കാസർകോട്ട് നാശനഷ്ടങ്ങൾ; 5 ദുരിതാശ്വാസ ക്യാമ്പുകൾ തുറന്നു, കവചം സൈറൺ മുഴങ്ങും; നദികളിൽ ജലനിരപ്പുയർന്നു മധൂർ കാര്യംകോട് പുഴകളിൽ മഞ്ഞ ജാഗ്രത; വരും ദിവസങ്ങളിലും അതിശക്തമായ മഴയ്ക്ക് സാധ്യത

കാസർകോട്: (KasargodVartha) കനത്ത മഴയെത്തുടർന്നുണ്ടായ നാശനഷ്ടങ്ങളുടെയും ദുരിതാശ്വാസ പ്രവർത്തനങ്ങളുടെയും വിവരങ്ങൾ വിലയിരുത്തുന്നതിനായി ജില്ലാ ദുരന്തനിവാരണ അതോറിറ്റി യോഗം ചേർന്നു. ജില്ലാ ദുരന്തനിവാരണ അതോറിറ്റി ചെയർമാൻ കൂടിയായ ജില്ലാ കലക്ടർ അർജുൻ പാണ്ഡ്യൻ്റെ അധ്യക്ഷതയിലായിരുന്നു യോഗം. അറബിക്കടലിൽ രൂപപ്പെട്ട ന്യൂനമർദത്തിൻ്റെ സ്വാധീനഫലമായി വടക്കൻ കേരളത്തിൽ വരും ദിവസങ്ങളിലും അതിതീവ്ര മഴ തുടരുമെന്നാണ് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകിയിട്ടുള്ളത്. മഴക്കെടുതി നേരിടുന്നതിനായി ജില്ലാ ഭരണകൂടത്തിൻ്റെ നേതൃത്വത്തിൽ അടിയന്തര മുൻകരുതലുകളും ദുരിതാശ്വാസ പ്രവർത്തനങ്ങളും ഊർജിതമായി പുരോഗമിക്കുകയാണ്.

ജില്ലയിൽ കഴിഞ്ഞ ദിവസങ്ങളിൽ ഉദ്യോഗസ്ഥർ കൃത്യമായി ഫീൽഡിൽ ഉണ്ടായിരുന്നുവെന്നും മുഴുവൻ പ്രവർത്തനങ്ങളും ഭംഗിയായി ഏകോപിപ്പിക്കാൻ സാധിച്ചുവെന്നും ജില്ലാ കലക്ടർ അറിയിച്ചു. രണ്ടു ദിവസം കൂടി ജാഗ്രതയോടെ ഇരിക്കണം. മുഴുവൻ ഉദ്യോഗസ്ഥരും ഏത് സാഹചര്യവും നേരിടാൻ സജ്ജമായിരിക്കേണ്ടതാണെന്നും അദ്ദേഹം നിർദേശിച്ചു.

ജില്ലാ പഞ്ചായത്ത് പ്രസിഡൻ്റ് സാബു എബ്രഹാം, എഡിഎം പി ഉദയകുമാർ, കാഞ്ഞങ്ങാട് ആർഡിഒ സുദീപ്, കാസർകോട് ആർഡിഒ വിജുകുമാർ, എൽഎസ്ജിഡി ജോയിൻ്റ് ഡയറക്ടർ കെ വി ഹരിദാസ്, ഡിവിഷണൽ ഫോറസ്റ്റ് ഓഫീസർ ജോസ് മാത്യു, ഫിഷറീസ് ഡെപ്യൂട്ടി ഡയറക്ടർ ഷൈനി, ജില്ലാ മെഡിക്കൽ ഓഫീസർ കെ ടി രേഖ തുടങ്ങി വിവിധ വകുപ്പ് മേധാവികൾ യോഗത്തിൽ സംസാരിച്ചു. മഞ്ചേശ്വരം തഹസിൽദാർ എൽ കെ സുബൈർ, കാസർകോട് തഹസിൽദാർ ശ്രീകുമാർ, ഹോസ്ദുർഗ് തഹസിൽദാർ കെ രമേശൻ, വെള്ളരിക്കുണ്ട് തഹസിൽദാർ കെ ബി രാമു തുടങ്ങിയവരും യോഗത്തിൽ പങ്കെടുത്തു.

