വനിതകളുടെ സൗജന്യയാത്രയിൽ പ്രതിഷേധിച്ച് കാസർകോട് സ്വകാര്യ ബസ് പണിമുടക്ക്; യാത്രാക്ലേശം രൂക്ഷം

കാസർകോട്: (KasargodVartha) കെഎസ്ആർടിസി ബസിൽ വനിതകൾക്ക് സൗജന്യയാത്ര അനുവദിച്ച സംസ്ഥാന സർക്കാർ പദ്ധതിയെ തുടർന്ന് സ്വകാര്യ ബസ് മേഖലയ്ക്ക് കടുത്ത സാമ്പത്തിക പ്രതിസന്ധിയാണെന്ന് ആരോപിച്ച് കാസർകോട് ജില്ലയിലെ മുഴുവൻ സ്വകാര്യ ബസുകളും ജൂലൈ ആറ് തിങ്കളാഴ്ച സർവീസ് നിർത്തിവെച്ചു. 450 ബസുകളാണ് പണിമുടക്കിയത്. 

കാസർകോട് ജില്ലാ പ്രൈവറ്റ് ബസ് ഓപ്പറേറ്റേഴ്‌സ് ഫെഡറേഷൻ്റെയും വിവിധ തൊഴിലാളി സംഘടനകളുടെയും നേതൃത്വത്തിലാണ് ഏകദിന സൂചനാ പണിമുടക്ക് നടന്നത്. രാവിലെ മുതൽ ബസുകൾ സർവീസ് നടത്താതിരുന്നതോടെ യാത്രക്കാർ വലിയ ദുരിതത്തിലായി. കെഎസ്ആർടിസി ബസ് സർവീസ് ഇല്ലാത്ത റൂട്ടുകളിലെയും മലയോര പ്രദേശങ്ങളിലെയും ജനങ്ങളാണ് സമരം കാരണം ഏറെ ദുരിതത്തിലായത്. 

രാവിലെ സ്കൂളുകളിലേക്കും കോളേജുകളിലേക്കും പോകാനിറങ്ങിയ വിദ്യാർത്ഥികളും ഓഫീസുകളിലേക്ക് പോകേണ്ടിയിരുന്ന ജീവനക്കാരുമാണ് ബസില്ലാതെ ഏറ്റവും കൂടുതൽ വലഞ്ഞത്. ഓട്ടോ റിക്ഷാ നിരക്കിലെ വർധനയും സാധാരണക്കാരെ കൂടുതൽ പ്രതിസന്ധിയിലാക്കി.

കലക്ടറേറ്റ് മാർച്ചും ധർണയും

ബസുടമകളുടെയും തൊഴിലാളികളുടെയും പ്രതിഷേധ മാർച്ച് അണങ്കൂരിൽ നിന്ന് ആരംഭിച്ച് കലക്ടറേറ്റിലെത്തി ധർണ നടത്തി. ബസുടമകൾ, തൊഴിലാളികൾ, അവരുടെ കുടുംബാംഗങ്ങൾ തുടങ്ങിയവർ പ്രതിഷേധത്തിൽ പങ്കെടുത്തു. വനിതകൾക്ക് കെഎസ്ആർടിസിയിൽ സൗജന്യയാത്ര ആരംഭിച്ചതോടെ സ്വകാര്യ ബസുകളുടെ വരുമാനം കുത്തനെ കുറഞ്ഞതായി ബസുടമകൾ ആരോപിച്ചു. 

കെഎസ്ആർടിസി സർവീസ് നടത്തുന്ന റൂട്ടുകളിൽ ഓടുന്ന സ്വകാര്യ ബസുകൾക്ക് ഡീസൽ നിറയ്ക്കാനുള്ള വരുമാനം പോലും ലഭിക്കുന്നില്ലെന്നും മറ്റു റൂട്ടുകളിൽ ഒരു ബസിന് പ്രതിദിനം 1,500 മുതൽ 3,000 രൂപ വരെ കളക്ഷൻ കുറവുണ്ടാകുന്നതായും അവർ പറഞ്ഞു. ഈ സാഹചര്യത്തിൽ സർവീസ് തുടരുന്നത് സാമ്പത്തികമായി പ്രയാസമാണെന്ന് സമരക്കാർ വ്യക്തമാക്കി. ലോണെടുത്തും വലിയ തുക മുടക്കിയും സർവീസ് നടത്തുന്ന ബസുടമകൾക്കും ദിവസവേതനക്കാരായ തൊഴിലാളികൾക്കും സർക്കാരിൻ്റെ ഈ നയം വലിയ തിരിച്ചടിയാണ് നൽകിയിരിക്കുന്നത്.

