കാസർകോട് ദേശീയപാതയിൽ മേൽനടപ്പാത നിർമാണം വൈകുന്നു; മതിൽ ചാടിക്കടന്ന് വിദ്യാർഥികൾ, ദുരിതത്തിൽ നാട്ടുകാർ

കാസർകോട്: (KasargodVartha) യാത്രാദുരിതം നേരിടുന്ന സ്ഥലങ്ങളിൽ ദേശീയപാതയ്ക്ക് കുറുകെ പ്രധാന ഇടങ്ങളിൽ ഫുട്ട് ഓവർ ബ്രിഡ്ജ് നിർമിക്കുമെന്ന ദേശീയപാത അതോറിറ്റിയുടെ തീരുമാനം വൈകുന്നു. കഴിഞ്ഞ നിയമസഭാ തിരഞ്ഞെടുപ്പ് വേളയിൽ മുഖ്യധാര രാഷ്ട്രീയപാർട്ടികളും ജനപ്രതിനിധികളും തലപ്പാടി-ചെങ്കള റീച്ച് ദേശീയപാതയുടെ 10-ഓളം സ്ഥലങ്ങളിൽ മേൽപ്പാലങ്ങൾക്ക് അനുമതി ലഭിച്ചതായി കാണിച്ച് പത്രക്കുറിപ്പുകളും പ്രസ്താവനകളും ഇറക്കിയിരുന്നു.

എന്നാൽ ഇതൊക്കെ വെറും വോട്ട് തട്ടാനുള്ള തിരഞ്ഞെടുപ്പ് സ്റ്റണ്ടായിരുന്നുവെന്നാണ് ഇപ്പോൾ നാട്ടുകാരുടെ പ്രധാന ആക്ഷേപം. ദേശീയപാത നിർമാണവും അനുബന്ധ പ്രവൃത്തികളും മൂലം വിദ്യാർഥികൾ അടക്കമുള്ള യാത്രക്കാർക്കും നാട്ടുകാർക്കും വലിയ ദുരിതമാണ് നിലവിൽ ഉണ്ടായിട്ടുള്ളത്.

വിദ്യാർഥികൾ മതിൽ ചാടിക്കടക്കുന്നു

നിർമാണവുമായി ബന്ധപ്പെട്ട് ദേശീയപാതയിൽ നിർമിച്ച വൻ മതിലുകളാണ് ജനങ്ങൾക്ക് ഏറെ ബുദ്ധിമുട്ടായിരിക്കുന്നത്. നഗരങ്ങളിലും പ്രധാനപ്പെട്ട സ്ഥലങ്ങളിലും ദേശീയപാത മേൽപ്പാലം വഴി നിർമിക്കണമെന്ന് നിർമാണ സമയത്ത് തന്നെ നാട്ടുകാർ ആവശ്യപ്പെട്ടതാണ്.

എന്നാൽ ഇത് അധികാരികൾ ചെവിക്കൊള്ളാത്തതിൻ്റെ ദുരിതമാണ് ഇപ്പോൾ നാട്ടുകാർ അനുഭവിക്കുന്നത്. തലപ്പാടി-ചെങ്കള റീച്ചിൽ ഉപ്പളയിലും കാസർകോട് പുതിയ ബസ് സ്റ്റാൻഡിലുമാണ് മേൽപ്പാലങ്ങൾ വഴി ദേശീയപാത നിർമാണം അനുവദിച്ചത്.

മറ്റ് സ്ഥലങ്ങളിലൊക്കെ രണ്ട് പ്രദേശങ്ങളായി വേർതിരിച്ച് മതിൽ കെട്ടിയായിരുന്നു നിർമാണം. ഇത് വലിയ പ്രതിഷേധങ്ങൾക്കും വഴിവെച്ചിരുന്നു. അടിപ്പാതയും മേൽപ്പാതയും ഇല്ലാത്ത സ്ഥലങ്ങളിൽ വിദ്യാർഥികൾ സ്കൂളിൽ എളുപ്പത്തിൽ എത്താൻ ദേശീയപാതയുടെ മതിൽ ചാടിക്കടക്കുന്നതായി വ്യാപക പരാതി ഉയർന്നിട്ടുണ്ട്. ഇത് വലിയ അപകടത്തിന് കാരണമാകുമെന്ന് രക്ഷിതാക്കളും പിടിഎയും ഭയക്കുന്നു. ഈ ആശങ്കയ്ക്ക് പരിഹാരം കാണാനായിരുന്നു പിന്നീട് മേൽപ്പാലങ്ങൾ നിർമിക്കുമെന്ന അറിയിപ്പ് ഉണ്ടായത്.

നടപടിയില്ലാതെ അധികൃതർ

ഇത് സംബന്ധിച്ച് 2026 ഫെബ്രുവരിയിൽ തലപ്പാടി-ചെങ്കള റീച്ചിൽ നിർമിക്കാൻ ഉദ്ദേശിക്കുന്ന ഫുട്ട് ഓവർ ബ്രിഡ്ജിൻ്റെ സ്ഥലങ്ങളെക്കുറിച്ച് മൊഗ്രാൽ പെർവാഡ് സ്വദേശി ഫിർഷാദ് കോട്ട രേഖാമൂലം ദേശീയപാത കണ്ണൂർ ഓഫീസുമായി ബന്ധപ്പെട്ടിരുന്നു. 

അന്ന് ലഭിച്ച വിവരമനുസരിച്ച് ഏറ്റവും പ്രധാനപ്പെട്ട ഇടങ്ങളായ നുള്ളിപ്പാടി, അടുക്കത്ത് ബയൽ, സിപിസിആർഐ, മൊഗ്രാൽപുത്തൂർ കുന്നിൽ, മാവിനകട്ട, ആരിക്കാടി കടവത്ത്, ഷിറിയ കുന്നിൽ, ഗോവിന്ദ പൈ മെമ്മോറിയൽ കോളേജ് തുടങ്ങിയ സ്ഥലങ്ങളിൽ മേൽനടപ്പാത സ്ഥാപിക്കുമെന്നാണ് പറഞ്ഞിരുന്നത്.

ഇവിടങ്ങളിൽ നിരവധി വിദ്യാഭ്യാസ സ്ഥാപനങ്ങൾ കൂടി ഉള്ളതിനാൽ നടപടി ത്വരിതപ്പെടുത്തണമെന്ന ആവശ്യവും ഉയർന്നിരുന്നു. എന്നാൽ പ്രഖ്യാപനം വന്ന് ആറ് മാസം പിന്നിട്ടിട്ടും പ്രാരംഭനടപടികൾ പോലും തുടങ്ങിയിട്ടില്ലെന്ന ആക്ഷേപമാണ് ഇപ്പോൾ നാട്ടുകാർക്കുള്ളത്. ഇനി ലോക്സഭാ തിരഞ്ഞെടുപ്പ് വരെ കാത്തിരിക്കണോ എന്നും നാട്ടുകാർ ചോദിക്കുന്നു. വിഷയത്തിൽ ജില്ലാ ഭരണകൂടവും ജനപ്രതിനിധികളും അടിയന്തര ഇടപെടൽ നടത്തണമെന്നാണ് നാട്ടുകാരുടെ ശക്തമായ ആവശ്യം.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: NHAI delays Kasaragod foot overbridge work; locals and students face hardships.

#KasaragodNews #NationalHighway #FootOverBridge #KeralaDevelopment #StudentSafety #LocalProtest #NHAI #AparnaNews