ദുരിതാശ്വാസ ക്യാമ്പുകൾ

തുടക്കത്തിൽ നാല് ദുരിതാശ്വാസ ക്യാമ്പുകളിലായി 156 പേരെയാണ് (പുരുഷന്മാർ: 73, സ്ത്രീകൾ: 60, കുട്ടികൾ: 27, ആകെ 37 കുടുംബങ്ങൾ) മാറ്റിപ്പാർപ്പിച്ചിരുന്നത്. എന്നാൽ മഴ കനത്തതോടെ ക്യാമ്പുകളുടെ എണ്ണം അഞ്ചായി. വെള്ളരിക്കുണ്ട് താലൂക്കിൽ മൂന്നും ഹോസ്ദുർഗ് താലൂക്കിൽ രണ്ടും ക്യാമ്പുകളാണുള്ളത്. നിലവിൽ ഈ ക്യാമ്പുകളിൽ എല്ലാമായി 59 കുടുംബങ്ങളിലെ 208 പേർ മാറ്റിപ്പാർപ്പിക്കപ്പെട്ടിട്ടുണ്ട്. ഇതിൽ 85 പുരുഷന്മാരും 93 സ്ത്രീകളും 34 കുട്ടികളും ഉൾപ്പെടുന്നു.

പാലാവയൽ, കിനാനൂർ-കരിന്തളം, പേരോൽ, ക്ലായിക്കോട് വില്ലേജുകളിലാണ് ക്യാമ്പുകൾ തുറന്നത്. തയ്യേനി ഗവൺമെൻ്റ് ഹൈസ്കൂൾ, ദേശസേവനി വായനശാല, ചുള്ളിക്കര എൽപി സ്കൂൾ, ചാത്തമത്ത് അമ്പലത്തിലെ ഓഡിറ്റോറിയം, ക്ലായിക്കോട് നായനാർ മന്ദിരം എന്നിവിടങ്ങളിലാണ് ക്യാമ്പുകൾ പ്രവർത്തിക്കുന്നത്. ഇതിന് പുറമെ അപകടസാധ്യതയുള്ള പ്രദേശങ്ങളിൽ നിന്നും മുൻകരുതലിൻ്റെ ഭാഗമായി 67 കുടുംബങ്ങൾ ബന്ധുവീടുകളിലേക്കും മാറി താമസിച്ചിട്ടുണ്ട്.

ഉരുൾപൊട്ടലും നാശനഷ്ടങ്ങളും

മരണങ്ങളോ കാണാതായ സംഭവങ്ങളോ ജില്ലയിൽ ഇതുവരെ റിപ്പോർട്ട് ചെയ്തിട്ടില്ല. എന്നാൽ ദേലംപാടി വില്ലേജിലെ 14 വയസ്സുകാരിയായ അശ്വനിക്ക് മഴക്കെടുതിയിൽ പരിക്കേറ്റിട്ടുണ്ട്. തയ്യേനി (പാലവയൽ വില്ലേജ്), കാറ്റാംകവല (മാലോത്ത് വില്ലേജ്) എന്നിവിടങ്ങളിൽ രണ്ട് ഉരുൾപൊട്ടലുകൾ റിപ്പോർട്ട് ചെയ്തു. പശ്ചിമഘട്ട മലനിരകളോട് ചേർന്നുനിൽക്കുന്ന ഈ പ്രദേശങ്ങളിൽ മണ്ണിടിച്ചിലിനുള്ള സാധ്യത മുൻകൂട്ടി കണ്ട് ജനങ്ങളെ സുരക്ഷിത സ്ഥാനങ്ങളിലേക്ക് മാറ്റിയത് വൻ ദുരന്തം ഒഴിവാക്കാൻ സഹായിച്ചു. കഴിഞ്ഞദിവസം റിപ്പോർട്ട് ചെയ്ത ഉരുൾപൊട്ടലിൻ്റെ ഉദ്ഭവസ്ഥാനം കണ്ടെത്താൻ വനംവകുപ്പ് ഉദ്യോഗസ്ഥർ ശ്രമിക്കുകയാണെന്ന് ഡിഎഫ്ഒ അറിയിച്ചു.

