ഗതാഗതക്കുരുക്കിന് പരിഹാരമായി കാസർകോട് നഗരത്തിൽ 'പേ പാർക്കിങ്'; ആദ്യഘട്ടം കെഎസ്ആർടിസിക്ക് മുന്നിൽ

-സുബൈർ പള്ളിക്കാൽ

കാസർകോട്: (KasargodVartha) നഗരത്തിലെ രൂക്ഷമായ ഗതാഗതക്കുരുക്കിനും പാർക്കിങ് പ്രതിസന്ധിക്കും പരിഹാരം കാണുന്നതിനായി കൂടുതൽ പ്രദേശങ്ങളിൽ നിയന്ത്രിത 'പേ പാർക്കിങ്' സംവിധാനം നടപ്പാക്കാൻ കാസർകോട് നഗരസഭ ഒരുങ്ങുന്നു. നഗരസഭാ സെക്രട്ടറി ഷാജു പി ബിയുടെ നേതൃത്വത്തിൽ പൊതുമരാമത്ത്, എൻജിനീയറിങ് വിഭാഗങ്ങൾ നഗരത്തിലെ ഗതാഗത പ്രശ്നങ്ങൾ പരിഹരിക്കുന്നതിന് സ്ഥലം കണ്ടെത്തുന്ന നടപടികൾ പുരോഗമിക്കുകയാണ്. നഗരസഭയും ട്രാഫിക് അഡ്വൈസറി കമ്മിറ്റിയും സംയുക്തമായി എടുത്ത തീരുമാനങ്ങളുടെ അടിസ്ഥാനത്തിലാണ് പുതിയ പേ പാർക്കിങ് സംവിധാനം നടപ്പാക്കുന്നത്.

മുൻകൂട്ടി തയ്യാറാക്കിയ പദ്ധതി പ്രകാരം പാർക്കിങ് കേന്ദ്രങ്ങൾ കണ്ടെത്തി സംവിധാനം ഏർപ്പെടുത്താൻ തീരുമാനിച്ച പ്രധാന റോഡുകൾ ഇവയാണ്: കെഎസ്ആർടിസി റോഡ്, പുതിയ ബസ് സ്റ്റാൻഡ് ഒറ്റത്തൂൺ മേൽപ്പാലത്തിന് താഴെ, റെയിൽവേ സ്റ്റേഷൻ റോഡ്, എംജി റോഡ്, ബാങ്ക് റോഡ്, നായക് റോഡ്, കെവിആർ റാവു റോഡ്, ചന്ദ്രഗിരി റോഡ്, കറന്തക്കാട് റോഡ്. റോഡുകൾ നന്നാക്കി അനുയോജ്യമായ സ്ഥലങ്ങളിൽ ക്രമീകരണങ്ങൾ ഒരുക്കിയ ശേഷമായിരിക്കും ഘട്ടംഘട്ടമായി പേ പാർക്കിങ് നടപ്പാക്കുക.

ആദ്യഘട്ടം കെഎസ്ആർടിസിക്ക് മുന്നിൽ

പദ്ധതിയുടെ ആദ്യഘട്ടം കാസർകോട് കെഎസ്ആർടിസി ബസ് സ്റ്റാൻഡിന് മുൻവശത്ത് ആരംഭിക്കും. ഇവിടെ പാർക്കിങ് സൗകര്യത്തിനായി പുതിയതായി ഇൻ്റർലോക്ക് പാകിയിട്ടുണ്ട്. ഇതുമായി ബന്ധപ്പെട്ട ടെൻഡർ നടപടികൾ പൂർത്തിയാക്കുന്നതിനായി ടെൻഡർ വിളിച്ചിട്ടുണ്ടെന്നും, ഈ മാസം (ഒക്ടോബർ 24-ന്) ലേലം നടക്കുമെന്നും നഗരസഭാ വൈസ് ചെയർമാൻ കെ എം ഹനീഫ പറഞ്ഞു.

തുടക്കത്തിൽ തന്നെ കുറഞ്ഞത് 30 വാഹനങ്ങൾക്കെങ്കിലും ഇവിടെ പാർക്ക് ചെയ്യാൻ കഴിയുന്ന തരത്തിലാണ് സൗകര്യം ഒരുക്കുന്നത്. നിലവിൽ റോഡരികിലും മറ്റും ക്രമരഹിതമായി വാഹനങ്ങൾ നിർത്തിയിടുന്നത് ഒഴിവാക്കാൻ ഇത് സഹായിക്കുമെന്നാണ് പ്രതീക്ഷ. സ്വകാര്യ വ്യക്തികളുടെ സ്ഥലങ്ങൾ വാടകക്കെടുത്ത് പാർക്കിങ് സൗകര്യം ഒരുക്കുന്നതിനുള്ള സാധ്യതയും നഗരസഭ നിലവിൽ പരിശോധിക്കുന്നുണ്ട്.

