വാതിൽ തുറന്നിട്ടും കെട്ടിവെച്ചും കെഎസ്ആർടിസി മംഗളൂരു സർവീസ്; കർണാടക ബസ്സുകൾക്കെതിരെ നടപടിയില്ലെന്ന് പരാതി

കാസർകോട്: (KasargodVartha) മനഃപൂർവമല്ലാതെ വാതിലടയ്ക്കാൻ വിട്ടുപോകുന്ന കേരള കെഎസ്ആർടിസി ബസ്സുകൾക്ക് വലിയ പിഴ ചുമത്തുന്ന മോട്ടോർ വാഹന വകുപ്പ് അധികൃതർ, വാതിൽ തുറന്നു വെച്ചും കെട്ടിവെച്ചും അമിതവേഗതയിൽ കാസർകോട്-മംഗളൂരു റൂട്ടിൽ സർവീസ് നടത്തുന്ന കർണാടക കെഎസ്ആർടിസി ബസ്സുകൾക്കെതിരെ കണ്ണടയ്ക്കുന്നുവെന്ന് യാത്രക്കാർ പരാതിപ്പെടുന്നു.

കാസർകോട്-മംഗളൂരു ദേശീയപാതയിൽ സർവീസ് നടത്തുന്ന കർണാടക കെഎസ്ആർടിസി ബസ്സുകളിൽ ഭൂരിഭാഗവും വാതിൽ തുറന്നിട്ടാണ് ഓടുന്നത്. ചില ബസ്സുകളിലെ വാതിലുകൾ കെട്ടിയിട്ടിരിക്കുന്നതും കാണാം. കാസർകോട്-മംഗളൂരു റൂട്ടിൽ കർണാടക റോഡ് ട്രാൻസ്പോർട്ട് കോർപ്പറേഷന്റെ ബസ്സുകൾ അശ്രദ്ധയിലും അമിതവേഗതയിലുമാണ് സർവീസ് നടത്തുന്നതെന്ന പരാതി നേരത്തെ തന്നെയുണ്ട്. 

വാതിൽ തുറന്നു വെച്ചുള്ള ഈ ഓട്ടം അപകട സാധ്യത വർദ്ധിപ്പിക്കുന്നു. കഴിഞ്ഞ മാസം തലപ്പാടിയിൽ കർണാടക ട്രാൻസ്പോർട്ട് ബസ് നിയന്ത്രണം വിട്ട് ഓട്ടോയിലിടിച്ച് ആറു പേർ മരിച്ചത് വലിയ പ്രതിഷേധങ്ങൾക്ക് കാരണമായിരുന്നു. തുടർന്ന് നാട്ടുകാർ ഈ റൂട്ടിലെ ബസ്സുകൾ തടഞ്ഞു വെച്ച് സർവീസിന് യോഗ്യമല്ലാത്ത പോരായ്മകൾ ചൂണ്ടിക്കാട്ടിയിരുന്നു. എന്നിട്ടും അമിതവേഗതയ്ക്കോ അശ്രദ്ധമായ സർവീസിനോ ഒരു കുറവുമില്ല. അപകടം നടന്ന ദിവസത്തിൽ മാത്രമാണ് അന്വേഷണങ്ങളും പരിശോധനകളും നടന്നത്.

ബസ്സുകൾ ഡിപ്പോയിൽ നിന്ന് സർവീസ് ആരംഭിക്കുമ്പോൾ പൂർണ്ണ സജ്ജമാണോ എന്ന കാര്യത്തിൽ കർണാടക ട്രാൻസ്പോർട്ട് കോർപ്പറേഷൻ വേണ്ടത്ര പരിശോധന നടത്തുന്നില്ലെന്നാണ് യാത്രക്കാരുടെ പ്രധാന ആക്ഷേപം. യാത്രക്കാർക്ക് കയറുന്ന വാതിലുകൾക്ക് പോലും സുരക്ഷയൊരുക്കാൻ അധികൃതർക്ക് കഴിയുന്നില്ല. 

കേരളത്തിലെ മോട്ടോർ വാഹന വകുപ്പ് ഉദ്യോഗസ്ഥർ മറ്റ് വാഹനങ്ങൾ കർശനമായി പരിശോധിക്കാറുണ്ടെങ്കിലും, കർണാടക ട്രാൻസ്പോർട്ട് ബസ്സുകളെ ഇത്തരം പരിശോധനകളിൽ നിന്ന് ഒഴിവാക്കുകയാണ്. സർവീസ് റോഡിലൂടെ ഓടേണ്ട കേരള-കർണാടക കെഎസ്ആർടിസി ബസ്സുകൾ മത്സര ഓട്ടത്തിൽ പലപ്പോഴും നിയമം ലംഘിച്ച് ദേശീയപാതയിലൂടെ ഓടുന്നതും അധികൃതർ കണ്ടില്ലെന്ന് നടിക്കുന്നു. ഇതിന്റെ ദുരന്തഫലമാണ് തലപ്പാടിയിലെ അപകടമെന്ന് യാത്രക്കാർ ചൂണ്ടിക്കാട്ടുന്നു.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവെയ്ക്കൂ, നിങ്ങളുടെ സുഹൃത്തുക്കളുമായി ഇത് ഷെയർ ചെയ്യൂ.

Article Summary: MVD criticized for inaction against unsafe Karnataka buses.

#Kasaragod #KSRTC #RoadSafety #Mangaluru #KeralaNews #TrafficViolation