പാമ്പുകളും കുറുനരിയും കൂട്ടായി; കളപ്പുരയിലെ കാർത്ത്യായനിയുടെ ജീവിതം മാറാൻ മനുഷ്യാവകാശ കമ്മീഷൻ!

കാസർകോട്: (KasargodVartha) കാടുമൂടിയ ഒന്നര ഏക്കർ പറമ്പിൽ, പഴകി ജീർണിച്ച് തകർന്ന വീടിനോട് ചേർന്നുള്ള കളപ്പുരയിൽ 15 വർഷമായി ഒറ്റയ്ക്ക് താമസിക്കുന്ന, കേൾവിക്കുറവുള്ള കെ. വി. കാർത്ത്യായനി (69) എന്ന വയോധികയുടെ വിഷയത്തിൽ മനുഷ്യാവകാശ കമ്മീഷൻ ഇടപെട്ടു. 

കാർത്ത്യായനിയുടെ പരാതികൾ പരിശോധിച്ച്, പരിഹാരനടപടികൾ ഉൾപ്പെടുത്തി ഏഴ് ദിവസത്തിനകം റിപ്പോർട്ട് സമർപ്പിക്കാൻ ജില്ലാ കളക്ടർക്കും ജില്ലാ വിമൻ ആൻഡ് ചൈൽഡ് ഡെവലപ്‌മെന്റ് ഓഫീസർക്കും കമ്മീഷൻ ജുഡീഷ്യൽ അംഗം കെ. ബൈജുനാഥ് നിർദ്ദേശം നൽകി.

കളപ്പുരയിലേക്കുള്ള വൈദ്യുതി കണക്ഷൻ കെ.എസ്.ഇ.ബി. വിച്ഛേദിച്ചിരിക്കുകയാണ്. തൊഴിലുറപ്പ് പദ്ധതിക്ക് പോയാണ് കാർത്ത്യായനി ഭക്ഷണത്തിനുള്ള വക കണ്ടെത്തുന്നത്. പറമ്പ് കാടുമൂടിയതിനാൽ കുറുനരിയും പാമ്പുകളും ധാരാളമായി ഇവിടെയുണ്ട്. 

കുടുംബത്തിന് നല്ലകാലത്ത് തേങ്ങയും മറ്റും സൂക്ഷിക്കാൻ പണിത കളപ്പുരയിലാണ് ഈ വയോധിക താമസിക്കുന്നത്. 15 വർഷം മുമ്പ് ഭർത്താവ് രാമചന്ദ്രൻ (68) മരിച്ചതോടെ മക്കളില്ലാത്ത കാർത്ത്യായനി അനാഥയായി.

വീടും പറമ്പും ഭർതൃപിതാവിൻ്റെ പേരിലായതിനാൽ, ഭാഗം വെച്ച് അവകാശം ലഭിക്കാത്തതുകൊണ്ട് സ്വന്തമായി വീടിന് വേണ്ടി അപേക്ഷ സമർപ്പിക്കാൻ പോലും കഴിയാത്ത അവസ്ഥയിലാണ് കാർത്ത്യായനി. 

കളപ്പുരയ്ക്ക് പ്രത്യേകം വൈദ്യുതി കണക്ഷൻ നൽകണമെന്ന് നാട്ടുകാർ കെ.എസ്.ഇ.ബി.യോട് ആവശ്യപ്പെട്ടെങ്കിലും ഇത് അംഗീകരിക്കപ്പെട്ടില്ല. ജൂലൈ 17-ന് കാസർകോട് പി.ഡബ്ല്യു.ഡി. റസ്റ്റ് ഹൗസിൽ നടക്കുന്ന സിറ്റിംഗിൽ ഈ കേസ് പരിഗണിക്കും. പത്രവാർത്തയുടെ അടിസ്ഥാനത്തിൽ മനുഷ്യാവകാശ കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് ഈ നടപടി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം പങ്കുവെക്കുക.

Article Summary: Elderly woman living alone for 15 years gets human rights commission help.

#HumanRights #Kasaragod #Kerala #ElderlyCare #SocialJustice #IndiaNews