പഴയ പ്രസ് ക്ലബ് ജങ്ഷനിലെ പാത തകർച്ചയ്ക്ക് പരിഹാരമാകുന്നു; കെപിആർ റാവു റോഡിലെ 'പാതാളക്കുഴി'ക്ക് മോചനമില്ല

കാസർകോട്: (KasargodVartha) പഴയ പ്രസ് ക്ലബ് ജങ്ഷനിലെ ട്രാഫിക് ജങ്ഷനിൽ ഉണ്ടായ റോഡ് തകർച്ചയ്ക്ക് പരിഹാരം കാണാൻ നഗരസഭാ അധികൃതർ നടപടികൾ തുടങ്ങിയപ്പോൾ, കാസർകോട് കെ.എസ്.ആർ.ടി.സി. ഡിപ്പോയ്ക്ക് സമീപമുള്ള കെ.പി.ആർ. റാവു റോഡിലെ വലിയ കുഴി അടയ്ക്കാൻ ഇതുവരെയും നടപടിയായിട്ടില്ല.

മാസങ്ങളായിട്ടാണ് റാവു റോഡിൽ ഈ വലിയ ഗർത്തം രൂപം കൊണ്ടിട്ടുള്ളത്. കെ.എസ്.ആർ.ടി.സി. ബസുകൾക്ക് ഡിപ്പോയിലേക്ക് ഇറങ്ങാൻ ഇത് വലിയ പ്രയാസമുണ്ടാക്കുന്നുണ്ട്. കെ.എസ്.ആർ.ടി.സി. ഡിപ്പോയുടെ മുൻവശത്ത് പലപ്പോഴും ഉണ്ടാകുന്ന ഗതാഗതക്കുരുക്ക് ഒഴിവാക്കാനാണ് ബസുകൾ കെ.പി.ആർ. റാവു റോഡിലെ പിൻവശം വഴി ഡിപ്പോയിൽ പ്രവേശിക്കുന്നത്.

കെ.എസ്.ആർ.ടി.സി. ഡിപ്പോയ്ക്ക് സമീപം വർക്ക്‌ഷോപ്പ് സ്ഥിതി ചെയ്യുന്ന ഭാഗത്തുള്ള കെ.പി.ആർ. റാവു റോഡിലാണ് വലിയ കുഴി രൂപപ്പെട്ട് ഗർത്തമായി മാറിയിരിക്കുന്നത്. കുഴിയിൽ നിറയെ ചെളിവെള്ളം കെട്ടിക്കിടക്കുന്നത് കാരണം രാത്രികാലങ്ങളിൽ ഇതുവഴി പോകുന്ന ഇരുചക്രവാഹനക്കാരും ഓട്ടോറിക്ഷകളും അപകടത്തിൽപ്പെടുന്നതായും പരാതിയുണ്ട്.

ഡിപ്പോയിൽ നിന്ന് നിരവധി കെ.എസ്.ആർ.ടി.സി. ബസുകളും പഴയ ബസ് സ്റ്റാൻഡ് വഴി പുതിയ ബസ് സ്റ്റാൻഡിലേക്ക് പോകുന്നത് ഈ കുഴി മറികടന്നാണ്. കുഴി വലിയ തോതിൽ ഗർത്തമായത് ഇതുവഴി പോകുന്ന ഇരുചക്രവാഹനങ്ങൾ ഉൾപ്പെടെയുള്ളവർക്ക് അപകട ഭീഷണിയായി മാറിയിരിക്കുകയാണ്.

കെ.പി.ആർ. റാവു റോഡിലെ ഈ കുഴി മൂടാൻ അടിയന്തിര നടപടി ഉണ്ടാകണമെന്നാണ് വ്യാപാരികളും, കെ.എസ്.ആർ.ടി.സി. ജീവനക്കാരും, യാത്രക്കാരും ഒരേ സ്വരത്തിൽ ആവശ്യപ്പെടുന്നത്.

കാസർകോട്ടെ ഈ ദുരിതം അധികൃതരുടെ ശ്രദ്ധയിൽ പെടുത്താൻ നിങ്ങൾ ആഗ്രഹിക്കുന്നുണ്ടോ? ഈ വാർത്ത ഷെയർ ചെയ്യുക. 

Article Summary: Kasaragod's KPR Rao Road pothole near KSRTC depot remains unrepaired for months, posing danger.

#KasaragodRoads #PotholeDanger #KPRRaoRoad #KSRTCKasaragod #RoadSafety #KasargodNews