Urgent | കാസർകോട് ജി എച്ച് എസ് എസ്: ലൈബ്രറിക്ക് അടിയന്തര നവീകരണം വേണം

കാസർകോട്: (KasargodVartha) ജില്ലയിലെ പ്രമുഖ വിദ്യാഭ്യാസ സ്ഥാപനമായ ഗവ. ഹയർ സെക്കണ്ടറി സ്‌കൂളിന്റെ ലൈബ്രറി അടിസ്ഥാന സൗകര്യങ്ങളുടെ അപര്യാപ്തത നേരിടുന്നുണ്ട്. നൂറു വർഷത്തെ പഴക്കമുള്ള സ്‌കൂളിന് അനുയോജ്യമായ ഒരു ലൈബ്രറി സൗകര്യം ഇതുവരെ ഉണ്ടായിട്ടില്ല എന്നത് ആശങ്കാജനകമായ വിഷയമാണ്.

പുസ്തകങ്ങളുടെ ക്രമീകരണം, വായനാ സൗകര്യം, ആധുനിക സാങ്കേതിക സൗകര്യങ്ങൾ എന്നിവയുടെ അഭാവം ലൈബ്രറിയുടെ പ്രവർത്തനത്തെ ബാധിക്കുന്നു. ഈ സാഹചര്യത്തിൽ, സ്‌കൂൾ പൂർവ്വ വിദ്യാർത്ഥി സംഘടനയായ ഒ.എസ്.എ കാസർകോട് ലൈബ്രറി നവീകരണത്തിന് ആവശ്യപ്പെട്ടിരിക്കുന്നു.

ഒ.എസ്.എ കാസർകോട് ജനറൽ ബോഡി യോഗത്തിൽ വൈസ് പ്രസിഡണ്ട് എ.എസ്. മുഹമ്മദ് കുഞ്ഞി അദ്ധ്യക്ഷത വഹിച്ച യോഗത്തിൽ സെക്രട്ടറി ഷാഫി എ. നെല്ലിക്കുന്ന് പ്രവർത്തന റിപ്പോർട്ട് അവതരിപ്പിച്ചു. എൻ.എ അബൂബക്കർ, ഹനീഫ് നെല്ലിക്കുന്ന്, അഡ്വ. പി.വി ജയരാജൻ, അഡ്വ. ബേവിഞ്ച അബ്ദുല്ല എന്നിവർ സംസാരിച്ചു. ഖാദർ നുള്ളിപ്പാടി പുതിയ ഭാരവാഹികൾക്കുള്ള തിരഞ്ഞെടുപ്പ് നിയന്ത്രിച്ചു.

ഭാരവാഹികളായി എൻ.എ അബൂബക്കർ (പ്രസിഡന്റ്), കെ. ജയചന്ദ്രൻ, ഹനീഫ് നെല്ലിക്കുന്ന്, മൂസ ബി. ചെർക്കള (വൈസ് പ്രസിഡന്റുമാർ), ഷാഫി എ. നെല്ലിക്കുന്ന് (സെക്രട്ടറി), ഷുക്കൂർ തങ്ങൾ, ഹാരിസ് സിറ്റി ചപ്പൽ, ബാലകൃഷ്ണൻ കെ (ജോയിന്റ് സെക്രട്ടറിമാർ), സി.കെ അബ്ദുല്ല ചെർക്കള (ട്രഷറർ) എന്നിവരെ തെരഞ്ഞെടുത്തു. 

സബ് കമ്മിറ്റികളായി സാഹിത്യം, കല, മെമ്പർഷിപ്പ്, വനിതാ വിംഗ്, കണക്റ്റിങ് കന്നഡ മീഡിയ എന്നിവ രൂപീകരിച്ചു. എ.എസ്. മുഹമ്മദ് കുഞ്ഞി, കെ.എച്ച്. മുഹമ്മദ്, മഹമൂദ് വട്ടയക്കാട്, അബ്ദുല്ല പേർഷ്യൻ പർദ്ദ, ശ്രീജ സുനിൽ, അനീഷ എൻ.എച്ച്, സറ്റീഫൻ ക്രാസ്റ്റ് എന്നിവരെയാണ് ഇതിനായി ചുമതലപ്പെടുത്തിയത്. ഇന്റേണൽ ഓഡിറ്ററായി മുനീർ മാസ്റ്ററെ തെരഞ്ഞെടുത്തു.

ഈ അടിയന്തര പ്രശ്‌നത്തിന് പരിഹാരം കാണുന്നതിന് സ്‌കൂൾ അധികൃതർ, വിദ്യാഭ്യാസ വകുപ്പ്, പൂർവ്വ വിദ്യാർത്ഥി സംഘടനകൾ, സാമൂഹിക സംഘടനകൾ തുടങ്ങിയവരുടെ സഹകരണം അനിവാര്യമാണ്.

#schoollibrary #education #Kasargod #Kerala #renovation #alumni