പൊലീസ് സ്റ്റേഷൻ വളപ്പുകൾ വാഹന ശ്മശാനങ്ങളാകുന്നു; എത്ര ലേലം ചെയ്താലും തീരാതെ കാസർകോട്ടെ കൂമ്പാരം

കാസർകോട്: (KasargodVartha) എത്ര ലേലം ചെയ്താലും തീരാത്ത വിധം കാസർകോട് ജില്ലയിലെ വിവിധ പോലീസ് സ്റ്റേഷനുകളുടെ പരിസരങ്ങൾ വാഹനങ്ങളുടെ വലിയ കൂമ്പാരങ്ങളായി മാറിക്കൊണ്ടിരിക്കുകയാണ്. ജില്ലയിലെ വിവിധ പോലീസ് സ്റ്റേഷനുകളിലെ വാഹനങ്ങൾ നീക്കം ചെയ്യാനുള്ള സർക്കാർ നടപടികൾ പേരിന് മാത്രമായി ഒതുങ്ങുന്നു എന്നതാണ് യാഥാർഥ്യം. 

പോലീസ് സ്റ്റേഷൻ വളപ്പും പരിസരവും കുന്നുകൂടിക്കിടക്കുന്ന വാഹനങ്ങളുടെ ശ്മശാനമായി മാറുമ്പോൾ, എപ്പോഴെങ്കിലും സർക്കാർ നടത്തുന്ന 'ഇ-ലേലം' സംവിധാനം കുന്നുകൂടിക്കിടക്കുന്ന വാഹനപ്പെരുപ്പം കുറക്കാൻ പര്യാപ്തമാകുന്നില്ല. വിവിധ കേസുകളിലായി ദിവസേനയെന്നോണമാണ് പോലീസ് നിരവധി വാഹനങ്ങൾ പിടിച്ചെടുക്കുന്നത്. ഇവ സൂക്ഷിച്ചുവെക്കാൻ പല പോലീസ് സ്റ്റേഷൻ പരിസരത്തും ആവശ്യത്തിന് സ്ഥലമില്ലാത്ത അവസ്ഥയാണുള്ളത്.

ഇ-ലേലവും യാഥാർഥ്യവും

കഴിഞ്ഞ 2026 സെപ്റ്റംബർ മാസം സംസ്ഥാന സർക്കാർ ആഭ്യന്തരവകുപ്പിൻ്റെ 'സ്പേസ്' പദ്ധതി പ്രകാരം ഉടമസ്ഥരില്ലാത്ത 484 വാഹനങ്ങൾ ഇ-ലേലത്തിന് വെച്ചിരുന്നു. എന്നാൽ ഇതുകൊണ്ടൊന്നും ഓരോ സ്റ്റേഷനിലും കൂട്ടിയിട്ടിരിക്കുന്ന വാഹനപ്പെരുപ്പം കുറക്കാൻ ഒരിക്കലും കഴിയില്ല. 2011-ലെ കേരള പോലീസ് ആക്ട് സെക്ഷൻ 56 പ്രകാരമാണ് ആഭ്യന്തരവകുപ്പിൻ്റെ ഈ പൊതു ഇ-ലേല നടപടികൾ നടന്നത്.

ജില്ലയിലെ കുമ്പള, കാസർകോട്, ബദിയടുക്ക, വിദ്യാനഗർ, മഞ്ചേശ്വരം, മേല്പ്പറമ്പ, ബേക്കൽ, ഹോസ്ദുർഗ്, നീലേശ്വരം, ചന്തേര തുടങ്ങിയ പ്രധാന സ്റ്റേഷൻ പരിധികളിലെ സ്കൂട്ടർ, മോട്ടോർസൈക്കിൾ, ഓട്ടോറിക്ഷ, കാർ, പിക്കപ്പ് വാൻ തുടങ്ങിയ 454 വാഹനങ്ങളാണ് അന്ന് ലേലത്തിൽ വെച്ചത്.

കേസുകളും കാലതാമസവും

അനധികൃത മണൽക്കടത്ത്, മദ്യം, കഞ്ചാവ്, എം.ഡി.എം.എ. തുടങ്ങിയ വിവിധ ലഹരി കേസുകൾ, ട്രാഫിക് നിയമലംഘനങ്ങൾ, ഗുരുതരമായ വാഹന അപകടങ്ങളിൽ പെടുന്ന വാഹനങ്ങൾ എന്നിവയുൾപ്പെടെ വിവിധ കേസുകളിലാണ് പോലീസ് വാഹനങ്ങൾ കസ്റ്റഡിയിലെടുത്ത് സ്റ്റേഷൻ വളപ്പുകളിൽ എത്തിക്കുന്നത്. നിയമപരമായ കേസുകളും മറ്റും തീരാതെ ഇത്തരം വാഹനങ്ങൾ ഉടമകൾക്ക് വിട്ടു നൽകാനും കഴിയില്ല. 

കോടതികളിൽ കേസുകളിൽ തീർപ്പ് കൽപ്പിക്കാൻ ഉണ്ടാകുന്ന വലിയ കാലതാമസവും വാഹനങ്ങളുടെ ഈ പെരുപ്പത്തിന് പ്രധാന കാരണമാകുന്നുണ്ട്. അതുകൊണ്ടുതന്നെ പല വാഹനങ്ങളും മണ്ണോട് ചേർന്ന് പൂർണമായും നശിക്കുകയും ചെയ്യുന്നു. ഇത്തരം വാഹനങ്ങൾ ആക്രിക്കച്ചവടക്കാർക്ക് പോലും വേണ്ടാത്ത അവസ്ഥയിലാണുള്ളത്.

ഉടമകളുടെ താൽപ്പര്യക്കുറവും ജെ.സി.ബി. ഉപയോഗവും

അതേസമയം, കേസുകൾ പൂർണമായി തീർന്നാലും നശിച്ച വാഹനങ്ങൾ ഏറ്റെടുക്കാനോ കൊണ്ടുപോകാനോ യഥാർഥ ഉടമകൾ യാതൊരു താൽപ്പര്യവും കാണിക്കാറില്ല എന്നതാണ് മറ്റൊരു വസ്തുത. കോടതികളിൽ കെട്ടിവെക്കേണ്ടി വരുന്ന ഭീമമായ തുകകളും, വാഹനത്തിൻ്റെ മൂല്യത്തേക്കാൾ വലിയ പിഴത്തുകകളും ഇതിന് പ്രധാന തടസ്സമായി മാറുന്നുണ്ട്.

പലപ്പോഴും ഇത്തരത്തിൽ നശിച്ചുകൊണ്ടിരിക്കുന്നതും ഉടമകൾക്ക് വേണ്ടാത്തതുമായ വാഹനങ്ങൾ ജെ.സി.ബി. ഉപയോഗിച്ച് ഒരിടത്തേക്ക് കൂട്ടിയിടിച്ച് മാറ്റുകയാണ് പതിവ്. ഇത് പിന്നീട് ഇഴജന്തുക്കളുടെയും കാട്ടുജീവികളുടെയും പ്രധാന താവളമായി മാറുന്നുമുണ്ട്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Piles of seized vehicles rotting in Kasaragod police station premises remain a major issue despite auctions.

#KasargodVartha #KasaragodNews #KeralaPolice #PoliceStationVehicles #CivicIssue #SpaceProject #MalayalamNews #KeralaNews #AparnaNews