റോഡ് പണി പാതിവഴിയിൽ; കാസർകോട് എം ജി റോഡിലെ വ്യാപാരികൾ ദുരിതത്തിൽ!

കാസർകോട്: (KasargodVartha) ദേശീയപാതയുടെയും കുടിവെള്ള പൈപ്പ് ലൈനിന്റെയും പ്രവൃത്തികൾക്കായി ഒരു മാസം മുമ്പ് കളച്ചിട്ട കാസർകോട് എം.ജി. റോഡ്, പുതിയ ബസ് സ്റ്റാൻഡിന് സമീപം സുൽത്താൻ ജ്വല്ലറിക്ക് മുന്നിൽ, പണി പാതിവഴിയിലായതോടെ സമീപത്തെ വ്യാപാരികൾക്ക് വലിയ ദുരിതമായി മാറിയിരിക്കുകയാണ്.

പ്രവൃത്തികൾക്കായി ഒരു മാസം മുമ്പാണ് ഈ ഭാഗത്തെ വ്യാപാര സ്ഥാപനങ്ങൾ അടച്ചിടേണ്ടി വന്നത്. രണ്ടാഴ്ച കാത്തിരുന്നിട്ടും നിർമ്മാണ പ്രവർത്തനങ്ങളിലെ ‘മെല്ലെപ്പോക്ക്’ കാരണം വ്യാപാരികൾ കടകൾ തുറക്കുകയും, ചെറിയ തോതിൽ കുഴികൾ മൂടുകയും ചെയ്തിരുന്നു. റോഡ് തകർന്നു കിടക്കുന്നതിനാൽ കാൽനടയാത്രക്കാർ ഇതുവഴി പോകാൻ മടിക്കുന്നത് കച്ചവടത്തെ സാരമായി ബാധിച്ചതായി വ്യാപാരികൾ പറയുന്നു.

വിഷയം നഗരസഭാ അധികൃതരെയും ദേശീയപാത നിർമ്മാണ കമ്പനി അധികൃതരെയും പല പ്രാവശ്യം അറിയിച്ചിട്ടും നടപടിയുണ്ടായില്ലെന്ന് വ്യാപാരികൾ പരാതിപ്പെടുന്നു. കുടിവെള്ള പൈപ്പ് ലൈൻ പുനഃസ്ഥാപിക്കാനായിരുന്നു റോഡ് കുഴിച്ചത്. 

പൈപ്പ് പുനഃസ്ഥാപിച്ചെങ്കിലും കുഴി മൂടുകയോ റോഡ് റീ-ടാറിങ് ചെയ്ത് ഗതാഗതയോഗ്യമാക്കുകയോ ചെയ്തിട്ടില്ല. ഇതാണ് വ്യാപാരികളുടെ ദുരിതത്തിന് പ്രധാന കാരണം. അധികൃതരുടെ ഭാഗത്തുനിന്ന് നടപടികൾ ഉണ്ടാകാത്തതിനെ തുടർന്ന് വ്യാപാരികൾ കാസർകോട് വ്യാപാരി വ്യവസായി ഏകോപന സമിതി അംഗങ്ങളെയും വിവരം അറിയിച്ചിരുന്നു.

മാസങ്ങളായുള്ള കച്ചവടത്തിലെ അനിശ്ചിതത്വം കാരണം വാടകയും ശമ്പളവും എങ്ങനെ നൽകുമെന്ന ആശങ്കയിലാണ് വ്യാപാരികൾ. വാങ്ങിവെച്ച സാധനങ്ങൾക്കും കേടുപാടുകൾ സംഭവിക്കുന്നുണ്ടെന്നും വലിയ നഷ്ടമാണെന്നും കച്ചവടക്കാർ പറയുന്നു. റോഡ് അടിയന്തരമായി റീ-ടാറിങ് ചെയ്ത് ഗതാഗതയോഗ്യമാക്കണമെന്നാണ് വ്യാപാരികളുടെ പ്രധാന ആവശ്യം.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെച്ച് അഭിപ്രായങ്ങൾ രേഖപ്പെടുത്തുക.

Article Summary: Kasaragod MG Road construction halted, affecting local traders.

#Kasaragod #RoadConstruction #TradersInDistress #KeralaNews #MG Road #Infrastructure