കാസർകോട് പുതിയ ബസ് സ്റ്റാൻഡിൽ കുരുക്ക് ഒഴിവാക്കാൻ ഗതാഗത പരിഷ്കരണം: ബസുകൾ കയറുന്നതിനും ഇറങ്ങുന്നതിനും മാറ്റങ്ങൾ

കാസർകോട്: (KasargodVartha) ട്രാഫിക് പരിഷ്കരണത്തിന്റെ ഭാഗമായി കാസർകോട് പുതിയ ബസ് സ്റ്റാൻഡിൽ ബസുകൾ കയറുന്നതിനും ഇറങ്ങുന്നതിനും പോലീസ് പുതിയ സംവിധാനം ഏർപ്പെടുത്തി.

ഇനിമുതൽ ബസുകൾക്ക് ബസ് സ്റ്റാൻഡിന്റെ പ്രധാന പ്രവേശന കവാടത്തിലൂടെ പ്രവേശിക്കാൻ പാടില്ല. നേരത്തെ ബസുകൾ ഇറങ്ങിയിരുന്ന ഭാഗത്തുകൂടിയാണ് ബസുകൾ സ്റ്റാൻഡിലേക്ക് കയറേണ്ടത്. 

മംഗലാപുരം ഭാഗത്തുനിന്നും ചെർക്കള ഭാഗത്തുനിന്നും വരുന്ന എല്ലാ ബസുകളും ഈ രീതിയിലാണ് സ്റ്റാൻഡിനകത്തേക്ക് പ്രവേശിക്കേണ്ടത്. പ്രധാന കവാടത്തിലൂടെ ബസുകൾ പുറത്തിറങ്ങണം. അടിപ്പാത റൗണ്ട് എബൌട്ടിലെ ഗതാഗത തടസ്സവും മറ്റും കണക്കിലെടുത്താണ് പുതിയ ട്രാഫിക് പരിഷ്കരണം.

തുടക്കമെന്ന നിലയിൽ പോലീസ് ഉദ്യോഗസ്ഥരുടെ നേതൃത്വത്തിൽ സ്ഥലത്ത് ട്രാഫിക് നിയന്ത്രിക്കാൻ സംവിധാനം ഏർപ്പെടുത്തിയിട്ടുണ്ട്. പരിഷ്കരണം സംബന്ധിച്ച് ബസുകൾക്ക് വേണ്ട നിർദേശങ്ങൾ നൽകി വരികയാണ്. ഈ നിർദേശങ്ങൾ ലംഘിക്കുന്നവർക്കെതിരെ കർശന നടപടി സ്വീകരിക്കാനാണ് പോലീസിന്റെ തീരുമാനം.

നേരത്തെ, ബസ് സ്റ്റാൻഡിന്റെ മുൻവശത്തുകൂടി ബസുകൾ കയറുകയും ഇറങ്ങുകയും ചെയ്തിരുന്നത് വലിയ ഗതാഗതക്കുരുക്കിന് കാരണമായിരുന്നു. പുതിയ പരിഷ്കരണം നിലവിൽ വരുന്നതോടെ ഈ പ്രശ്നം ഒഴിവാക്കാൻ സാധിക്കുമെന്ന് ട്രാഫിക് പോലീസ് അധികൃതർ കാസർകോട് വാർത്തയോട് പറഞ്ഞു. സ്റ്റാൻഡിൽ കയറാതെ ബസുകൾ റോഡിൻറെ ഇരുവശങ്ങളിലും ആളുകളെ ഇറക്കി പോകുന്നതും പതിവാണ്. ഇത്തരം നിയമലംഘനങ്ങൾ നടത്തുന്നവർക്കെതിരെയും ശക്തമായ നടപടി സ്വീകരിക്കുമെന്ന് പോലീസ് പറഞ്ഞു.

കാസർകോട്ടെ പുതിയ ട്രാഫിക് പരിഷ്കരണത്തെക്കുറിച്ച് നിങ്ങളുടെ അഭിപ്രായം എന്താണ്? ഈ വാർത്ത കൂട്ടുകാരുമായി പങ്കുവെയ്ക്കൂ.

Article Summary: New traffic system at Kasaragod bus stand to ease congestion.

#Kasaragod #Traffic #BusStand #Kerala #TrafficRules #KasaragodNews