കാസർകോട് സന്ധ്യാരാഗം ഓപ്പൺ ഓഡിറ്റോറിയം കാടുകയറി നശിക്കുന്നു; കലാ-സാംസ്കാരിക പ്രവർത്തനങ്ങൾക്ക് ഉണർവില്ലെന്ന് ആക്ഷേപം

കാസർകോട്: (KasargodVartha) നഗരസഭയുടെ അഭിമാനമായ പുലിക്കുന്നിലെ സന്ധ്യാരാഗം ഓപ്പൺ ഓഡിറ്റോറിയം ഉപയോഗശൂന്യമായി കിടക്കുന്നു. കലാ-സാംസ്കാരിക പ്രവർത്തനങ്ങൾ അവതരിപ്പിക്കാൻ ലക്ഷ്യമിട്ട് ഒരുക്കിയതാണിത്. 2002 ഒക്ടോബർ 31-ന് അന്നത്തെ മന്ത്രിയായിരുന്ന ജി കാർത്തികേയൻ തറക്കല്ലിട്ട ഓപ്പൺ ഓഡിറ്റോറിയം 2005-ൽ പണി പൂർത്തീകരിച്ച ശേഷം അന്നത്തെ നഗരസഭ ചെയർമാനായിരുന്ന ടി ഇ അബ്ദുല്ലയാണ് പൊതുജനങ്ങൾക്ക് കലാ-സാംസ്കാരിക പരിപാടികൾ നടത്താൻ തുറന്നുകൊടുത്തത്. വികസനശിൽപിയും കലാ-കായിക പ്രവർത്തനങ്ങൾക്ക് എന്നും പിന്തുണ നൽകിയിരുന്ന ടി ഇ അബ്ദുല്ല മുൻകൈയെടുത്തായിരുന്നു സന്ധ്യാരാഗത്തിൻ്റെ പിറവി. ആദ്യകാലത്ത് നല്ല നിലയിലാണ് ഇവിടെ പരിപാടികൾ നടത്തിയിരുന്നത്.

സൗജന്യ സൗകര്യങ്ങളും പ്രതിസന്ധികളും

സമീപത്ത് നഗരസഭ കോൺഫറൻസ് ഹാൾ സ്ഥിതി ചെയ്യുന്നുണ്ട്. ഇതിന് ഫീസുണ്ടെങ്കിലും സന്ധ്യാരാഗത്തിൽ പരിപാടികൾ അവതരിപ്പിക്കാൻ നഗരസഭ സൗജന്യമായാണ് നൽകിയിരുന്നത്. എന്നിട്ടും കാസർകോട്ടെ കലാ സംഘടനകൾ മുന്നോട്ടുവന്ന് ഇത് പ്രയോജനപ്പെടുത്തിയില്ല. സ്റ്റേജിൻ്റെ പിന്നാമ്പുറങ്ങൾ കോൺക്രീറ്റ് ചെയ്ത് 300-ലധികം പേർക്ക് ഇരിപ്പിടങ്ങൾ ഒരുക്കുകയും ഓപ്പൺ തിയറ്ററിലേക്ക് കോണിപ്പടികളും കൈവരികളും മനോഹരമായി സ്ഥാപിക്കുകയും ചെയ്തിരുന്നു. കലാപരിപാടികൾ നടക്കാതായതോടെ സ്ഥലം കാടുകളും വള്ളിപ്പടർപ്പുകളും കയറി നശിക്കാൻ തുടങ്ങി. നഗരസഭ മുൻകൈയെടുത്ത് ജോലിക്കാരെ നിർത്തി ഇടയ്ക്കിടെ ഇത് വൃത്തിയാക്കി വരുന്നുണ്ട്.

വഴികളും മേൽക്കൂരയും ഒരുക്കിയിട്ടും ഫലമില്ല

കലാപരിപാടികൾ നടക്കുമ്പോൾ കസേരകളും മൈക്കുകളും മറ്റ് അനുബന്ധ സാധനങ്ങളും സ്റ്റേജിനടുത്ത് എത്തിക്കാൻ വാഹനങ്ങൾക്ക് സൗകര്യമില്ലെന്നുള്ള പരാതിയെ തുടർന്ന്, വാഹനങ്ങൾ സ്റ്റേജ് വരെ എത്തിക്കാൻ ചെറിയ വഴികളും ടി ഇ അബ്ദുല്ല മുൻകൈയെടുത്ത് നിർമിച്ചു നൽകിയിരുന്നു. എന്നിട്ടും കലാ സംഘടനകൾ ഉണർന്നു പ്രവർത്തിച്ചില്ല. ഇതിനുപുറമെ, മുൻഭാഗത്ത് മഴയും മഞ്ഞും ഏൽക്കാതിരിക്കാൻ ആധുനിക രീതിയിൽ അടുത്ത കാലത്ത് മേൽക്കൂരയും നിർമിച്ചിട്ടുണ്ട്.

സന്ധ്യാരാഗത്തിൽ സായാനങ്ങളിൽ പാട്ടു കേൾക്കാനും കലാ സംഘടനകളെ അണിനിരത്തി സംഗീതമുൾപ്പെടെയുള്ള പരിപാടികൾ നടത്താനുമുള്ള ആവശ്യവുമായി കഴിഞ്ഞ ഭരണസമിതിക്ക് ചില സംഘടനകൾ നിവേദനം നൽകിയിരുന്നെങ്കിലും അതൊന്നും ഇതുവരെ പ്രാവർത്തികമായിട്ടില്ല. നിലവിൽ ഈ സന്ധ്യാരാഗം ഓപ്പൺ ഓഡിറ്റോറിയം പുതിയ ഭരണസമിതി സജീവമാക്കാൻ നടപടി സ്വീകരിക്കുമെന്ന പ്രതീക്ഷയിലാണ് കലാപ്രേമികൾ.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: The Sandhyaragam Open Auditorium in Pulikunnu, Kasaragod, built to promote cultural activities and inaugurated in 2005, is now lying neglected and overgrown with weeds due to lack of use by local arts organizations, despite the municipality providing free access and modern facilities.

#KasargodVartha #KasaragodNews #SandhyaragamAuditorium #Pulikunnu #CulturalEventsKerala #LocalNews #MalayalamNews #KasaragodMunicipality #AparnaNews