കുഞ്ഞൻ മത്തിയെ പിടിക്കാൻ പാടില്ല, പക്ഷേ മാർക്കറ്റിൽ വിൽക്കാം; കാസർകോട്ടെ ഫിഷറീസ്-എൻഫോഴ്സ്മെൻ്റ് നടപടികളിൽ വ്യാപക പ്രതിഷേധം

കാസർകോട്: (KasargodVartha) കുഞ്ഞു മത്സ്യങ്ങളെ കടലിൽ നിന്ന് പിടിക്കാൻ പാടില്ല, എന്നാൽ കരയിലെത്തിച്ചാൽ യാതൊരു തടസ്സവുമില്ലാതെ വിൽക്കാം. കാസർകോട്ടെ ഫിഷറീസ് വകുപ്പിൻ്റെയും എൻഫോഴ്സ്മെൻ്റിൻ്റെയും വിചിത്രമായ നടപടികളിൽ വ്യാപക പ്രതിഷേധം. ജില്ലയിലെ തുറമുഖങ്ങളിൽ നിന്ന് 'കുഞ്ഞൻ മത്തി' പിടികൂടാൻ അധികൃതർ കർശന പരിശോധന നടത്തുമ്പോഴും, പ്രാദേശിക മത്സ്യ മാർക്കറ്റുകളിൽ ഇതിൻ്റെ വിൽപ്പന തകൃതിയായി നടക്കുകയാണ്. അധികൃതരുടെ നടപടികൾ തോന്നുംപടിയാണെന്നാണ് ആക്ഷേപം.

10 സെൻ്റീമീറ്ററിന് താഴെ വലിപ്പമുള്ള ചെറിയ മത്തിക്കുഞ്ഞുങ്ങളെ വ്യാപകമായിട്ടാണ് കഴിഞ്ഞ ഏതാനും ദിവസങ്ങളിലായി വിവിധ ഹാർബറുകളിൽ നിന്ന് ഫിഷറീസ് വകുപ്പ് അധികൃതർ പിടികൂടിയത്. ഇതിനിടെ പരിശോധനയ്ക്കെത്തിയ ഉദ്യോഗസ്ഥരെ മത്സ്യത്തൊഴിലാളികൾ തടയുന്നത് ഉൾപ്പെടെയുള്ള സംഭവങ്ങളും, തുടർന്ന് പൊലീസ് ഇടപെടലുകളും തുറമുഖങ്ങളിൽ ഉണ്ടായി. പിടിച്ചെടുത്ത കുഞ്ഞൻ മത്തികളെ നശിപ്പിച്ചും, കടലിലേക്ക് ഒഴുക്കി കളഞ്ഞുമാണ് അധികൃതർ നടപടി സ്വീകരിച്ചത്. ഇതിന് പുറമെ ചില സ്ഥലങ്ങളിൽ നിന്ന് വള്ളങ്ങൾ കസ്റ്റഡിയിലെടുക്കുകയും ചെയ്തിരുന്നു.

മുന്നറിയിപ്പുമായി സിഎംഎഫ്ആർഐ

കടലിൽ നിന്ന് 10 സെൻ്റീമീറ്ററിന് താഴെ വലിപ്പമുള്ള മത്തിക്കുഞ്ഞുങ്ങളെ പിടികൂടുന്നത് സമുദ്ര ആവാസ വ്യവസ്ഥയെയും മത്തിയുടെ ലഭ്യതയെയും സാരമായി ബാധിക്കുന്നുവെന്ന് കേന്ദ്ര സമുദ്ര മത്സ്യ ഗവേഷണ കേന്ദ്രം മുന്നറിയിപ്പ് നൽകിയിരുന്നു. ഇതിന് പിന്നാലെയാണ് ഫിഷറീസ് വകുപ്പ് തങ്ങളുടെ നടപടി കടുപ്പിച്ചത്. കേരളത്തിലെ മത്സ്യാഹാര പ്രേമികൾക്ക് ഏറ്റവും ഇഷ്ടപ്പെട്ട മത്സ്യ വിഭവമാണ് മത്തി. മത്തി കുഞ്ഞുങ്ങളെ വ്യാപകമായി പിടികൂടുന്നത് കാരണം മുൻ വർഷങ്ങളിൽ മത്തിയുടെ ലഭ്യത ഗണ്യമായി കുറഞ്ഞതായി ഔദ്യോഗിക കണക്കുകൾ വ്യക്തമാക്കുന്നുണ്ട്.

പരിശോധന തുടരുമെന്ന് അധികൃതർ

കടലിൽ നിന്ന് ചെറുമീനുകളെ പിടികൂടുന്നത് തടയാൻ വരും ദിവസങ്ങളിലും ശക്തമായ പരിശോധനകൾ തുടരുമെന്ന് ഫിഷറീസ് വകുപ്പ് അധികൃതർ വ്യക്തമാക്കുന്നു. എന്നാൽ അധികൃതർ ഇങ്ങനെ പറയുമ്പോഴാണ് ജില്ലയിലെ മത്സ്യ മാർക്കറ്റുകളിൽ മത്തിക്കുഞ്ഞുങ്ങളുടെ വിൽപ്പന യാതൊരു തടസ്സവുമില്ലാതെ ഇപ്പോഴും പൊടിപൊടിക്കുന്നത്.

ഈ പ്രാദേശിക വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകളും വിവരങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Fisheries and Enforcement departments in Kasaragod are cracking down on catching juvenile sardines under 10 cm, seizing boats and destroying catches following CMFRI warnings. However, fishermen protest the authorities' double standards, as juvenile sardines continue to be sold freely in local fish markets.

#KasargodVartha #KasaragodNews #FisheriesDepartment #JuvenileSardines #CMFRI #KeralaFishermen #MarineEcosystem #MalayalamNews #AparnaNews