കാസർകോട് റെയിൽവേ അവഗണന: യാത്രക്കാർ സമരമുഖത്തേക്ക്

കാസർകോട്: (KasargodVartha) മുപ്പത് വർഷത്തിലേറെയായി ഉന്നയിക്കുന്ന ആവശ്യങ്ങൾക്ക് നേരെ കണ്ണടച്ച്, സാധാരണ യാത്രക്കാരെയും സീസൺ ടിക്കറ്റ് യാത്രക്കാരെയും വിദ്യാർത്ഥികളെയും പൂർണ്ണമായി അവഗണിക്കുന്ന സതേൺ റെയിൽവേയുടെ പാലക്കാട് ഡിവിഷന്റെ അന്യായമായ നിലപാടുകൾക്കെതിരെ കാസർകോട് റെയിൽവേ പാസഞ്ചേഴ്സ് അസോസിയേഷൻ പ്രതിഷേധ സമരം സംഘടിപ്പിച്ചു. അസോസിയേഷൻ പ്രസിഡന്റ് ആർ. പ്രശാന്ത് കുമാർ സമര പരിപാടികൾ ഉദ്ഘാടനം ചെയ്തു.

കാസർകോട്ടെ യാത്രക്കാരോടുള്ള റെയിൽവേയുടെ അവഗണനയിൽ പ്രതിഷേധിച്ച് കാസർകോട് റെയിൽവേ പാസഞ്ചേഴ്സ് അസോസിയേഷൻ നടത്തിയ സമരത്തിൽ ഉന്നയിച്ച പ്രധാന ആവശ്യങ്ങൾ:

● രാവിലെയും വൈകുന്നേരവുമുള്ള ഫാസ്റ്റ് പാസഞ്ചർ ട്രെയിനുകൾക്ക് പുറമെ, യാത്രക്കാരുടെ തിരക്ക് കുറയ്ക്കാൻ മെമു ട്രെയിനുകൾ അനുവദിക്കുക.
● കോഴിക്കോട് പോകുന്നവർക്ക് വൈകുന്നേരം 5:10-ന് ശേഷം എട്ട് മണിക്കൂറോളം ട്രെയിൻ ലഭ്യമല്ലാത്ത അവസ്ഥയ്ക്ക് പരിഹാരം കാണുക.
● പരശുറാം എക്സ്പ്രസ് കോഴിക്കോട് ഒരു മണിക്കൂർ വെറുതെ നിർത്തിയിടുന്നത് നിർത്തലാക്കുക.
● പാലക്കാട്-കണ്ണൂർ സ്പെഷ്യൽ ട്രെയിൻ മഞ്ചേശ്വരം വരെ നീട്ടുക.
● മംഗലാപുരം-കോഴിക്കോട് റൂട്ടിൽ ജനശതാബ്ദി വണ്ടി ഓടിക്കുക.
● കണ്ണൂരിൽ യാത്ര അവസാനിപ്പിക്കുന്ന ഒൻപത് ട്രെയിനുകളിൽ രണ്ടെണ്ണമെങ്കിലും കാസർകോട്ടേക്കും മഞ്ചേശ്വരത്തേക്കും നീട്ടി യാത്രക്കാർക്ക് സൗകര്യം ഒരുക്കുക.
● കാസർകോട്ടും മഞ്ചേശ്വരത്തും രാത്രി ഹോൾട്ടിങ് ട്രെയിനുകൾ അനുവദിക്കുകയും സ്റ്റേഷനുകളിൽ അടിസ്ഥാന സൗകര്യങ്ങൾ മെച്ചപ്പെടുത്തുകയും ചെയ്യുക.
● കോട്ടിക്കുളം, കുമ്പള, ഉപ്പള, മഞ്ചേശ്വരം സ്റ്റേഷനുകളിൽ അടിസ്ഥാന സൗകര്യങ്ങൾ വർദ്ധിപ്പിക്കുക.
● സ്ഥലപരിമിതിയുടെ പേരുപറഞ്ഞ് കൊല്ലം-തിരുവനന്തപുരം റൂട്ടിൽ ഒരു നയവും കാസർകോട്-കണ്ണൂർ റൂട്ടിൽ മറ്റൊരു നയവും കാണിച്ച് സീസൺ ടിക്കറ്റുകാരെ ബുദ്ധിമുട്ടിക്കുന്നത് അവസാനിപ്പിച്ച് സ്ലീപ്പർ കോച്ചുകളിൽ യാത്ര അനുവദിക്കുക.
● എല്ലാ ട്രെയിനുകളിലും കൂടുതൽ ജനറൽ കോച്ചുകൾ അനുവദിക്കുക.
● ചെന്നൈ എക്സ്പ്രസ്സിൽ സീസൺ ടിക്കറ്റുകാരോട് ടിടിഇമാർ കാണിക്കുന്ന അനാവശ്യ ശല്യം അവസാനിപ്പിക്കുക.
● കാസർകോട്, കുമ്പള, ഉപ്പള, മഞ്ചേശ്വരം ഭാഗത്തെ സ്കൂൾ/കോളേജ് കുട്ടികൾ അതിപ്രഭാതത്തിൽ വീടുകളിൽ നിന്ന് യാത്രയാകേണ്ടി വരുന്ന പ്രശ്നം കണക്കിലെടുത്ത് ട്രെയിൻ സമയം അരമണിക്കൂർ വൈകിപ്പിച്ച് അവരുടെ യാത്രാ സുരക്ഷ ഉറപ്പാക്കുക.
● രാത്രി 8 മണിക്ക് കാസർകോട് നിന്ന് ഷൊർണൂരിലേക്ക് ട്രെയിൻ അനുവദിക്കുക.
● അന്ത്യോദയ എക്സ്പ്രസ് ആഴ്ചയിൽ മൂന്ന് വട്ടം ഓടിക്കുക.
● കാസർകോട് റെയിൽവേ സ്റ്റേഷനിൽ ജനറേറ്റർ ഉടൻ സ്ഥാപിക്കുക.
● രണ്ടാം ലിഫ്റ്റിന്റെ പണി ഉടൻ ആരംഭിക്കുക.
● പ്ലാറ്റ്ഫോമിൽ തെന്നിവീഴുന്ന പ്രശ്നം പരിഹരിക്കാൻ നടപടികൾ സ്വീകരിക്കുക.
● സഹയോഗ് തുറന്നു പ്രവർത്തിക്കുക.
● ടിക്കറ്റ് വിൽക്കുന്ന ജീവനക്കാരുടെ എണ്ണം വർദ്ധിപ്പിക്കുക.
● വന്ദേ ഭാരത് അടക്കമുള്ള ട്രെയിനുകളിൽ സീറ്റുകളും ബർത്തുകളും ബാക്കിയുണ്ടായിട്ടും ഓൺലൈൻ സിസ്റ്റത്തിൽ കൃത്യമായി കാണിക്കാതെ കറന്റ് റിസർവേഷൻ ടിക്കറ്റ് ലഭ്യമല്ലാത്ത പ്രശ്നത്തിന് അടിയന്തര പരിഹാരം കാണുക.
● 24 മണിക്കൂറും പ്രീപെയ്ഡ് ഓട്ടോ സംവിധാനം ഉണ്ടാക്കുക.

അസോസിയേഷൻ പ്രസിഡന്റ് ആർ. പ്രശാന്ത് കുമാർ, ജനറൽ സെക്രട്ടറി നാസർ ചെർക്കളം, കോർഡിനേറ്റർ നിസാർ പെർവാഡ്, വെൽഫെയർ പാർട്ടി വനിതാ വിംഗ് പ്രസിഡന്റ് സാഹിദ ഇല്യാസ്, ട്രഷറർ എം.എം. മുനീർ, വൈസ് പ്രസിഡന്റ് അഡ്വക്കേറ്റ് ടി.ഇ. അൻവർ എന്നിവർ പ്രതിഷേധ യോഗത്തിൽ സംസാരിച്ചു. ഷെഫീഖ് തെരുവത്ത് സ്വാഗതവും സത്താർ ബൈക്ക് നന്ദിയും പറഞ്ഞു.

ഈ വിഷയത്തെക്കുറിച്ചുള്ള നിങ്ങളുടെ അഭിപ്രായങ്ങൾ കമന്റ് ബോക്സിൽ രേഖപ്പെടുത്തുക.

Article Summary: Kasaragod rail commuters protest against long-standing neglect.

#KasaragodRailProtest #SouthernRailway #KeralaNews #PassengerRights #Railways #PublicProtest