കാസർകോട് മത്സ്യ മാർക്കറ്റിൽ ദുരിതമൊഴിയുന്നില്ല; പുതിയ കെട്ടിടമെന്ന നഗരസഭയുടെ പ്രഖ്യാപനം ഇനിയും യാഥാർഥ്യമായില്ല

കാസർകോട്: (KasargodVartha) കാസർകോട് മത്സ്യ മാർക്കറ്റിലെ ദുരിതാവസ്ഥയ്ക്ക് ഒരു പതിറ്റാണ്ട് കാലമായിട്ടും പരിഹാരമാകുന്നില്ല. പുതിയ ആധുനിക മത്സ്യ മാർക്കറ്റ് നിർമാണം വൈകുന്നത് മൂലം മത്സ്യ വിൽപ്പന തൊഴിലാളികളും ഉപഭോക്താക്കളും കടുത്ത പ്രയാസത്തിലാണ്. ആധുനിക മത്സ്യ മാർക്കറ്റ് പണിയുമെന്ന നഗരസഭയുടെ പ്രഖ്യാപനം യാഥാർഥ്യമാകാൻ വർഷങ്ങൾ ഇനിയും എത്രയെടുക്കുമെന്ന ആശങ്കയിലാണ് നാട്ടുകാർ

റോഡിലെ കച്ചവടവും ഗതാഗതക്കുരുക്കും

മത്സ്യ മാർക്കറ്റ് റോഡിൽ തന്നെയാണ് മത്സ്യങ്ങളുടെ ലേലം വിളി നടക്കുന്നത്. വാഹനങ്ങളിലെത്തുന്ന മത്സ്യം ഇറക്കുന്നതും ഇവിടെത്തന്നെയാണ്. മാർക്കറ്റ് റോഡിൽ ഇരുഭാഗത്തുമായുള്ള മത്സ്യ വിൽപ്പനയും നടുവിലായി മത്സ്യം വാങ്ങാൻ എത്തുന്ന ഉപഭോക്താക്കളും കാരണം കടുത്ത തിരക്കാണ് അനുഭവപ്പെടുന്നത്. റോഡിൻ്റെ ഇരുഭാഗത്തുമുള്ള മീൻ കച്ചവടം മൂലം വാഹനങ്ങൾക്ക് ഇത് വലിയ തടസ്സം സൃഷ്ടിക്കുന്നുണ്ട്. ഇതിനിടയിലൂടെ വേണം ഉപഭോക്താക്കൾക്ക് മീൻ വാങ്ങാൻ മാർക്കറ്റിൽ എത്താൻ.

കെട്ടിടങ്ങൾ ശോചനീയാവസ്ഥയിൽ

കഴിഞ്ഞ ഒരു പതിറ്റാണ്ട് കാലമായി നഗരസഭയുടെ വിവിധ ഭരണസമിതികൾ മത്സ്യ മാർക്കറ്റ് ആധുനിക സൗകര്യങ്ങളോടെ പുനർനിർമിക്കുമെന്ന് വാഗ്ദാനം നൽകാൻ തുടങ്ങിയിട്ട്. എന്നാൽ തുടർനടപടികൾ എവിടെയും എത്തിയിട്ടില്ല. മാർക്കറ്റിൽ നിലവിലുള്ള കെട്ടിടങ്ങൾ പഴകി ദ്രവിച്ചു നിൽക്കുകയാണ്. മാർക്കറ്റിലെ വൃത്തിയുടെയും മലിനീകരണത്തിൻ്റെയും കാര്യത്തിലും കടുത്ത അലംഭാവമുണ്ട്. മത്സ്യ മാർക്കറ്റിൻ്റെ ശോചനീയാവസ്ഥയ്ക്ക് യുദ്ധകാലാടിസ്ഥാനത്തിൽ നടപടി സ്വീകരിക്കണമെന്ന് മത്സ്യ വിൽപ്പന തൊഴിലാളികളും ഉപഭോക്താക്കളും ആവശ്യപ്പെടുന്നു.