ഉരുൾപൊട്ടലുമായി ബന്ധപ്പെട്ട വിവരങ്ങൾ കൂടുതൽ പഠിക്കുന്നതിനായി ജിയോളജിസ്റ്റ്, സോയിൽ സർവേ ഉദ്യോഗസ്ഥർ, ഹസാർഡ് അനലിസ്റ്റ്, ഫോറസ്റ്റ്, എൽഎസ്ജിഡി ഉദ്യോഗസ്ഥർ തുടങ്ങിയവർ ചേർന്ന് പ്രവർത്തിക്കണമെന്ന് ജില്ലാ കലക്ടർ നിർദേശം നൽകി. ഈ പ്രവർത്തനത്തിൻ്റെ കോർഡിനേഷൻ ചുമതല കാഞ്ഞങ്ങാട് ആർഡിഒയ്ക്കാണ്. അച്ചാംതുരുത്തിയിലും ഭീമനടിയിലും രണ്ട് പാലങ്ങൾ പൂർണമായും തകർന്നതായി തഹസിൽദാർമാർ റിപ്പോർട്ട് ചെയ്തു.

ജില്ലയിൽ ആകെ 11 വീടുകൾ ഭാഗികമായി തകർന്നു. വെള്ളരിക്കുണ്ട് താലൂക്കിൽ അഞ്ചും കാസർകോട് താലൂക്കിൽ മൂന്നും മഞ്ചേശ്വരം താലൂക്കിൽ രണ്ടും ഹോസ്ദുർഗ് താലൂക്കിൽ ഒരു വീടുമാണ് തകർന്നത് (കുറിഞ്ഞി നെല്ലിക്കുന്ന് - പനത്തടി വില്ലേജ്, ഉജ്ജമ്പാടി - ദേലംപാടി വില്ലേജ്, പാഡ്രെ വില്ലേജ്, ബയാർ വില്ലേജ് തുടങ്ങിയവ ഉൾപ്പെടെ). കാലവർഷക്കെടുതിയുമായി ബന്ധപ്പെട്ട നാശനഷ്ടങ്ങളുടെ കണക്കെടുപ്പ് എത്രയും പെട്ടെന്ന് പൂർത്തിയാക്കണമെന്നും എൽഎസ്ജിഡി, റവന്യൂ, കൃഷി വിഭാഗങ്ങളുടെ ജോയിൻ്റ് ഇൻസ്പെക്ഷൻ പൂർത്തിയാക്കി കണക്കുവിവരങ്ങൾ വേഗത്തിൽ ലഭ്യമാക്കണമെന്നും കലക്ടർ നിർദേശിച്ചു. ഇത് ദുരിതം സംഭവിച്ച ആളുകൾക്ക് കൃത്യമായി തുക വിതരണം ചെയ്യാൻ സഹായിക്കും. മധൂർ, കാര്യംകോട് പുഴകളിൽ നിലവിൽ മഞ്ഞ ജാഗ്രതയുണ്ട്. പുഴകളുടെ കരകളിൽ താമസിക്കുന്ന ആളുകൾക്ക് ബന്ധുവീടുകളിലേക്ക് മാറിപ്പോകാനുള്ള നിർദേശം നൽകിയിട്ടുണ്ട്.

