ. പ്രശാന്ത് കുമാർ, ജനറൽ സെക്രട്ടറി നാസർ ചെർക്കളം എന്നിവർ പറഞ്ഞു.

കാസർകോട് റെയിൽവേ സ്റ്റേഷനിലെ ഈ വിഷയത്തെക്കുറിച്ച് നിങ്ങൾക്കെന്താണ് പറയാനുള്ളത്? ഈ വാർത്ത മറ്റുള്ളവരിലേക്ക് ഷെയർ ചെയ്യൂ.

Article Summary: Giant ad board covers Kasaragod railway station's facade.

#Kasaragod #RailwayStation #AmritBharat #Protest #Advertisement #KeralaNews