അജ്മീർ സിയാറത്ത് കഴിഞ്ഞ് മടങ്ങവെ കാസർകോട് ബദിയടുക്ക സ്വദേശി രാജസ്ഥാനിൽ കുഴഞ്ഞുവീണ് മരിച്ചു; മൃതദേഹം വെള്ളിയാഴ്ച നാട്ടിലെത്തിക്കും

കാസർകോട്: (KasarrgodVartha) അജ്മീർ സിയാറത്ത് കഴിഞ്ഞ് മടങ്ങുകയായിരുന്നയാൾ യാത്രക്കിടെ ഹൃദയാഘാതം മൂലം നിര്യാതനായി. ബദിയടുക്കയിലെ അബ്ദുറഹ്മാന്റെയും പരേതയായ കുഞ്ഞിബിയുടെയും മകൻ ബി.എ. മുഹമ്മദ് കുഞ്ഞി (60) ആണ് മരിച്ചത്. വ്യാഴാഴ്ച (2026 ജനുവരി 1) രാവിലെ രാജസ്ഥാനിൽ വെച്ചായിരുന്നു അന്ത്യം.

തീർത്ഥാടന യാത്ര കഴിഞ്ഞ് നാട്ടിലേക്ക് മടങ്ങുന്നതിനിടെ ദേഹാസ്വാസ്ഥ്യം അനുഭവപ്പെടുകയും തുടർന്ന് മരണം സംഭവിക്കുകയുമായിരുന്നുവെന്ന് ബന്ധുക്കൾ പറഞ്ഞു. 

മൃതദേഹം നാട്ടിലെത്തിക്കാൻ രാഷ്ട്രീയ ഇടപെടൽ 

രാജസ്ഥാനിൽ വെച്ച് മരണപ്പെട്ടതിനാൽ മൃതദേഹം നാട്ടിലെത്തിക്കുന്നതിനുള്ള നിയമപരമായ നടപടിക്രമങ്ങൾ പൂർത്തിയാക്കാൻ എസ്.ഡി.പി.ഐ അടിയന്തരമായി ഇടപെട്ടു. പാർട്ടി കാസർകോട് ജില്ലാ നേതൃത്വം എസ്.ഡി.പി.ഐ ജയ്പൂർ ഘടകവുമായി ബന്ധപ്പെടുകയും, അവരുടെ സഹായത്തോടെ ആശുപത്രിയിലെയും പോലീസ് സ്റ്റേഷനിലെയും നടപടിക്രമങ്ങൾ വേഗത്തിൽ പൂർത്തിയാക്കുകയും ചെയ്തു. തുടർന്ന് മൃതദേഹം ആംബുലൻസ് മാർഗ്ഗം നാട്ടിലേക്ക് പുറപ്പെട്ടു.

ഖബറടക്കം വെള്ളിയാഴ്ച 

മൃതദേഹം വെള്ളിയാഴ്ച (ജനുവരി 2) ഉച്ചയോടെ ആംബുലൻസ് ബദിയടുക്കയിൽ എത്തിച്ചേരുമെന്നാണ് പ്രതീക്ഷിക്കുന്നത്. തുടർന്ന് വൈകുന്നേരത്തോടെ പെരഡാല ജുമാ മസ്ജിദ് ഖബർസ്ഥാനിൽ ഖബറടക്കം നടക്കും.

കുടുംബാംഗങ്ങൾ 

സുഹ്റയാണ് ഭാര്യ. മക്കൾ: ആമിന സിബ, ഇസാൻ. സഹോദരങ്ങൾ: അബ്ദുല്ലക്കുഞ്ഞി, അബൂബക്കർ, നഫീസ, മൈമൂന, ജമീല, പരേതയായ ബീഫാത്തിമ.

ഈ വാർത്ത ഷെയർ ചെയ്യുക.

Article Summary: Kasaragod native Muhammed Kunhi passed away in Rajasthan during return journey from Ajmer.

#KasaragodNews #Ajmer #Badiyadka #KeralaNative #Obituary #Rajasthan