ആരോഗ്യ ജാഗ്രത നിർദേശങ്ങൾ

ജില്ലയിൽ ആരംഭിക്കുന്ന ക്യാമ്പുകൾക്ക് അതാത് സ്ഥലത്തെ മെഡിക്കൽ ഓഫീസർമാർക്ക് ചുമതല നൽകിയിട്ടുണ്ടെന്ന് ജില്ലാ മെഡിക്കൽ ഓഫീസർ അറിയിച്ചു. അതാത് പ്രദേശത്തെ ജൂനിയർ ഹെൽത്ത് ഇൻസ്പെക്ടർമാർക്കാണ് ഏകോപന ചുമതല. ഗർഭിണികൾക്കും പ്രായമായവർക്കും പാലിയേറ്റീവ് രോഗികൾക്കും ഡയാലിസിസ്, ഹൈപ്പർ ടെൻഷൻ രോഗികൾക്കും പ്രാധാന്യം നൽകിയുള്ള പ്രവർത്തനങ്ങൾക്കാണ് നിർദേശം നൽകിയിട്ടുള്ളത്. പകർച്ചപ്പനി പോലുള്ള രോഗങ്ങളെ പ്രതിരോധിക്കാനുള്ള മാർഗങ്ങൾ അവലംബിക്കാനും നിർദേശമുണ്ട്.

ജില്ലയിൽ എച്ച് വൺ എൻ വൺ (H1N1) റിപ്പോർട്ട് ചെയ്ത സാഹചര്യത്തിൽ പ്രതിരോധ മരുന്നുകൾ ആവശ്യത്തിന് ലഭ്യമാണെന്നും ഡിഎംഒ അറിയിച്ചു. ക്യാമ്പുകളിൽ ഭക്ഷണം എത്തിക്കുന്നവർ വൃത്തിയും ശുചിത്വവും പാലിക്കണമെന്നും, രോഗബാധിതരായവർ ഭക്ഷണം പാകം ചെയ്യുന്നതിൽ നിന്നും വിട്ടുനിൽക്കണമെന്നും, കുടിവെള്ളത്തിനായി തിളപ്പിച്ച വെള്ളം മാത്രം ഉപയോഗിക്കണമെന്നും നിർദേശമുണ്ട്. അടിയന്തര സാഹചര്യങ്ങൾ മുന്നിൽ കണ്ട് ആശുപത്രികളിൽ കൂടുതൽ ബെഡുകൾ ഒരുക്കിയിട്ടുണ്ടെന്നും ആവശ്യ മരുന്നുകളുടെ ലഭ്യത ഉറപ്പാക്കിയിട്ടുണ്ടെന്നും ഡിഎംഒ അറിയിച്ചു. കടൽ നിലവിൽ ശാന്തമാണെന്നും മത്സ്യബന്ധനത്തിന് ആരുംതന്നെ കടലിൽ പോയിട്ടില്ലെന്നും ഫിഷറീസ് ഡയറക്ടർ അറിയിച്ചു. ഫയർഫോഴ്സിന് ആവശ്യമായ എല്ലാ സൗകര്യങ്ങളും ഉപകരണങ്ങളും ലഭ്യമാണെന്നും എന്താവശ്യത്തിനും തയ്യാറാണെന്നും ജില്ലാ ഫയർ ഓഫീസർ അറിയിച്ചു.

എന്താണ് 'കവചം' മുന്നറിയിപ്പ് സംവിധാനം?

