കാസർകോട് കെഎസ്ടിപി റോഡിൽ വൻ ഗർത്തം; പഴയ പ്രസ് ക്ലബ്ബിനും ചന്ദ്രഗിരിപ്പാലത്തിനുമിടയിൽ യാത്രക്കാർ ദുരിതത്തിൽ

കാസർകോട്: (KasargodVartha) കെഎസ്ടിപി റോഡിൽ കാസർകോട് പഴയ പ്രസ് ക്ലബ്ബിനും ചന്ദ്രഗിരിപ്പാലത്തിനുമിടയിൽ രൂപപ്പെട്ട വലിയ ഗർത്തം വാഹനയാത്രക്കാർക്ക് കടുത്ത ഭീഷണിയാകുന്നു. റോഡിൻ്റെ പ്രധാന ഭാഗത്ത് തന്നെ കുഴി രൂപപ്പെട്ടതോടെ ദീർഘദൂര യാത്രക്കാരടക്കമുള്ള വാഹനങ്ങൾ അപകടസാധ്യത ഒഴിവാക്കാൻ പെട്ടെന്ന് വേഗം കുറയ്ക്കേണ്ട അവസ്ഥയാണ് നിലവിലുള്ളത്.

കാസർകോട് നഗരത്തിൽ നിന്ന് ചന്ദ്രഗിരി പാലം വഴി കാഞ്ഞങ്ങാട് ഭാഗത്തേക്കും തിരിച്ചും പോകുന്ന നിരവധി വാഹനങ്ങൾ ദിവസവും ഇതുവഴി കടന്നുപോകുന്നുണ്ട്. ഗർത്തം ദൂരത്തുനിന്ന് വ്യക്തമായി ശ്രദ്ധയിൽപ്പെടാത്തതിനാൽ പ്രത്യേകിച്ച് രാത്രികാലങ്ങളിൽ ഇരുചക്രവാഹനങ്ങൾക്കും ചെറിയ വാഹനങ്ങൾക്കും അപകടസാധ്യത കൂടുതലാണ്. കുഴിയിൽ ചാടിയിറങ്ങുന്ന വാഹനങ്ങൾക്ക് നിയന്ത്രണം നഷ്ടപ്പെടാനും കേടുപാടുകൾ സംഭവിക്കാനും സാധ്യതയേറെയാണ്.

വലിയ ഗർത്തത്തിനു പുറമെ അങ്ങിങ്ങായി ചെറുതും വലുതുമായ ഏതാനും കുഴികൾ ഇവിടെ രൂപപ്പെട്ടിട്ടുണ്ട്. രാത്രികാലങ്ങളിൽ ദീർഘദൂര യാത്ര ചെയ്യുന്നവർ ഈ കുഴികളിൽ വീണ് വാഹനങ്ങൾക്ക് കേടുപാടുകൾ പറ്റുകയും മറ്റും സംഭവിച്ച് ഇവിടെ കുടുങ്ങിക്കിടക്കുന്ന കാഴ്ചകൾ പതിവായിട്ടുണ്ട്. നേരത്തെ ഇൻ്റർലോക്ക് പാകിയ ഭാഗത്തും കുഴികൾ രൂപപ്പെട്ടിട്ടുണ്ട്.

മഴ പെയ്യുന്ന സമയത്ത് ഗർത്തത്തിൽ വെള്ളം കെട്ടിനിൽക്കുകയും ആഴം തിരിച്ചറിയാൻ കഴിയാത്ത സ്ഥിതിയുണ്ടാകുകയും ചെയ്യുന്നു. ഇതോടെ വാഹനങ്ങൾ ഇതിൽ വീണ് യന്ത്രങ്ങളുടെ പ്രവർത്തനം നിലയ്ക്കുന്നത് ഈ ഭാഗത്ത് പതിവാണ്.

പണി തുടങ്ങാൻ കാത്തിരിപ്പ്

കെഎസ്ടിപി റോഡിൻ്റെ നവീകരണ പ്രവർത്തനങ്ങൾ ഊരാളുങ്കൽ ലേബർ കോൺട്രാക്ട് കോ-ഓപ്പറേറ്റീവ് സൊസൈറ്റിയുടെ നേതൃത്വത്തിൽ ആരംഭിച്ചിട്ടുണ്ടെങ്കിലും, നിലവിൽ പണി കാഞ്ഞങ്ങാട് സൗത്ത് ഭാഗത്തുനിന്നാണ് പുരോഗമിക്കുന്നത്. അതിനാൽ കാസർകോട് നഗരപരിധിയിലെ ഈ ഭാഗത്തെ റോഡിൻ്റെ അറ്റകുറ്റപ്പണിക്ക് ഇനിയും കാത്തിരിക്കേണ്ട സാഹചര്യമാണുള്ളത്. നവീകരണ പ്രവൃത്തി പൂർത്തിയാകുന്നതുവരെ ഗർത്തം അതേപടി തുടരുന്നത് യാത്രക്കാർക്ക് വലിയ ബുദ്ധിമുട്ടുണ്ടാക്കുമെന്നാണ് നാട്ടുകാരുടെ പരാതി.

പഴയ ദുരന്തം ആവർത്തിക്കരുത്

റോഡ് നവീകരണത്തിൻ്റെ ഭാഗമായി സ്ഥിരമായ പരിഹാരം ഉണ്ടാകുന്നതിന് മുമ്പ് താൽക്കാലികമായി കുഴിയടച്ച് ഗതാഗതം സുരക്ഷിതമാക്കണമെന്നാണ് യാത്രക്കാരുടെയും നാട്ടുകാരുടെയും പ്രധാന ആവശ്യം. മംഗ്ളൂരുവിലെ കോളേജ് വിദ്യാർഥികൾ ബേക്കൽ കോട്ടകണ്ട് മടങ്ങുമ്പോൾ ഇവിടുത്തെ കുഴിയിൽ വീണ് ഒരു വിദ്യാർഥിനി മരിച്ച ശേഷമാണ് മുമ്പ് ഇതേ ഭാഗത്തെ റോഡ് ഗതാഗതയോഗ്യമാക്കിയത്. അപകടം സംഭവിച്ച ശേഷം നടപടിയെടുക്കുന്നതിന് പകരം അടിയന്തരമായി സ്ഥലത്ത് പരിശോധന നടത്തി ആവശ്യമായ അറ്റകുറ്റപ്പണി നടത്തണമെന്നാണ് ആവശ്യം.

ദീർഘദൂര ബസുകൾ, ചരക്ക് വാഹനങ്ങൾ, സ്വകാര്യ വാഹനങ്ങൾ തുടങ്ങി നിരവധിയാളുകൾ ആശ്രയിക്കുന്ന പ്രധാന പാതയായതിനാൽ ഗർത്തം എത്രയും വേഗം അടയ്ക്കാൻ ബന്ധപ്പെട്ട അധികൃതർ നടപടി സ്വീകരിക്കണം. അതേസമയം, കുഴിയടക്കാൻ കരാർ കമ്പനിക്ക് നിർദേശം നൽകിയതായി പൊതുമരാമത്ത് റോഡ്സ് വിഭാഗം എക്സിക്യൂട്ടീവ് എൻജിനീയർ ശ്രീനിത്കുമാർ പ്രതികരിച്ചു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: A massive crater on the Kasaragod KSTP road poses severe risks to motorists, prompting urgent demands for repairs.

#KasargodVartha #KSTPRoad #RoadAccidentRisk #ChandragiriBridge #KeralaRoads #MalayalamNews #AparnaNews