റോഡല്ല, കുഴികൾ മാത്രം! കാസർകോട്-കാഞ്ഞങ്ങാട് പാതയിലെ യാത്രാദുരിതം തുടരുന്നു

കാസർകോട്: (KasargodVartha) കാസർകോട്-കാഞ്ഞങ്ങാട് സംസ്ഥാന പാതയിലെ യാത്രാദുരിതത്തിന് ഉടൻ പരിഹാരമുണ്ടാകുമോ എന്ന് ചോദിക്കുകയാണ് യാത്രക്കാർ. ദേശീയപാതയിലെ നിർമ്മാണം കാരണം ദീർഘദൂര, ഹ്രസ്വദൂര യാത്രക്കാർ ആശ്രയിക്കുന്ന പ്രധാന പാതയാണിത്.

കാഞ്ഞങ്ങാട്ടേക്ക് എളുപ്പത്തിൽ എത്താൻ കഴിയുന്നതിനാൽ ലോറികൾ ഉൾപ്പെടെയുള്ള വാഹനങ്ങൾ ഈ വഴിയാണ് തിരഞ്ഞെടുക്കുന്നത്. എന്നാൽ, മാസങ്ങളായി ഈ പാത തകർന്നു കിടക്കുകയാണ്.

കാസർകോട് മുതൽ കാഞ്ഞങ്ങാട് വരെയുള്ള പാതയിലെ കുഴികൾ എണ്ണുന്നതിനേക്കാൾ എളുപ്പം കുഴിയില്ലാത്ത ഭാഗം ഏതെന്ന് കണ്ടെത്തുകയായിരിക്കും. അത്രയേറെ കുഴികളാൽ നിറഞ്ഞതാണ് ഈ പാത.

ചെമ്മനാട് സ്കൂളിന് സമീപമുള്ള കുഴിയിൽക്കൂടി വേണമെങ്കിൽ മഹാബലിക്ക് പാതാളത്തിൽനിന്ന് ഓണത്തിന് പ്രജകളെ സന്ദർശിക്കാൻ എളുപ്പത്തിൽ എത്താൻ കഴിയുമെന്നാണ് യാത്രക്കാർ പരിഹസിക്കുന്നത്. അത്രയും വലിയ കുഴിയാണ് അവിടെയുള്ളത്.

ചളിയങ്കോട്, മേൽപ്പറമ്പ്, ഉദുമ റെയിൽവേ മേൽപ്പാലം, ഉദുമ ടൗൺ, ബേക്കൽ പോലീസ് സ്റ്റേഷൻ പരിസരം, തൃക്കണ്ണാട്, ബേക്കൽ സ്കൂൾ പരിസരം, ബേക്കൽ പാലം, ബേക്കൽ റെയിൽവേ മേൽപ്പാലം, ചേറ്റുകുണ്ട് എന്നിവിടങ്ങളിൽ വലിയ കുഴികളാണ് ഉള്ളത്.

ഈ റൂട്ടിൽ സ്ഥിരമായി ബസ് യാത്ര ചെയ്യുന്നവരാണ് ഏറ്റവും കൂടുതൽ ദുരിതമനുഭവിക്കുന്നത്. കൂടാതെ, നിരവധി വാഹനങ്ങളാണ് ദിവസേന അപകടത്തിൽപ്പെടുന്നത്. കുഴികൾ വെട്ടിച്ചുപോകുമ്പോൾ വാഹനങ്ങൾ കൂട്ടിയിടിച്ച് അപകടമുണ്ടാകുന്നത് പതിവുകാഴ്ചയാണ്. 

പ്രത്യേകിച്ചും ഇരുചക്രവാഹനങ്ങൾ. വലിയ കുഴികളിൽ വീണ് വാഹനങ്ങളുടെ ആക്‌സിൽ ഒടിയുന്നതും ടയർ പഞ്ചറാകുന്നതും നിത്യസംഭവമാണ്.

ഗ്രാമീണ റോഡുകൾ പോലും മികച്ച നിലവാരത്തിലുള്ള കേരളത്തിൽ, ഏറ്റവും കൂടുതൽ ആളുകൾ ഉപയോഗിക്കുന്ന ഈ സംസ്ഥാന പാതയുടെ ദുരവസ്ഥ ഏറെ സങ്കടകരമാണ്. വലിയ കുഴികളെങ്കിലും അടച്ച് ഗതാഗതയോഗ്യമാക്കിയാൽ മതിയെന്ന നിലപാടിലാണ് നാട്ടുകാർ.

നടുവൊടിയാതെ, വാഹനം വഴിയിൽ കിടക്കാതെ ലക്ഷ്യസ്ഥാനത്ത് എത്താൻ സഹായിക്കുന്ന അടിയന്തര നടപടി ഉണ്ടാകണമെന്നാണ് യാത്രക്കാരുടെ പ്രധാന ആവശ്യം.

റോഡിന്റെ അറ്റകുറ്റപ്പണികൾ മഴ നിന്നാലുടൻ ആരംഭിക്കുമെന്നാണ് പി.ഡബ്ല്യു.ഡി. ഉദ്യോഗസ്ഥർ വ്യക്തമാക്കുന്നത്. ഇതിനായി ഫണ്ട് അനുവദിച്ചിട്ടുണ്ട്.

നിങ്ങളുടെ സ്ഥലത്തെ റോഡുകളുടെ അവസ്ഥ എന്താണ്? ഈ റോഡ് നന്നാക്കാൻ സർക്കാർ എന്ത് നടപടിയാണ് സ്വീകരിക്കേണ്ടത്? നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Pothole-filled Kasaragod-Kanhangad road causes distress.

#Kasaragod #Potholes #RoadSafety #KeralaRoads #Kanhangad #CommuterWoes