എട്ട് ആവശ്യങ്ങളുമായി ബസുടമകൾ

സ്വകാര്യ ബസ് മേഖലയെ സംരക്ഷിക്കാൻ സർക്കാർ അടിയന്തരമായി നടപടിയെടുക്കണമെന്ന് ആവശ്യപ്പെട്ട് ബസ് ഓപ്പറേറ്റേഴ്‌സ് ഫെഡറേഷൻ എട്ട് പ്രധാന ആവശ്യങ്ങൾ മുന്നോട്ടുവെച്ചു. വോട്ടർ ഐഡി അടിസ്ഥാനമാക്കി വനിതകളുടെ സൗജന്യയാത്ര ഒരു ദിവസം രണ്ട് യാത്രകളായി പരിമിതപ്പെടുത്തുക, ഇൻ്റർസ്റ്റേറ്റ് ടൗൺ ടു ടൗൺ ബസുകളിൽ സൗജന്യം അനുവദിക്കാതിരിക്കുക, തൊഴിലാളി ക്ഷേമനിധിയിലേക്കുള്ള വിഹിതം സർക്കാർ ഏറ്റെടുക്കുക, സ്വകാര്യ ബസ് മേഖലയെ വ്യവസായമായി അംഗീകരിക്കുക തുടങ്ങിയവയാണ് പ്രധാന ആവശ്യങ്ങൾ. 

റോഡ് ടാക്സ് പൂർണമായും ഒഴിവാക്കുക, ഡീസലിന് 50 ശതമാനം സബ്സിഡി നൽകുക, സൗജന്യ യാത്രാ പദ്ധതിയിൽ വിദ്യാർത്ഥികളെയും 65 വയസ്സിന് മുകളിലുള്ളവരെയും ഉൾപ്പെടുത്തുക എന്നീ ആവശ്യങ്ങളും ഉന്നയിച്ചിട്ടുണ്ട്. ആവശ്യങ്ങൾ അംഗീകരിക്കാത്ത പക്ഷം ജൂലൈ 20 മുതൽ 26 വരെ തിരുവനന്തപുരം സെക്രട്ടറിയേറ്റിന് മുന്നിൽ റിലേ ധർണ സംഘടിപ്പിക്കുമെന്നും നേതാക്കൾ അറിയിച്ചു. 

സർക്കാർ അനുകൂലമായ തീരുമാനം എടുത്തില്ലെങ്കിൽ സംസ്ഥാന വ്യാപകമായി അനിശ്ചിതകാല ബസ് പണിമുടക്ക് ആരംഭിക്കുമെന്നും സംയുക്ത സമരസമിതി മുന്നറിയിപ്പ് നൽകി. പ്രതിഷേധ മാർച്ചിനും ധർണയ്ക്കും പ്രൈവറ്റ് ബസ് ഓപ്പറേറ്റേഴ്‌സ് ഫെഡറേഷൻ കാസർകോട് ജില്ലാ പ്രസിഡൻ്റ് കെ ഗിരീഷ്, സെക്രട്ടറി ടി ലക്ഷ്മണൻ, സിഐടിയു ജില്ലാ സെക്രട്ടറി ഗിരി കൃഷ്ണൻ, ബിഎംഎസ് ജില്ലാ സെക്രട്ടറി ബാബു എന്നിവർ നേതൃത്വം നൽകി.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Around 450 private buses in Kasaragod district went on a one-day strike on Monday, protesting the financial crisis caused by the state government's free travel scheme for women in KSRTC buses. 

#KasaragodNews #PrivateBusStrike #KeralaNews #KSRTC #BusStrike #WomenFreeTravel #AparnaNews