സംസ്ഥാന ദുരന്ത നിവാരണ അതോറിറ്റി (KSDMA) ജനങ്ങൾക്ക് അതിവേഗം അടിയന്തര മുന്നറിയിപ്പുകൾ നൽകുന്നതിനായി സംസ്ഥാനത്തുടനീളം സ്ഥാപിച്ചിട്ടുള്ള ഓട്ടോമേറ്റഡ് സൈറൺ സംവിധാനമാണ് കവചം (KaWaCHaM - Kerala Alert Warning and Communication Hazard Management). പ്രകൃതി ദുരന്തങ്ങൾ, അതിതീവ്ര മഴ, അണക്കെട്ടുകൾ തുറക്കൽ തുടങ്ങിയ അടിയന്തര സാഹചര്യങ്ങളിൽ പ്രദേശവാസികളെ ശബ്ദത്തിലൂടെ ജാഗരൂകരാക്കാൻ ഇത് സഹായിക്കുന്നു. സംസ്ഥാന ദുരന്ത നിവാരണ അതോറിറ്റിയിൽ (KSEOC-KSDMA) നിന്നുള്ള അറിയിപ്പ് പ്രകാരം, ഓറൻജ് ജാഗ്രത പ്രഖ്യാപിച്ച കാസർകോട് അടക്കമുള്ള ജില്ലകളിൽ മുന്നറിയിപ്പിൻ്റെ ഭാഗമായി ഞായറാഴ്ച (02/08/2026) വൈകുന്നേരം 4 നും 4.30 നും ഇടയിലായി കവചം മുന്നറിയിപ്പ് സംവിധാനത്തിൻ്റെ ഭാഗമായുള്ള സൈറണുകൾ മുഴങ്ങും.

കാലാവസ്ഥാ പ്രവചനവും ജാഗ്രതകളും

കേന്ദ്ര കാലാവസ്ഥ വകുപ്പിൻ്റെ മഴ സാധ്യത പ്രവചനപ്രകാരം വിവിധ ജില്ലകളിൽ ഓറൻജ്, മഞ്ഞ ജാഗ്രതകൾ പ്രഖ്യാപിച്ചിരിക്കുന്നു. ഞായറാഴ്ച (02/08/2026) പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ഓറൻജ് ജാഗ്രത പ്രഖ്യാപിച്ചിരുന്നു. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയാണിത് (24 മണിക്കൂറിൽ 115.6 മില്ലിമീറ്റർ മുതൽ 204.4 മില്ലിമീറ്റർ വരെ മഴ ലഭിക്കുമെന്നാണ് അതിശക്തമായ മഴ എന്നത് കൊണ്ട് അർഥമാക്കുന്നത്).

തിരുവനന്തപുരം, കൊല്ലം ജില്ലകളിൽ ഇതേദിവസം മഞ്ഞ ജാഗ്രതയുണ്ടായിരുന്നു. തിങ്കളാഴ്ച (03/08/2026) പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, മലപ്പുറം, കോഴിക്കോട്, വയനാട്, കണ്ണൂർ, കാസർകോട് എന്നീ ജില്ലകളിലും, വ്യാഴാഴ്ച (06/08/2026) മലപ്പുറം, കോഴിക്കോട്, വയനാട്, കണ്ണൂർ, കാസർകോട് എന്നീ ജില്ലകളിലും മഞ്ഞ ജാഗ്രത പ്രഖ്യാപിച്ചിട്ടുണ്ട്. കനത്ത മഴയും മണ്ണിടിച്ചിൽ ഭീഷണിയും തുടരുന്ന സാഹചര്യത്തിൽ പൊതുജനങ്ങൾ അതീവ ജാഗ്രത പാലിക്കണമെന്നും സുരക്ഷാ നിർദേശങ്ങൾ കർശനമായി പിന്തുടരണമെന്നും ജില്ലാ കലക്ടർ അറിയിച്ചു.

മഴക്കെടുതിയുമായി ബന്ധപ്പെട്ട ഈ സുപ്രധാന വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിവരങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Heavy rains hit Kasaragod; 5 relief camps opened and alerts issued.

#KasaragodRain #KeralaMonsoon #ReliefCamps #KSDMA #OrangeAlert #KasaragodNews #AparnaNews