കാസർകോട് ദേശീയപാതയിൽ വൻ വിള്ളൽ: നിർമ്മാണത്തിലെ അപാകതയെന്ന് ആരോപണം

കാസർകോട്: (KasargodVartha) നിർമ്മാണം പൂർത്തിയായ ദേശീയപാതയുടെ 50 മീറ്ററോളം ഭാഗത്ത് വലിയ വിള്ളലുകൾ കണ്ടെത്തിയത് വ്യാപക പ്രതിഷേധത്തിന് ഇടയാക്കി. പിലിക്കോട് കാർഷിക സർവകലാശാല മുതൽ പടുവളം വരെയുള്ള ഭാഗത്താണ് റോഡിന്റെ ഇരുവശത്തും വലിയ വിള്ളലുകൾ രൂപപ്പെട്ടിരിക്കുന്നത്. 

ഗതാഗതത്തിനായി തുറന്നു കൊടുക്കാത്ത ഈ ഭാഗത്ത് കഴിഞ്ഞ ദിവസത്തെ മഴയിലാണ് വിള്ളൽ ശ്രദ്ധയിൽപ്പെട്ടത്. ആളുകൾ കാണാതിരിക്കാൻ വേണ്ടി പാളിച്ച മറയ്ക്കാൻ ഷീറ്റിട്ട് മൂടുകയും താൽക്കാലികമായി ടാർ ഉപയോഗിച്ച് അടയ്ക്കുകയും ചെയ്തതായി ആരോപണമുണ്ട്.

ജനവാസമേഖലയിൽ വലിയ തിരക്കുള്ള സർവീസ് റോഡിന് മുകളിലുള്ള പാതയിൽ വിള്ളൽ കണ്ടെത്തിയത് പ്രദേശവാസികളെ ആശങ്കയിലാക്കിയിട്ടുണ്ട്. ഇതിനു മുൻപ് ചട്ടഞ്ചാൽ ടൗണിന് സമീപം ദേശീയപാതയിൽ വലിയ ഗർത്തം രൂപപ്പെട്ടത് നാട്ടുകാരിൽ ഭീതി ഉളവാക്കിയിരുന്നു. ആ ഗർത്തം മണിക്കൂറുകൾക്കകം കോൺക്രീറ്റ് ഉപയോഗിച്ച് അടച്ചിരുന്നു.

ജില്ലയിലെ ദേശീയപാത നിർമ്മാണത്തിലെ ഗുരുതരമായ പിഴവുകൾ കണ്ടെത്തിയതിനെ തുടർന്ന് ജില്ലാ കളക്ടർ നിർമ്മാണ കമ്പനിയോട് വിശദീകരണം തേടിയിരുന്നു. കളക്ടറുടെ അന്ത്യശാസനത്തിന് ശേഷമാണ് മേഘ കൺസ്ട്രക്ഷൻസ് റിപ്പോർട്ട് സമർപ്പിച്ചത്. സമാനമായി മലപ്പുറം കൂരിയാടും ദേശീയപാത തകർന്ന സംഭവം റിപ്പോർട്ട് ചെയ്യപ്പെട്ടിരുന്നു. 

ഈ വിഷയത്തിൽ കർശന നടപടി സ്വീകരിക്കാനാണ് തീരുമാനം. ഇതിന്റെ ഭാഗമായി കേന്ദ്ര ഉപരിതല ഗതാഗതവകുപ്പ് ദേശീയപാത അതോറിറ്റിയുടെ പ്രോജക്ട് ഡയറക്ടറെ സസ്പെൻഡ് ചെയ്യുകയും സൈറ്റ് എഞ്ചിനീയറെ പിരിച്ചുവിടുകയും ചെയ്തിട്ടുണ്ട്.

കരാർ കമ്പനി പലയിടത്തും ഉപകരാർ നൽകിയാണ് നിർമ്മാണം നടത്തിയത്. ദേശീയപാതയുടെ നിർമ്മാണ സമയത്ത് കൃത്യമായ പരിശോധന നടത്താൻ ദേശീയപാത അതോറിറ്റി ഉദ്യോഗസ്ഥർക്ക് വീഴ്ച സംഭവിച്ചതായും ആരോപണമുണ്ട്. 

ലെയർ അടിസ്ഥാനത്തിൽ മണ്ണ് ഉറപ്പിക്കുന്നതിന് പകരം കൂട്ടിയിട്ടാണ് നിർമ്മാണം നടത്തിയതെന്നും ഇത് പാളിച്ചയ്ക്ക് കാരണമായെന്നും പറയുന്നു. അടിത്തറയിലെ മണ്ണിന് ഭാരം താങ്ങാൻ കഴിയാത്തതാണ് ദേശീയപാത തകരാനുള്ള പ്രധാന കാരണമായി വിലയിരുത്തുന്നത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. ദേശീയപാത നിർമ്മാണത്തിലെ അപാകതകളെക്കുറിച്ച് നിങ്ങൾക്ക് എന്തെങ്കിലും വിവരങ്ങൾ അറിയാമോ? കൂടുതൽ പേരിലേക്ക് ഈ വാർത്ത എത്തിക്കാൻ ഷെയർ ചെയ്യുക.
 

Article Summary: Major cracks found on Kasaragod NH after construction, raising quality concerns and prompting action.
 

#Kasaragod, #NationalHighway, #ConstructionDefect, #RoadCrack, #KeralaNews, #Infrastructure