പ്രതീക്ഷ നൽകി നഗരസഭയുടെ മറുപടി

മാർക്കറ്റിൻ്റെ വികസനവുമായി ബന്ധപ്പെട്ട് കാസർകോട് നഗരസഭ ഉപാധ്യക്ഷൻ കെ. എം. ഹനീഫ് വ്യക്തമാക്കുന്നത് ഇങ്ങനെയാണ്. നിലവിലെ നഗരസഭയുടെ ബജറ്റിൽ ഒന്നാമത്തെ ഇനമായാണ് ആധുനിക മത്സ്യ മാർക്കറ്റ് നിർമാണം ഉൾപ്പെടുത്തിയിരിക്കുന്നത്. ഏകദേശം 10 കോടി രൂപയുടെ പദ്ധതിയാണ് ബജറ്റിൽ ഇതിനായി മാറ്റിവെച്ചിട്ടുള്ളത്.

പദ്ധതിയുടെ ഡി.പി.ആർ. തയ്യാറാക്കാനുള്ള നടപടികൾ പുരോഗമിക്കുകയാണ്. ഇതിൻ്റെ അംഗീകാരത്തിനായി ഡിസ്ട്രിക്റ്റ് പ്ലാനിങ് കൗൺസിൽ മുമ്പാകെ സമർപ്പിച്ചിട്ടുണ്ട്. ഈ അംഗീകാരം ലഭിക്കുന്ന മുറയ്ക്ക് തുടർനടപടികൾ ആരംഭിക്കും. സംസ്ഥാന സർക്കാരുമായി ചേർന്ന് ഫണ്ട് ലഭ്യമാക്കാനുള്ള ശ്രമങ്ങളും നഗരസഭ നടത്തുന്നുണ്ട്. ഫിഷറീസ് വകുപ്പിൽ നിന്നും മത്സ്യ മാർക്കറ്റ് നിർമാണത്തിന് ഫണ്ട് അനുവദിക്കണമെന്ന് മന്ത്രിയോട് ആവശ്യപ്പെട്ടിട്ടുണ്ടെന്നും വൈസ് ചെയർമാൻ പറഞ്ഞു.

മാർക്കറ്റ് പരിസരത്തെ മാലിന്യ പ്രശ്നം ശ്രദ്ധയിൽപ്പെട്ടിട്ടുണ്ട്. ഇത് സ്വകാര്യ വ്യക്തിയുടെ ഉടമസ്ഥതയിലുള്ള സ്ഥലത്താണ് അടിഞ്ഞുകൂടിയിട്ടുള്ളത്. ഇത് നീക്കാൻ നോട്ടീസ് നൽകുകയും പിഴ ചുമത്തുകയും ചെയ്തിട്ടുണ്ട്. ഡ്രെയിനേജ് സംവിധാനം നന്നാക്കുന്നതിനുള്ള പ്രവർത്തനങ്ങൾ നടന്നു വരുന്നുണ്ടെന്നും നഗരസഭ വൈസ് ചെയർമാൻ അറിയിച്ചു. ആധുനിക മത്സ്യ മാർക്കറ്റ് വൈകാതെ തന്നെ യാഥാർഥ്യമാക്കുമെന്ന് നഗരസഭ ചെയർപേഴ്സൺ ഷാഹിനാ സലീമും കാസർകോട് വാർത്തയോട് പ്രതികരിച്ചു.

പ്രാദേശിക പ്രശ്നങ്ങളെക്കുറിച്ചുള്ള ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. കൂടുതൽ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Fish vendors and customers face severe difficulties at the Kasaragod fish market due to dilapidated buildings and traffic congestion. Kasaragod municipality Vice Chairman KM Haneef stated that a 10-crore modern market project is underway, with DPR preparations and approval processes currently in progress.

#KasaragodNews #FishMarket #KeralaNews #LocalNews #MalayalamNews #KasaragodMunicipality