റെയിൽവേ സ്റ്റേഷൻ, ദേശീയപാത

റെയിൽവേ സ്റ്റേഷൻ റോഡിലെ പൊതുമരാമത്ത് വകുപ്പിൻ്റെ (പിഡബ്ല്യുഡി) കീഴിലുള്ള സ്ഥലം പേ പാർക്കിങ്ങിനായി വിട്ടുനൽകണമെന്ന് അധികൃതരോട് ആവശ്യപ്പെട്ടിട്ടുണ്ടെന്നും, അനുമതി ലഭിച്ചാൽ റെയിൽവേ സ്റ്റേഷൻ പരിസരത്തും നിയന്ത്രിത പാർക്കിങ് സംവിധാനം ആരംഭിക്കുമെന്നും നഗരസഭാ സെക്രട്ടറി ഷാജു പി ബി പറഞ്ഞു. നിലവിൽ റെയിൽവേ സ്റ്റേഷൻ ഭാഗത്ത് വാഹനങ്ങൾ നിയന്ത്രണമില്ലാതെ നിർത്തിയിടുന്നത് വലിയ പ്രതിസന്ധിയാണ് സൃഷ്ടിക്കുന്നത്.

ദീർഘനേരം വാഹനങ്ങൾ ഇവിടെ പാർക്ക് ചെയ്യുന്നത് മറ്റ് യാത്രക്കാർക്കും പൊതുജനങ്ങൾക്കും ബുദ്ധിമുട്ടുണ്ടാക്കുന്നുണ്ട്. അടുത്തിടെ രണ്ട് വാഹനങ്ങൾ ഒരാഴ്ചയോളം ഇവിടെ പാർക്ക് ചെയ്ത സംഭവവും ഉണ്ടായതായി അധികൃതർ ചൂണ്ടിക്കാട്ടി. ഇത്തരം സാഹചര്യങ്ങൾ ഒഴിവാക്കാൻ കൃത്യമായ പാർക്കിങ് സംവിധാനം അനിവാര്യമാണെന്നാണ് നഗരസഭയുടെ വിലയിരുത്തൽ. ഇതിനുപുറമെ, ദേശീയപാതാ അതോറിറ്റിയോട് ഒറ്റത്തൂൺ പാലത്തിനടിയിലെ സ്ഥലം പാർക്കിങ്ങിനായി വിട്ടുനൽകണമെന്നും ആവശ്യപ്പെട്ടിട്ടുണ്ട്.

എംജി റോഡിൽ 'തിരുവനന്തപുരം മാതൃക'

നഗരത്തിലെ പ്രധാന വ്യാപാരപാതയായ എംജി റോഡിലെ പാർക്കിങ് പ്രശ്നം പരിഹരിക്കുന്നതിനായി ജില്ലാ പോലീസ് മേധാവിയും പ്രത്യേക നിർദേശം മുന്നോട്ടുവെച്ചിട്ടുണ്ട്. തിരുവനന്തപുരത്ത് നടപ്പാക്കിയ മാതൃകയിൽ വൊളൻ്റിയർമാരെ ഉപയോഗിച്ച് പാർക്കിങ് നിയന്ത്രിക്കാനാണ് നിർദേശം. വ്യാപാരികൾക്കും ഉപഭോക്താക്കൾക്കും ബുദ്ധിമുട്ടുണ്ടാകാതിരിക്കാൻ ആദ്യ അര മണിക്കൂർ സൗജന്യ പാർക്കിങ് അനുവദിക്കുന്ന രീതിയാണ് പരിഗണിക്കുന്നത്.

അര മണിക്കൂറിന് ശേഷം വാഹനം തുടരുകയാണെങ്കിൽ സമയത്തിൻ്റെ അടിസ്ഥാനത്തിൽ നിരക്ക് ഈടാക്കുന്ന സംവിധാനവും ഏർപ്പെടുത്തും. പുതിയ സംവിധാനം നിലവിൽ വരുന്നതോടെ നഗരത്തിലെ അനധികൃത പാർക്കിങ് വലിയ തോതിൽ നിയന്ത്രിക്കാൻ കഴിയുമെന്നും അധികൃതർ കൂട്ടിച്ചേർത്തു.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Kasaragod Municipality to implement pay-parking to curb traffic congestion.

#KasargodVartha #KasaragodNews #PayParking #TrafficUpdate #KeralaNews #KSRTCKasaragod #MGRoad #MalayalamNews #LocalNewsKerala #RenuNews